मरकुस 11 - नुवो नेम (मेवड़ी नया नियम)

ईसू को यरूसलेम में आणो

¹ पछे जदी वीं यरूसलेम के भड़े जेतुन का मंगरा पे बेतफगे अन बेतनियाँ नगर में पूग्या, तो ईसू आपणाँ चेला मूँ दो जणा ने ओ केन आगला गाम में खन्दाया के,

² “थें आगला गाम में जावो। वींमें पूगताई एक गदेड़ी को बच्यो बन्दयो तको मली। जिंका पे पेल्या कुई ने बेटो तको हे, वींने खोलन अटे लावो।

³ अन जदी कुई थाँने पूछे, ‘थें ओ काँ कररिया हो?’ तो थाँकाणी केज्यो, ‘परबू ने ईंकी सावना हे, पाछो परबू ईंने जट खन्दा देई।’”

⁴ जदी वीं वटूँ पराग्या अन गेला का भड़े एक घर की पोळ में गदेड़ी को बच्यो बन्दयो तको देक्यो, तो वाँकाणी वींने खोलबा लागा।

⁵ थोड़ाक मनक, ज्यो वटे ऊबा हा, वणा पूँछ्यो, “थाँ यो कई कररिया हो? ईं गदेड़ी का बच्या ने काँ खोलरिया हो?”

⁶ ईसू का चेला वाँ लोगाँने आ बात अस्यान की, जस्यान ईसू वाँने बतई। ईं वाते वाँकाणी वाँने जाबा दिदा।

⁷ पछे वे गदेड़ी का बच्या ने ईसू का नके लेन आया। वाँकाणी वींपे गाबा मेल्या अन पछे ईसू वींपे बेटग्या।

⁸ घणा मनक वाँकी आवभगत करबा का वाते आपणाँ गाबा गेला में बसा दिदा अन घणा जणा खेताँऊँ डाळ्याँ काटन वटे नाक दिदी।

⁹ वे मनक ज्यो आगे हा अन ज्यो पाच्छे हा, बोलरिया हा, “परमेसर की जे हो, परबू का नामऊँ आबावाळा राजा ने परमेसर आसिरवाद दे।

¹⁰ आपणाँ बड़ाबा दाऊद को राज आरियो हे, वीं राज ने परमेसर आसिरवाद दे। हरग में परमेसर की जे हो।”

¹¹ ईसू यरूसलेम का मन्दर में आया अन च्यारूँमेर हारी चिजाँ देकी। पण दन आँतवाने हो, ईं वाते वो बाराई चेला की लारे बेतनियाँ नगर में परोग्यो।

बना फळवाळो अंजीर को रूँकड़ो

¹² आगले दन जदी वे बेतनियाऊँ पाच्छा निकळरिया हा, तो ईसू ने भूक लागी।

¹³ थोड़ाक छेटी वाँने एक अंजीर को हरियो-भरियो रूँकड़ो नजर आयो। तो वीं फळ पाबा की आस में रूँकड़ा के भड़े ग्या, पण वाँने वटे पान्दड़ाइस दिक्या, काँके अंजीर का फळ लागबा की टेम कोयने ही।

¹⁴ जदी ईसू रूँकड़ा ने क्यो, “अबे कुई कदी थारो फळ ने खाई।” वींका चेला ओ हुण लिदो हो।

ईसू यरूसलेम का मन्दर में ग्या

¹⁵ पछे वे यरूसलेम आया अन मन्दर में ग्या, तो ईसू वाँ लोगाँने ज्यो मन्दर में बेंचबा अन लेबावाळा लेण-देण कररिया हा, ईसू वाँने बाणे निकाळबो सरू कर दिदो। तो वे रिप्या को लेण-देण करबावाळा की तकता उळट-पुळट कर दिदा अन परेवड़ा बेंचबावाळा का बाजोट्या उळट-पुळट कर दिदा।

¹⁶ अन वणा किंने भी मन्दर का चोक मूँ कसी भी चिजाँ ने लेजाबा ने दिदी।

¹⁷ पछे वणा उपदेस देता तका क्यो, “परमेसर का बचना में ओ ने लिक्यो हे, ‘मारो घर हारई देसा का मनकाँ का वाते परातना करबा की जगाँ केवाई’ पण, थाँ ईंने ‘चोरा को ठाणो’ बणा दिदो हे।”

¹⁸ जदी मुक्य याजकाँ अन मूसा का नेमा ने हिकाबावाळा ओ हुण्यो, तो वींने मारबा को गेलो होदबा लागा। पण वे वाँकाऊँ दरपता हा, काँके हारई मनक वाँका उपदेसाऊँ अचम्बा में पड़ जाता हा।

¹⁹ पछे जदी दन आँतबा लागो तो ईसू अन वाँका चेला नगरऊँ बाणे निकळन पराग्या।

अंजीर का रूँकड़ाऊँ हिक

²⁰ आगले दन हवेर पेल्याँ जदी ईसू आपणाँ चेला के लारे जारिया हा, तो वणा अंजीर का रूँकड़ा ने जड़मूँ हूक्यो तको देक्यो।

²¹ जदी पतरस वीं बात ने आद करन ईसुऊँ क्यो, “हो गरुजी, थाँ देको, जीं अंजीर का रूँकड़ा ने थाँ हराप दिदो हो, वो हुकग्यो हे।”

²² ईसू वाँने जबाव दिदो, “परमेसर पे विस्वास राक।

²³ मूँ थाँने हाँची केऊँ हूँ, जदी कुई मंगरा ने ओ केवे के, ‘थूँ अटूँ उखड़न समन्द में जान पड़जा’ अन वींका मन में कस्यो भेंम ने वे अन परमेसर पे विस्वास राके, तो जस्यान वो केवे वस्यानीस वे जाई अन वींका वाते वस्योई वे जाई।

²⁴ ईं वाते मूँ थाँने केऊँ हूँ, थाँकाणी परातना में ज्यो भी माँगो, विस्वास करो के, वो थाँने मलग्यो। तो थें ज्यो माँगो वो थाँने मल जाई।

²⁵ अन जदी थाँकाणी परातना करबा ने ऊबा वेवो, तो कणी थाँको बुरो किदो वे, तो वींने माप कर दो। जींऊँ परमेसर ज्यो हरग में रेबावाळो थाँको बाप हे, थाँका पाप भी माप कर देई।

²⁶ अन जदी थें माप ने करो, तो ज्यो हरग में थाँको बापू हे, वो थाँने भी माप ने करी।”

ईसू का हक पे यहूदी नेता को सवाल

²⁷ एक दाण पाच्छा वीं यरूसलेम आया। ईसू जदी मन्दर का चोक में फररिया हा, तो खास याजकाँ, मूसा का नेमा ने हिकाबावाळा अन दाना यहूदी नेता हारई वाँका नके आया।

²⁸ अन पूँछ्यो, “थने ओ काम करबा को कई हक हे? ओ हक थने कूण दिदो?”

²⁹ पछे ईसू वाँने क्यो, “मूँ थाँने एक बात पूँछू हूँ, जदी थाँकाणी मने जबाव दे देवो, तो मूँ भी थाँने बता देऊँ के, मूँ ओ काम किंका हकऊँ कररियो हूँ।

³⁰ मने जबाव दो, ज्यो बतिस्मो यहुन्नो देतो हो, वो हक वींने कटूँ मल्यो परमेसरऊँ कन मनकाऊँ?”

³¹ वीं एक-दूजाऊँ बात-बच्यार करबा लागा, “आपाँ कई केवाँ? जदी आपीं ओ केवाँ के, ‘ओ हक वींने परमेसरऊँ मल्यो हे’, तो पछे वो केई, ‘थाँकाणी यहुन्ना पे विस्वास काँ ने किदो?’

³² पण, जदी आपाँ अस्यान केवाँ, ‘वो मनकऊँ मल्यो हो’, तो लोग-बाग आपाँ पे रिस्याँ बेळी।” वीं लोगाऊँ घणा दरपता हा, काँके हारई जणा ओ मानता हा के, यहुन्नो सई में एक परमेसर का आड़ीऊँ बोलबावाळो हो।

³³ ईं वाते वाँकाणी ईसू ने जबाव दिदो, “में ने जाणा।” ईं बात पे ईसू वाँने क्यो, “तो पछे मूँ भी थाँने आ ने बतऊँ के, मूँ ओ हारोई काम किंका हकऊँ करूँ हूँ।”