परकासितवाक्य 15 - नुवो नेम (मेवड़ी नया नियम)

हात हरग-दुत का हाते हात विपत्याँ

¹ ईंका केड़े में हरग में एक ओरी अचम्बो करबावाळो हेन्याण देक्यो, में कई देक्यो के, हात हरग-दुत हे अन वाँके नके हात विपत्याँ ही। काँके ईं आकरी नास के पूरो व्या केड़े परमेसर को गुस्सा को भी अंत वे जाई।

² ईंका केड़े मने काँस का जस्यान को समन्द नजर आयो वो अस्यान दिक्यो हो जस्यान के, वींके मयने वादी वेवे। जी मनक वीं डरावणा जनावर की मूरती अन वींका नाम का नम्बरऊँ जितग्या हा, वाँने वीं काँस का समन्द पे ऊबा तका देक्यो। वणा का नके परमेसर का आड़ीऊँ दिदी तकी रणभेरी ही।

³ वीं मनक परमेसर का दास मूसा अन उन्याँ का गीत गारिया हा, “वीं घणा मोटा काम हे ज्याँने थाँ करता रेवो हो। थाँका काम अचम्बा का हे अन थाँकी तागत जुग-जुग तईं हे। परबू परमेसर, थाँको गेलो हाँचो अन धरम का कामाँऊँ भरियो हे, थाँ हारी जात्या का राजा हो।

⁴ परबू थाँकाऊँ हाराई मनक दरपता रेई। हाराई मनक थाँको नाम लेन जे-जेकार करी, काँके खाली थाँईस पुवितर हो। हारी जात्या का मनक थाँका नके भेळा व्या हे वीं थाँकी भगती करी। काँके थाँका किदा तका काम हामे हे, अन हो परबू थाँ ज्या भी करो हो, वो न्याव हे।”

⁵ ईंका केड़े में कई देक्यो के हरग में ज्यो मन्दर हे वींने अन वादावाळो तम्बू ने खोल्यो ग्यो।

⁶ अन वींके मयनेऊँ वीं हातई हरग-दुत ज्याँका नके आकरी हात विपत्याँ ही, बारणे आया। वणा साप ऊजळा अन चमकता तका गाबा पेर मल्या हा अन आपणी छाती पे होना का पट्टा बांद मेल्या हा।

⁷ तद्याँ वीं च्यारई जीवता जीव मेंऊँ एक जणे वणा हातई हरग दुताँ ने अमर परमेसर का गुस्साऊँ भरिया तका होना का प्याला दिदा।

⁸ वो मन्दर परमेसर की मेमा अन वींकी तागत का धूवाऊँ भरियो हो, जणीऊँ वीं हातई हरग-दुत के हाताई विपत्याँ को काम पूरो ने वे जावे, तद्याँ तईं वीं मन्दर में कुई भी ने जा सके।