मत्ती 20 - नुवो नेम (मेवड़ी नया नियम)

अंगूरा का बाग का दानक्याँ की केणी

¹ हरग को राज एक जमींदार का जस्यान हे, ज्यो भाग-फाट्याँ निकळ्यो के, अंगूर का बाग का वाते दानक्याँ लावे।

² वणी दानक्याँ ने एक चाँदी का सिक्का की दानकी पे आपणी बाग में काम करबा का वाते खन्दाया।

³ “पछे रोटा बणाबा की टेम में एक दूजाँ मनक ने बजार में फालतू ऊबा तको देक्यो।

⁴ अन वणीऊँ क्यो, ‘थूँ भी मारा बाग में जा अन ज्यो कई थने हव लागी, थने देऊँ।’ अस्यान वो भी परोग्यो।

⁵ पछे वणी दपराँ में अन तीजा पेर का लगे-भगे जान जान वस्यानीस किदो।

⁶ एक घड़ी दन रेता वो पाछो जान कणी दूजाँ ने बजार में ऊबा तका देक्या, तो वणी वाँकाऊँ क्यो, ‘कई थाँ अटे पूरा दन यूँई ऊबा रिया?’”

⁷ वाँकाणी वींने क्यो, “ईं वाते ऊबा हाँ के, ‘कणी माने दानकी पे ने लगाया।’ वणी वाँने क्यो, थाँ भी बाग में जावो।”

⁸ “हाँज पड़्या अंगूरा का बाग के मालिक आपणाँ मुनीमऊँ क्यो, ‘दानक्याँ ने बलान पालाऊँ लेन आगे का हाराई ने दानकी दिदे।’

⁹ जद्याँ वीं आया ज्यो घड़ीभर दन रेग्यो हो, वीं दाण दानकी पे लगाया ग्या हाँ, वाँने एक चाँदी को सिक्को मल्यो।

¹⁰ ज्यो पेल्या आया वाँकाणी ओ हमज्या के, माने अणाऊँ नरोई मेली, पण वाँने भी एक चाँदी सिक्को मल्यो।

¹¹ जद्याँ दानकी मली, तो वीं जमींदार पे गुस्सो करता केबा लगा,

¹² ‘ईं पाच्छे आबावाळा तो एक घड़ी काम किदो, अन थाँ वाँने माकाँ जस्यानीस बणा दिदा, पण माँ तो दन भर बोज तोक्यो अन तावड़ा में तपयाँ।’

¹³ जमींदार वाँका मूँ एक ने क्यो, ‘हे भई, मूँ थाँकाऊँ कुई बुरो ने कररियो हूँ। कई आपाँ एक चाँदी का सिक्को देबा को ते ने किदो हो?

¹⁴ ज्यो थारो हे, ले अन परोजा। मारी मरजी या हे के, जतरी दानकी थने दूँ अतरीईस पछे आबावाळा ने भी दूँ।

¹⁵ कई ओ हव ने के, मूँ आपणाँ मालऊँ ज्यो छावूँ वो करूँ? कई मारो दयाळू वेबा का मस थूँ रिस्याँ बळे हे?’”

¹⁶ तो पछे ईसू वाँने क्यो, “ईं तरियाँ जीं पाच्छे हे, वीं पेलो वेई, अन जीं पेला हे, वीं पाच्छे वेई।”

आपणी मोत का बारा में ईसू को तीजी दाण केणो

¹⁷ ईसू यरूसलेम जाती दाण बाराई थरप्या तका चेला ने हून्नी जगाँ में लेग्यो अन गेला में वाँकाऊँ केबा लागो,

¹⁸ “देको, आपीं यरूसलेम जारिया हाँ अन मनक को पूत मुक्य याजकाँ अन नेमा ने हिकाबावाळा का हाताऊँ पकड़्यो जाई, अन वीं वींने मारबा का वाते ठेराई।

¹⁹ अन वींने ज्यो यहूदी ने हा वाँका हाताँ में हूँपी के, वीं वींकी रोळ करी, वीं वींके कोड़ा मारी अन हूळी पे चड़ाई, अन वो तीजे दन जिवायो जाई।”

एक माँ की हाता-जोड़ी

²⁰ जद्याँ जब्दी का छोरा की बई आपणाँ छोरा का हाते ईसू का नके आन हाता-जोड़ी किदी के, वींऊँ कई माँगबा लागी।

²¹ ईसू वींने पूँछ्यो, “थूँ कई छावे हे?” वाँ बोली, “ओ बचन दे के, ईं दो छोरा थाँका राज में एक थारे जीमणा पाल्ड़े अन एक थाँके डावा पाल्ड़े बेटे।”

²² ईसू वींने जवाब दिदो, “थें ओ ने जाणो हो के, कई माँगरिया हो। ज्यो दुक को प्यालो मूँ पिबा में हूँ, कई थें पीं सको हो?” वाँकाणी वाँने क्यो, “हा, पीं सका हा।”

²³ ईसू वाँने क्यो, “थें मारो प्यालो पींवो, पण मारी जीमणा पाल्ड़े अन डावा पाल्ड़े किंने बेटाबा को मारो काम कोयने, पण ज्याँका वाते मारा बाप की ओरुँ त्यार किदो ग्यो हे, वाँका वाते हे।”

²⁴ ओ हुणन ईसू का दस चेला वीं दुई भायाँ पे गुस्सा में वेग्या।

²⁵ ईसू वाँने नके बलान क्यो, “थाँ जाणो हो के, ज्यो यहूदी ने हे वीं हाकम आपणाँ मनकाँ पे हक राके हे। मोटा मनक फोरा मनकाँ ने आपणाँ हक को गलत रूपऊँ काम में लेवे हे।

²⁶ पण थाँका बचमें अस्यो ने वेई। पण ज्यो कुई थाँकामूँ मोटो वेणो छावे, वो थाँको नोकर-चाकर वणे।

²⁷ अन ज्यो थाँकामें सबाऊँ मुक्यो बणबो छावे, वो हाराई को हाळी बणे।

²⁸ जस्यान के मनक को पूत ईं वाते ने आयो के, वींकी सेवा-चाकरी किदी जावे पण ईं वाते आयो के, नरई ने छुड़ाबा का वाते आपणी जीव देवे।”

ईसू दो आंदा ने देकता किदा

²⁹ जद्याँ वीं यरीहो नगरऊँ जारिया हाँ, तो एक मोटी टोळी वाँका पाच्छे आबा लागी।

³⁰ अन दो आन्दा, ज्यो गेला का कनारा पे बेटा हाँ, ओ हामळन के, ईसू जारिया हे, तो हाका-भार मेलन केबा लागो, “हो परबू, दाऊद का वस, माकाँ पे दया कर।”

³¹ लोग-बाग वाँने तापड़ता तका क्यो, छाना रेवो, पण वीं ओरू भी ज्योराऊँ हाका-भार करन केबा लागा, “ओ दाऊद का वंस, माँकापे दया कर।”

³² तद्याँ ईसू ऊबो रेन वाँकाऊँ क्यो, वाँने बलाया अन क्यो, “थें कई छावो हो के, मूँ थाँका वाते कई करूँ?”

³³ वाँकाणी वाँने क्यो “ओ परबू, ओ करो के, माँ देकबा लाग जावा।”

³⁴ ईसू ने वाँका पे दया अई अन वाँकी आक्याँ पे हात अड़ायो। वीं तरत देकबा लागा अन ईसू का पाच्छे चालबा लागा।