मरकुस 16 - नुवो नेम (मेवड़ी नया नियम)

ईसू को पाछो जीवतो वेजाणो

¹ आराम का दन निकळ्या केड़े मरियम मगदलीनी, सलोमी अन याकूब की माँ मरियम ईसू की लास के वाते हव वाना की चिजाँ मोल लिदी।

² हपता के पेले दन दितवार ने भाग-फाट्याँ को सुरज निकळताईं वे कबर पे गी।

³ वीं एक-दूँजा ने पूँछरी ही, “आपणाँ वाते कबर का मुण्डा पूँ भाटो कूण हरकाई?”

⁴ जद्याँ पछे वाँकाणी आक्याँऊँ देक्यो के, कबर पूँ वो भाटो ज्यो मोटो हो, वो छेटी हरक्यो तको हे।

⁵ पछे जदी वे कबर में गी, तो वाँकाणी देक्यो एक मोट्यार धोळा-फट गाबा पेरिया जीमणा पाल्ड़े बेटो हे, तो वे दरपगी।

⁶ पछे वीं मोट्यार वाँने क्यो, “दरपो मती, थें ज्यो ईसू नासरत नगर को रेबावाळो हो, जिंने थाँ होदरी हो, जिंने हूळी पे चड़ायो हो, वो जीवतो वेग्यो हे। वो अटे कोयने हे। ईं जगाँ ने देको, जटे वींने मेल्यो हो।

⁷ अबाणू थें जावो अन वींका चेला अन पतरस ने को के, ‘वो थाँकाऊँ पेल्याँईं गलील में जा पूग्यो हे। जस्यान वणी थाँने क्यो हो, वो थाँने वटे मली।’”

⁸ दरप अन अचम्बा में डूबी तकी लुगायाँ कबर पूँ बारणे निकळन भागी। वाँ किंनेई कई बात ने बतई ही, काँके वीं घणी घबरई तकी ही।

मरियम मगदलीनी ने ईसू को दरसावो

⁹ हपता के पेले दन दितवार ने वो जीवतो व्या केड़े, हारऊँ पेल्याँ मरियम मगदलीनी का मुण्डागे परगट व्यो, जिंने वे हात हुगली आत्माऊँ छुटकारो दिदो हो।

¹⁰ वणी ईसू का चेला ने, ज्यो होक में डुबन रोरिया हा, बतायो।

¹¹ जदी वाँ चेला हुण्यो के, ईसू जीवतो हे अन वाँ वींने देक्यो हे, वाँकाणी विस्वास ने किदो।

चेला ने ईसू को दरसावो

¹² ईंका केड़े चेला मूँ दो जणा के मुण्डागे ईसू एक दूजाँ रूप में परगट व्या, जदी वे यरूसलेमऊँ आपणाँ गाम जारिया हा।

¹³ वाँकाणी पाच्छा आन दूजाँ ने ईं बात का हमच्यार दिदा, पण दूजाँ भी वाँको विस्वास ने किदो।

¹⁴ पछे जदी वींका ग्यारई चेला रोट्याँ खारिया हा, ईसू वाँका मुण्डागे परगट व्या अन वे वाँने वाँका बना विस्वास, कल्डा मन के वाते फटकारिया, काँके वणा वाँका हमच्यार को विस्वास ने किदो हो, जणा ईसू ने जीवता व्या केड़े देक्या हा।

¹⁵ पछे ईसू वाँने क्यो, “दनियाँ की हारी जगाँ में जावो अन हारई लोगाँ ने हव हमच्यार हुणावो।

¹⁶ ज्यो कुई विस्वास करे अन बतिस्मो लेवे, वो बंचायो जाई अन ज्यो विस्वास ने करे, वो दोसी ठेरायो जाई।

¹⁷ ज्यो मारा पे विस्वास करी, वो अचम्बा का काम करी, वे मारा नामऊँ हुगली आत्माने बारणे काड़ी, अन वे नुवी-नुवी बोल्याँ बोली।

¹⁸ यद्याँ वे आपणाँ हातऊँ हाँप पकड़ लेई अन वे जदी जेर भी पीं जाई, तुई वाँके कई नकसाण ने वेई। वे माँदा पे आपणो हात राकी अन वे हव वे जाई।”

ईसू को हरग में जाणो

¹⁹ जदी परबू ईसू वाँकाऊँ बात कर लिदी, तो वे हरग में उठा लिदा ग्या। वो परमेसर का जीमणा पाल्ड़े जान बेटग्या।

²⁰ वींका चेला बारणे जान हारी जगाँ परच्यार किदो, वाँकी लारे परबू काम कररिया हा। वाँका अचम्बावाळा काम की वजेऊँ ज्यो वे परच्यार कररिया हा, वीं सिद वेता ग्या।