परकासितवाक्य 5 - नुवो नेम (मेवड़ी नया नियम)

किताब कूण खोल सके हे?

¹ पछे में कई देको के, ज्यो गादी पे बेट्या हो, वींके जीमणा हात में एक किताब ही अन वाँ दुई आड़ीऊँ लिकी तकी ही। वींने हात मोराँ लगान बन्द कर मेली ही।

² तो में एक जोरवार हरग-दुत ने देक्यो जणी जोरऊँ अस्यान हेलो पाड़्यो हो के, “ईंकी मोराँ तोड़बा अन किताब ने खोलबा के जोगो कूण हे?”

³ पण ने तो हरग में, ने धरती पे अन ने धरती का रेटे वींने खोलबा अन देकबा जोगो कुई मल्यो।

⁴ ईं वाते मूँ जोर-जोरऊँ रोबा लागो, काँके वींने कुई भी खोलबा अन देकबा जोगो भी ने मल्यो हो।

⁵ तो वणा पुरवज मेंऊँ एक माराऊँ क्यो, “रोवे मती। देक, यहूदा का गोत मेंऊँ वो नार, ज्यो दाऊद को मुल हे, वो वीं किताब ने अन वींकी मोराँ खोलबा वाते जीत हासील किदी हे।”

⁶ मूँ देकूँ हूँ के, वाँ गादी, च्यारई जीवता जीव का हामे अन वणा पुरवज का बचमें एक उन्यो ऊबो तको हे। वो अस्यान लागरियो जस्यान के, वींकी बली चड़ई गी वे। वींके हात हिंगड़ा अन हात आक्याँ ही, ईं परमेसर की हात आत्मा ही, ज्याँने आकी धरती पे खन्दई गी ही।

⁷ अन वो उन्यो गादी का नके आयो अन जो वींपे बेट्यो तको हो वींके जीमणा हातऊँ वाँ किताब ले लिदी।

⁸ अन जद्याँ वणी किताब ले लिदी, तो वणा च्यारई जीवता जीव अन वीं चोवीस पुरवज वींके धोक लाग्या। वणा हाराई का नके विणा ही अन वीं वाना आबावाळी चिजाँऊँ भरिया तका होना का प्याला लेन राक मेल्या हा। यो धरमिया की परातना दिकावे हे।

⁹ वीं एक नुवो गीत गाबा लागा हा के, “थाँ ईं किताब ने अन ईंपे लागी तकी मोराँ ने खोलबा जोगो हो, काँके थाँ बली चड़न थाँका लुईऊँ हाराई कुल का मनकाँ ने, हारी बोली बोलबावाळा ने, हारी जात्या का मनकाँ ने परमेसर वाते मोल लिदो हे।

¹⁰ थाँ वाँने परमेसर का याजक अन एक राज करबावाळा बणाया हे अन वीं धरती पे राज करे हे।”

¹¹ पछे में हरग दुताँ की अवाज हूणी, वीं गादी, वीं च्यारई जीवता जीव, पुरवज का च्यारूँमेर ऊबा हा अन वाँकी गणती लाको करोड़ो में ही।

¹² वीं जोरऊँ हेलो पाड़रिया हा, “जो उन्यो बली चड़ायो ग्यो हो, वोईस तागत, धन, अकल, सगती, मान, मेमा अन धन्नेवाद के जोगो हो।”

¹³ वींके केड़े में हरग की, धरती की, पाताळ की, अन समन्द की हारी रचना अन बरमाण्ड का हाराई मनक की अवाज हूणी, वीं अस्यान बोलरिया हा के, “ज्यो गादी पे बेट्यो हे वींकी अन उन्याँ की मेमा, मान, अन धन्नेवाद अन वींको राज जुग-जुग रेवे।”

¹⁴ पछे वीं च्यारई जीवता जीव बोल्या आमीन, अन वीं पुरवज रेटे नमन वींके धोक लाग्या।