परकासितवाक्य 10 - नुवो नेम (मेवड़ी नया नियम)

हरग-दुत अन फोरी किताब

¹ ईंका केड़े में हरगऊँ एक जोरावर हरग-दुत ने रेटे उतरतो देक्यो। वींके च्यारूँमेर वादळा हा, वींके मातो का नके मेघ धनुस हो। वींको मुण्डा सुरज की जस्यान चमकरियो हो अन वींका पग वादी का थाम्बा का जस्यान हा।

² वणी हात में एक खली तकी फोरीक किताब ले राकी ही। वणी आपणाँ जीमणा पगने समन्द पे अन डावा पगने धरती पे राक मेल्यो हो।

³ अन नार की जस्यान दाड़ मारी, जद्याँ वणी दाड़ मारी, तो गाजबा की हात दाण अवाज हुणई दिदा।

⁴ वाँ गाजबा की हातई अवाज हुणई देणी बन्द वेगी, तो मूँ लिकबा का वाते त्यार व्यो, अतारक में हरगऊँ अवाज अई, “जीं बाताँ हात दाण गाजबा का हाते हूणी हे वाँने छाने राक, वाँने लिक मती।”

⁵ पछे जीं हरग-दुत ने में समन्द अन धरती पे ऊबो तको देक्यो हो, वणी आपणाँ जीमणा हात ने हरग आड़ी लाम्बो किदो।

⁶ वणी हरग-दुत वीं परमेसर की जो हरग, धरती अन समन्द में अन वणाके मयने जो चिजाँ हे वणा हाराई ने बणई हे वाँकी होगन खान क्यो, अबे ओरी मोड़ो ने वेई।

⁷ पण जद्याँ हातवे हरग-दुत को रणभेरी बजाबा को टेम आई, तो परमेसर की वाँ बात जीं छाने हे पुरी वेई, जिंने वीं आपणाँ दासा अन परमेसर का आड़ीऊँ बोलबावाळा बतई ही।

⁸ ज्या अवाज में हूणी ही, वाँ मने पाच्छी हुणई दिदी, “जा अन जो हरग-दुत समन्द अन धरती पे ऊबो हे, वींके हात मेंऊँ वाँ खली तकी किताब लिले।”

⁹ तो मूँ हरग-दुत का नके ग्यो अन वणीऊँ क्यो, “मने वाँ फोरीक किताब दिदे।” वणी माराऊँ क्यो, “ले अन ईंने खई जा। अणीऊँ थाँरो मुण्डो हेंतऊँ भी घणो मिटो वेई, पण थाँरा पेट में जळन वे जाई।”

¹⁰ में वीं हरग-दुत का हातऊँ वाँ फोरी किताब ले लिदी अन वींने खईग्यो। वणीऊँ मारो मुण्डो तो हेंतऊँ वीं घणो मिटो वेग्यो, पण पेट में जळन वेगी।

¹¹ तो पछे वणी माराऊँ क्यो के, थने परमेसर को संदेस हाराई मनकाँने, देसाने, हाराई राजा ने, हारी बोली बोलबावाळा मनकाँ ने हूणाणो पेड़ी।