फिलेमोन 1 - नुवो नेम (मेवड़ी नया नियम)

आवभगत

¹ ईसू मसी का हव हमच्यार का वाते बन्दी बण्यो मूँ पोलुस अन भई तिमुतियुस, आपणाँ खास हण्डाळ्याँ का हाते काम करबावाळो फिलेमोन,

² आपणी बेन अपपिया, आपणाँ हण्डाळ्याँ अरकीपुस अन थाँके घरे भेळी वेबावाळी मण्डली ने ओ कागद लिकरिया हाँ।

³ आपणाँ बाप परमेसर अन परबू ईसू मसी, थाँ लोगाँ ने दया अन सान्ती देवे।

फिलेमोन को परेम अन विस्वास

^4-5 हाराई परमेसर का पुवितर मनकाँ का हाते थाँका परेम अन परबू ईसू पे थाँका विस्वास का बारा में हुणन, मूँ हरदाण परमेसर को धन्नेवाद करूँ हूँ अन परातना में थाँने आद करूँ हूँ।

⁶ मारी परातना या हे के, थाँ थाँका विस्वास ने हव तरियाऊँ बाटबावाळा वे जावो, ताँके ज्या भलई ईसू मसी में आपणाँ हाते हे, वींने थाँ पुरी तरियाऊँ हमज सको।

⁷ काँके हे भई फिलेमोन थाँराऊँ परमेसर का पुवितर मनक घणा राजी वेग्या हे, ईं वाते थाँरा परेमऊँ मूँ घणो राजी व्यो अन मने हिम्मत मली।

उनेसिमुस का वाते फिलेमोनऊँ पोलुस की अरज

⁸ ईं वाते मसी में थाँने ज्यो करणो हे वींका बारा में मूँ आदेस दे सकूँ हूँ ईंको मने अदिकार हे।

^9-10 पण परेमऊँ मूँ थाँराऊँ अरज कररियो हूँ। मूँ पोलुस ज्यो अबे दानो अन ईसू मसी का हव-हमच्यार का वाते बंदी हूँ, थाँने आपणाँ धरम का बेटा उनेसिमुस का बारा में अरज कररियो हूँ ज्यो जेळ में ईसू पे विस्वास करन मारो बेटो बणग्यो हो।

¹¹ एक टेम ही, जद्याँ वो थाँरे कणी काम को कोयने हो, पण अबे वो थाँरे ने पण मारे दुयाँ के नरोई काम को हे।

¹² मूँ वींने थाँरा नके पाछो खन्दारियो हूँ ज्यो मारो जीव को जड़ी हे।

¹³ मूँ हव हमच्यार का वाते जेल में हूँ, मूँ वींने आपणाँ नकेईस राकणो छारियो हो, ताँके वो थाँकी जगाँ में मारी सेवा करे।

¹⁴ पण हे फिलेमोन थाँरी हा के बना मूँ कई ने करणो छारियो हूँ ताँके थूँ ज्यो भी हव काम करे हे, वो जबरदस्तीऊँ ने पण खुद की मरजीऊँ करे हे।

^15-16 वो थोड़ीक देर का वाते थाँराऊँ छेटी वेग्यो। वे सके यो ईं वाते व्यो वेई, ताँके वो एक दास का जस्यान ने, पण वणीऊँ भी हेलो एक लाड़ला भई के जस्यान हरदाण थाँरा नकेईस रे सके। एक मनक का रूप में अन परबू में एक भई का रूप में वो मारो लाड़ला भई हे बेस मारोईस ने पण खासतोरऊँ थाँरो भी हे।

¹⁷ यद्याँ थूँ मने आपणाँ हाते काम करबावाळो हण्डाळ्यो हमजे हे तो जस्यान मारी आवभगत करे वस्यानीस ईंकी भी करज्ये।

¹⁸ अन यद्याँ वणी थाँरो कई खोटो किदो वे कन वणी पूँ थाँरे कई लेणो वे, तो मारा खाता में लिक दिज्ये।

¹⁹ मूँ पोलुस खुद लिकूँ हूँ के, मूँ खुद वो नकसाण भर देऊँ। मने यो केवा की जरुरत कोयने हे के, थूँ आपणाँ जीवन तईं मारो करजदार रेई।

²⁰ हे भई मूँ परबू में थाँराऊँ ओ नफो लेणो छारियो हूँ। मसी में मारा हरदा ने राजी कर दे।

²¹ मूँ विस्वास करूँ हूँ के, थूँ मारी आग्या को पालण करे हे। थाँरा पे यो विस्वास राकन ओ कागद मूँ थने लिकरियो हूँ। मूँ जाणूँ हूँ के, मूँ जतरो थाँराऊँ केरियो हूँ वणीऊँ भी थूँ हेलो करी।

²² एक ओरी बात हे, मारा वाते एक ओवरो त्यार राक, मने आस हे के, थाँकी परातनाऊँ मूँ थाँका नके पाछो जट आ जाऊँ।

आकरी नमस्कार

²³ इपफरास ज्यो मसी ईसू का वाते मारा हाते जेळ में हे। वो थाँने आद कररियो हे।

²⁴ मारा हण्डाळ्याँ मरकुस, अरिस्तखुस, देमास अन लूका भी थाँने आद करे हे।

²⁵ थाँ हाराई की आत्मा पे परबू ईसू मसी को अनुगरे वेतो रेवे। आमीन।