मरकुस 3 - नुवो नेम (मेवड़ी नया नियम)

ईसू हात रिया तका मनक ने हव किदो

¹ एक दाण पछे ईसू यहूदी लोगाँ का परातना घर में ग्या, वटे एक जणो हो, जिंको हात में लकवो व्यो तको हो।

² कुई मनक ईं बात पे गात लगान बेटा हा के, ईसू वींने आराम का दन हव करी के ने करी? अणीऊँ वींपे दोस लगाबा को कुई मोको मल जा।

³ ईसू लकवा का माँदा मनक ने क्यो, “हाराई का हामे ऊबो वेजा।”

⁴ अन वणा लोगाँ ने पूँछयो, “कई हव हे के, आराम का दन किंकोई भलो करणो कन बुरो करणो? किंकोई जीव बंचाणो हव हे कन मारणो?” पण, वीं हंगळा छानारिया।

⁵ ईसू गुस्सा में हा जद्याँ वणा च्यारूँमेर वाँने देक्या, पण वीं वाँकी बुरई अन हठ ने देकन घणा दकी व्या। पछे वीं मनकऊँ क्यो, “थारो हात लाम्बो कर।” वणी हात लाम्बो किदो अन वींको हात हव वेग्यो।

⁶ तद्याँ फरीसी वटूँ पराग्या अन वाँकी लारे हेरोदिया राजा का दल का मनक ईसू ने मारबा की कळा होचबा लागा के, वींने कस्यान मार सका?

नरई जणा को ईसू का पाच्छे वेणो

⁷ ईसू आपणाँ चेला की लारे गलील समन्द पे पराग्या, वाँका पाच्छे गलीलऊँ घणी भीड़ वेगी ही, वे यहूदियाँ,

⁸ यरूसलेम नगर अन इदूमिया, यरदन नंदी के पार अन सूर-सेदा जगाँ का लोगाँ की भीड़ भी वाँका कामाँ का बारा में हुणन अई।

⁹ अन भीड़ की वजेऊँ वणा आपणाँ चेला ने क्यो हो के, वीं वींके वाते एक नाव त्यार राके, ताँके भीड़ वींने दबा ने सके।

¹⁰ अबे रूँकड़ा की जड़ा काटबा का वाते कराड़ो मेल्यो ग्यो हे। जीं रूँकड़ा हव फळ ने देई वाँने काट्या जाई अन वादी में नाक दिदो जाई।

¹¹ जद्याँ कणी मनक में हुगली आत्मा ही, वीं ईसू ने देकती, तो वे हंगळी आत्मा वाँका हामे रेटे पड़ जाती अन ज्योर की हाका-भार करती तकी केती, “थूँ परमेसर को पूत हे।”

¹² पण वो वाँने चेतातो तको केतो के, थें हेंचेत रेवो अन ईं बात को परच्यार मती करो।

ईसू बारा चेला ने थरप्या

¹³ पछे ईसू एक मंगरा पे चड़ग्या अन वीं जिंने छाता हा, वाँने आपणाँ नके बलाया। वीं हंगळा वाँका नके आया।

¹⁴ वणा मूँ वणा बारा जणा ने थरप्या अन वाँने “थरप्या तका” केन बलाया, काँके वीं वींका लारे रेवे अन वो वाँने हक का हाते खन्दावे, ताँके वीं परच्यार करे,

¹⁵ अन वाँका नके हुगली आत्माने बारणे निकाळबा को हक हो।

¹⁶ ईं बाराई जणा हा, समोन (जिंने वणा पतरस नाम दिदो।)

¹⁷ जब्दी को छोरो याकूब अन याकूब को भई यहुन्नो (जिंको नाम वणा बोनरगेस राक्यो, जिंको मतलब हे, “गाजबावाळो।”)

¹⁸ अन्दरियास, फिलिपुस, बरतुलमे, मत्ती, थोमो, हलफई को छोरो याकूब, तद्दीयुस अन देस परेमी समोन,

¹⁹ अन यहूदो इसकरियोती, जणी आगे ईसू ने धोकाऊँ पकड़ाया हा।

ईसू अन हुगली आत्मा को राजा

²⁰ तद्याँ वीं घरे पराग्या, जटे एक दाण पाच्छी अतरी हेली भीड़ अगेटी वेगी ही के, ईसू अन वाँका चेला खाणो तक ने खा सक्या।

²¹ जद्याँ वाँका परवार का लोगाँ यो हुण्यो, तो वीं वाँने लेबा निकळग्या, काँके कुई मनकाँ क्यो के, वींको मन ठाणे कोयने हे।

²² यरूसलेमऊँ आया तका मूसा का नेमा ने हिकाबावाळा केता हा, “वींमें हुगली आत्मा को राजा, बालजेबूल धस्यो तको हे। ईं वाते वो वींकी तागतऊँ दूजी हुगली आत्माने बारणे निकाळ सके हे।”

²³ ईसू वाँने आपणाँ नके बलाया अन केणी ने काम में लेता तका वाँने केबा लागा, “एक सेतान, दूजाँ सेतान ने कस्यान भगा सके हे?

²⁴ जदी कस्या राज का बचमें फुट पड़ जावे, तो वो राज कदी ने बंच पावे।

²⁵ अन जद्याँ कस्याई घर का लोगाँ बचमें फुट पड़ जावे, तो वो घर कदी ने बंच पावे।

²⁶ ईं तरिया जदी सेतान खुद आपणो विरोद करे अन फुट नाके, तो वो कदी बच्यो ने रे सके अन वींको नास वे जावे।

²⁷ “कस्या भी तागतवर मनक का घर में घुसन कुई वींका माल ने लूटन ने लेजा सके हे, जतरे सबाऊँ पेल्या वीं तागतवर मनक ने बान्द ने देवे। अस्यानीस करन वो वींको घर लूट सके हे।

²⁸ “मूँ थाँने सई केवूँ, मनक ने हर बात पे मापी मल सके हे, ज्यो वाँका पाप अन परमेसर की नन्दयाँ ज्यो वीं करे, माप किदी जा सके हे।

²⁹ पण, पुवितर आत्मा की कुई नन्दयाँ करे, तो वींने मापी कदी ने मल सके, काँके वो पाप अनंतकाल तईं बण्यो रेई।”

³⁰ ईसू ओ ईं वाते क्यो, काँके कुई मनक केता हा के, वाँमें हुगली आत्मा धस्यी तकी हे।

ईसू को हाँचो परवार

³¹ वीं दाण वींकी बई अन वींका भई वटे आया अन बारणे ऊबा रेन वींने मयनूँ बलायो।

³² ईसू का च्यारूँमेर भीड़ बेटी ही अन वणा वींने क्यो, “देक, थारी बई अन थाँरा भई-बेन थने बलारिया हे।”

³³ ईसू वाँने जवाब दिदो, “मारी बई कूण हे? कूण मारा भई हे?”

³⁴ वणा च्यारूँमेरऊँ बेटा तका लोगाँ ने देकन क्यो, “देको या हे मारी बई अन ईं हे मारा भई।

³⁵ ज्यो कुई परमेसर की बाताँ पे चाले, वींइस मारा भई-बेन अन मारी बई हे।”