मत्ती 27 - नुवो नेम (मेवड़ी नया नियम)

ईसू की पिलातुस का हामे पेसी

¹ जद्याँ भाग-फाट्याँ वीं हारई मुक्य याजकाँ अन दाना नेता ईसू ने मार नाकबा को बच्यार किदो।

² वाँकाणी ईसू ने बाँदन लेजान पिलातुस हाकम ने हूँप दिदो।

यहूदा को मरणो

³ जद्याँ ईसू ने धोकाऊँ पकड़ाबावाळे यहूदो देक्यो के, ईसू दोसी ठेरायो ग्यो हे, तो वो पछतायो अन तीस चाँदी का सिक्का मुक्य याजकाँ अन दाना नेता का नके पाच्छा लेग्यो।

⁴ अन क्यो, “में बना दोस का मनक ने मारबा का वाते पकड़ान पाप किदो!” तो वाँकाणी क्यो, “माँने कई? थूँ थारी जाणे।”

⁵ तद्याँ वो वणा सिक्का ने मन्दर में फेंकन परोग्यो अन जान आपणाँ खुद के फाँसी लगा दिदी।

⁶ मुक्य याजकाँ वणा सिक्का ने लेन क्यो, “आने मन्दर का भण्डार में राकणा हव कोयने, काँके ओ लुई को मोल हे।”

⁷ ईं वाते होच-बच्यार करन वणा सिक्काऊँ बारवास्याँ ने गाड़बा का वाते कुमार को खेत मोल ले लिदो।

⁸ ईं वाते वो खेत आज तईं “लुई को खेत” बाजे हे।

⁹ तद्याँ ज्यो बचन परमेसर का आड़ीऊँ बोलबावाळे यरमिया क्यो हो वो पूरो व्यो के, “वणा चाँदी का तीस सिक्का लिदा, अन ईं वीं सिक्का हा, ज्याँने इजराएल का मनकाँ वींका मोल में देबा का वाते ते किदा हा।

¹⁰ अन जस्यान परबू मने हुकम दिदो हो वस्यानीस वणा वाँ सिक्काऊँ कुमार को खेत मोल ले दिदो।”

पिलातुस को ईसुऊँ सवाल

¹¹ जद्याँ ईसू हाकम पिलातुस का हामे ऊबा हा, तो हाकम वाँकाऊँ पूँछ्यो, “कई थूँ यहूदियाँ को राजो हे।” ईसू वींने क्यो, “थूँ खुदई केरियो हे।”

¹² जद्याँ मुक्य याजकाँ अन दाना नेता वींपे दोस लगारिया हाँ, तो वणी कई जवाब ने दिदो।

¹³ ईंपे पिलातुस वींने क्यो, “कई थूँ ने हुणरियो हे के, ईं थाँरा विरोद में कतरी गवायाँ देरिया हे?”

¹⁴ पण ईसू वाँने एक भी जवाब ने दिदो, अणीऊँ हाकम पिलातुस ने भी घणो अचम्बो व्यो।

ईसू ने मोत की सजा

¹⁵ हाकम पिलातुस को फसे का तेवार पे आ रीत ही के, लोगाँ का वाते कणी एक ने जेळ मेंऊँ जिंने वीं छाता हाँ, छोड़ देतो हो।

¹⁶ वीं टेम वाँका वटे बरब्बा नाम को एक नामी मनक जेळ में हो।

¹⁷ ईं वाते जद्याँ मनक भेळा व्या, तो पिलातुस वाँने क्यो, “थाँ कई छावो हो के, मूँ थाँका वाते किंने छोड़ दूँ? बरब्बा ने कन ईसू ने ज्यो मसी बाजे हे?”

¹⁸ काँके वो जाणतो हो के, वणा ईसू ने रिस्याँ बळता तका पकड़वायो हे।

¹⁹ जद्याँ पिलातुस न्याव की गाद्दी पे बिराज्यो तको हो तो वाँकी लुगई वींने ओ हमच्यार खन्दायो, “थूँ वणी धरमी मनक का मामला में भेळा मती रेज्ये। काँके में आज हपना में वाँका वाते घणो दुक जेल्यो हे।”

²⁰ मुक्य याजकाँ अन दाना नेता लोगाँ ने हिकावा लागा के, वीं बरब्बा ने मांगे, अन ईसू ने मरबा देवे।

²¹ हाकम पिलातुस वाँने पूँछ्यो, “अणा दुयाँ मूँ किंने छावो हो के, मूँ थाँका वाते छोड़ दूँ?” वाँकाणी क्यो, “बरब्बा ने।”

²² हाकम पिलातुस वाँने पूँछ्यो, “पछे ईसू ने, ज्यो मसी बाजे हे, वींको कई करूँ?” हारई वाँने क्यो, “वींने हूळी पे चढा दो!”

²³ हाकम पिलातुस वाँने पूँछ्यो, “काँ, वणी कई खोटो काम किदो हे?” पण वीं ओरी हाका-हूक करन केबा लागा, “वींने हूळी पे चढा दो।”

²⁴ जद्याँ पिलातुस देक्यो के, कई फायदो कोयने पण ईंका हामे ओरी हाका-हूक वेबा लागी हे, तो वाँकाणी हतेळी में पाणी लेन भीड़ का हामे आपणाँ हात धोया अन क्यो, “मूँ ईं धरमी का लुईऊँ बना दोस को हूँ, थाँईस जाणो।”

²⁵ हाराई लोगाँ जवाब दिदो, “ईंकी मोत की जवाबदारी माँ अन माकाँ छोरा-छोरी लेवा हा।”

²⁶ ईंपे वणी बरब्बा ने वाँका वाँते छोड़ दिदो, अन ईसू के कोड़ा लगान हूळी पे चढाबा वाते हूँप दिदो।

ईसू की रोळ करणी

²⁷ तद्याँ हाकम पिलातुस का सपायाँ ईसू ने किला में लेग्या अन हारी फोज वाँका च्यारूँमेर भेळी वेगी।

²⁸ अन वणा वाँका गाबा उतारन वाँने दरबारी गाबा पेराया।

²⁹ अन काँटा को मुकट गूँतन वाँका माता पे मेल्यो, अन वाँका जीमणा हात में कामड़ी दिदी अन वाँका आगे जुकन वाँकी रोळ करन क्यो, “हो यहूदियाँ का राजा, अमर रेवे!”

³⁰ अन वींपे थूँक्यो अन वाईस कामड़ी लेन वाँका माता पे ठोकबा लागा।

³¹ जदी वणा वाँकी रोळ करन, वींका दरबारी गाबा उतार्या अन वींने आपणाँ खुद का गाबा पेरा दिदा अन पछे वींने हूळी पे चड़ाबा ने लेग्या।

ईसू ने हूळी पे चढाणा

³² बारणे जाती दाण वाँने समोन नाम को एक कुरेन को रेबावाळो मनक मल्यो वणा वींने पकड़्यो अन जोर नाक्यो के, वो ईसू की हूळी उठान चाले।

³³ पछे वीं वणी जगाँ पे ज्यो गलगता ईंको मतलब कपाळ की जगाँ बाजे हे वटे पोछ्याँ,

³⁴ तो वणा ईसू ने कड़वी चीज मलायो तको अंगूरा को रस पिबा का वाते दिदो, पण वणा वींने छाकन पिणो ने छायो।

³⁵ तद्याँ वाँकाणी ईसू ने हूळी पे चढा दिदो अन गोट्याँ नाकन वाँका गाबा बाँट लिदा।

³⁶ अन वटे बेटन पेरो देबा लागा।

³⁷ अन वींकी सजा की पाटी वाँका माता पे लगाई के, “ओ यहूदियाँ को राजा ईसू हे।”

³⁸ तद्याँ ईसू का हाते दो चोर ने एक जींमणी पाल्ड़े अन दूजाने डावी पाल्डे, हूळ्याँ पे चड़ाया ग्या।

³⁹ गेला में आबाजाबा वाळा मातो ठणकान वींकी नन्दयाँ कररिया हा,

⁴⁰ अन ओ केरिया हाँ, “ए मन्दर ने हल्ड़ाबावाळा अन तीन दन में बणाबावाळा, आपणाँ खुद ने तो बंचा ले। यद्याँ थूँ परमेसर को पूत हे, तो हूळीऊँ रेटे उतर आ।”

⁴¹ ईं तरियाँ मुक्य याजकाँ अन मूसा का नेमा ने हिकाबावाळा अन दाना नेता हाते मलन रोळ कर-करन केरिया हाँ,

⁴² “अणी ओरा ने बंचाया, पण आपणाँ खुद ने ने बंचा सके। ओ तो इजराएल को राजा हे, अबे हूळीऊँ उतरन आवे तो आपाँ ईंपे विस्वास करा।

⁴³ अणी परमेसर पे विस्वास राक्यो हे यद्याँ वो ईंने छावे हे, तो अबे ईंने बंचा ले, काँके अणी क्यो हो के, ‘मूँ परमेसर को पूत हूँ।’ ”

⁴⁴ ईं तरिया चोर भी ज्यो वाँका हाते हूळ्याँ पे चड़ाया ग्या हा, वींकी नन्दया कररिया हाँ।

ईसू की मोत

⁴⁵ दपराँ का बारा बज्याँ लेन तीन बज्या तईं वीं हारा देस में अन्दारो रियो।

⁴⁶ तीन बजाँ का भड़े ईसू कल्ड़ी हाका-भार मेलन क्यो, “एली, एली, लमा सबकतानी?” ईंको मतलब “हो मारा परमेसर, हो मारा परमेसर थाँ मने काँ छोड़ दिदो?”

⁴⁷ ज्यो वटे ऊबा हाँ, वणा मूँ कतराई ओ हुणन क्यो, “वो तो एलिया ने बलारियो हे।”

⁴⁸ वाँका मूँ एक तरत दोड्यो, अन रुँई का फूबाँ ने खाटा अंगूरा का रस में डबोक्यो अन लाकड़ी पे मेलन वींने सुकायो।

⁴⁹ पण दूजाँ क्यो, “ठम जावो, देको एलियो, ईंने बंचाबा आवे हे के ने।”

⁵⁰ तद्याँ ईसू ज्योरऊँ हाका-भार करन जीव छोड़ दिदो।

⁵¹ अन वणीस दाण मन्दर को परदो ऊपरेऊँ हेठे तई फाटन दो टुका वेग्यो। धरती हालगी अन छाँटा फाटगी।

⁵² अन अटा तईं कबराँ खुलगी, अन मरिया तका पुवितर मनकाँ मेंऊँ नरई पाच्छा जीवता वेग्या।

⁵³ अन वीं करबा मेंऊँ निकळ आया अन ईसू के पाच्छा जी उठबा केड़े पुवितर नगर यरूसलेम में ग्या अन नरई ने दिकई दिदा।

⁵⁴ तद्याँ रोमी सेनापती अन ज्यो वींका हाते ईसू के पेरो देरियो हाँ, भूकम अन ज्यो कई व्यो हो, वींने देकन घणा दरपग्या अन क्यो, “हाँचई में ओ परमेसर को पूत हो।”

⁵⁵ वटे नरई लगाया ज्यो गलीलऊँ ईसू की सेवा-चाकरी करती तकी वाँका हाते आई ही, वीं छेटीऊँ ओ देकरी ही।

⁵⁶ वाँका मूँ मरियम मगदलीनी, अन याकूब अन योसेस की माँ मरियम, अन जबदी का छोरा की बई ही।

ईसू ने गाडणा

⁵⁷ जद्याँ हाँज वीं तो युसुप नाम को अरमतिया को एक रिप्यावाळो मनक आयो, वो खुदई ईसू को चेलो हो।

⁵⁸ वो पिलातुस का नके जान ईसू की लास मांगी। ईंपे पिलातुस हुकम दे दिदो के, लास ईंने दे दिदी जावे।

⁵⁹ युसुप लास लिदी अन वींने नवा धोळो पसेवड़ा में लपेटी,

⁶⁰ अन वाँने आपणी नुई कबर में मेली, ज्यो वणी मोटी छाट में बणई ही, अन कबर का बाणा पे मोटो भाटो आड़ो देन परोग्यो।

⁶¹ मरियम मगदलीनी अन दूजी मरियम वटे कबर का हामे बेटी ही।

ईसू की कबर की रुकाळी

⁶² दूजे दन ज्यो त्यारी का दन का केड़े को दन हो, मुक्य याजकाँ अन फरीसी पिलातुस का नके भेळा वेन क्यो,

⁶³ “हो माराज, माने आद हे के, वो भटकबावाळो जद्याँ वो जीवतो हो, तो वणी क्यो हो के, ‘मूँ तीन दनाँ केड़े पाछो जी उटूँ।’

⁶⁴ ईं वाते हुकम दो के, तीजा दन तईं कबर की रुकाळी करी जावे, अस्या ने वे के, वाँका चेला आन वींने चुरा लेजा अन लोगाऊँ केबा लागा के, ‘वो मरिया तका मेंऊँ जी उट्यो हे। तद्याँ यो धोको पेल्या का धोकाऊँ भी मोटो वेई।’ ”

⁶⁵ पिलातुस वाँने क्यो, “थाँ पेरा का वाते रुकाळ्या ले जावो अन आपणी हमज का जस्यान रुकाळी करो।”

⁶⁶ तद्याँ वीं रुकाळ्या ने हाते लेन पराग्या। अन भाटा पे मोर लगान कबर की रुकाळी किदी।