परकासितवाक्य 7 - नुवो नेम (मेवड़ी नया नियम)

एक लाक चमालिस हजार इजराएली मनक

¹ ईंका केड़े में च्यार हरग दुताँ ने धरती का च्यारई खुणा में ऊबा तका देक्या, वीं च्यारई खुणाऊँ आबावाळा बईरो ने ठाम मेल्यो हो, जणीऊँ ईं धरती का रूँकड़ा के अन समन्द में बईरो ने चाल सके।

² अन में एक ओरी हरग-दुत ने उगमणी दसाऊँ आवतो तको देक्यो। वणी जीवता परमेसर की मोर ले राकी हे। वणी वणा च्यारई दुताँ ने ज्याँने धरती अन समन्द को नास करबा को हक दिदो ग्या हो, वाँकाऊँ जोरऊँ क्यो,

³ “थाँ जद्याँ तईं धरती, समन्द अन रूँकड़ा को नास मती करज्यो, तद्याँ तईं मूँ आपणाँ परमेसर की मोर वींका दासा का माता पे ने लगई दूँ।”

⁴ पछे जिंके मोर लगई गी ही, वाँकी गणती एक लाक चमालिस हजार ही। वीं मनक इजराएल का हाराई गोताँ मेंऊँ हा।

^5-8 वणा गोताँ में यहूदा, रुबेन, गाद, आसेर, नप्ताली, मनस्से, समोन, लेवी, इस्साकार, जबलुन, युसुप अन बिन्यामीन हा। वणा मेंऊँ एक-एक गोत मेंऊँ बारा बारा हजार मनक हा।

मनकाँ की मोटी भीड़

⁹ ईंका केड़े में कई देक्यो के, मनकाँ का मोटी भीड़ हे जिंने कुई भी गण ने सके, वीं भीड़ में हारी जात्या का, हाराई कुल का, हारी बोली बोलबावाळा अन हाराई देसा का मनक हा, वीं वणी गादी अन उन्याँ का हामे ऊबा हा, वणा धोळा गाबा पेर मल्या हा अन हाताँ में खजुर की डाळ्याँ ले राकी ही।

¹⁰ अन वीं हेलो पाड़रिया हा, “आपणाँ उदार का वाते गादी पे बेट्या तका आपणाँ परमेसर की अन उन्याँ की जे-जेकार वेवे।”

¹¹ वीं हाराई हरग-दुत वीं गादी के, पुरवजाँ के अन च्यारई जीवता जीव का च्यारूँमेर ऊबा हा। वणा गादी पे बेट्या तका परमेसर के धोक दिदो।

¹² पछे वणा क्यो, “आमीन! आपणाँ परमेसर की जे-जेकार, मेमा, अकल, धन्नेवाद, मान, तागत अन सगती हमेस्यान बणी तकी रेवे। आमीन।”

¹³ तो वणा पुरवजाँ मेंऊँ एक जणे माराऊँ पूँछ्यो, “जणी धोळा गाबा पेर मल्या हा, वीं मनक कूण हे? वीं कटाऊँ आया हे?”

¹⁴ में वणीऊँ क्यो, “हे मालिक, थाँ तो जाणोई हो।” तो वणा माराऊँ क्यो, “ईं वीं मनक हे जी कळेस जेलन आया हे अन अणा आपणाँ गाबा ने उन्याँ का लुईऊँ धोन धोळा किदा हे।

¹⁵ ईं वजेऊँ ईं परमेसर का गादी का हामे ऊबा हे अन वाँके मन्दर में रात-दन वाँकी भगती करता रेवे हे, ईं वाते ज्यो गादी पे बेट्या तका हे वो वाँका में वास करतो तको वाँने बंचाई।

¹⁶ वाँने ने तो भूक लागी अन नेई वाँने कदी तर लागी। सुरज की तपत अन तावड़ाऊँ भी वाँके कई ने वेई।

¹⁷ काँके ज्यो उन्यो गादी का बचमें में हे वो वाँकी रुकाळी करी। अन वो वाँने जीवन देबावाळा पाणी की सोता का नके लेन जाई अन परमेसर वाँकी आक्याँ का हाराई आसूँ पुछ देई।”