मत्ती 11 - नुवो नेम (मेवड़ी नया नियम)

बतिस्मा देबावाळो यहुन्नो अन ईसू

¹ जद्याँ ईसू आपणाँ बाराई थरप्या तका चेला ने आदेस दे दिदा, ईंका केड़े वीं नगराँ में उपदेस अन परच्यार करबा वटूऊँ पराग्या।

² बतिस्मो देबावाळो यहुन्ने जेळ में मसी का कामाँ को हमच्यार हामळन आपणाँ चेला ने वाँकाऊँ ओ पूँछबा खन्दायो के,

³ “कई ज्यो आबावाळो हो वो थूँईस हे कन माँ कणी दूजाँ की वाट नाळा?”

⁴ ईसू वाँने क्यो, “ज्यो कई थाँकाणी हुणो हो अन देको हो, वो हाराई जान यहुन्नाऊँ के दिज्यो के,

⁵ आन्दा पाच्छा देकबा लागा हे अन लंगड़ा चालबा-फरबा लागा हे, कोड़्या को कोड़ हव वेरियो हे अन बेरा हुणरिया हे अन मरिया तका जीवता वेरिया हा। अन दकी अन गरीब मनकाँ ने हव हमच्यार हुणायो जारियो हे।

⁶ वीं मनक धन्न हे, ज्याँने मने मानबा में कई सक ने हे।”

⁷ जद्याँ यहुन्ना का चेला वटेऊँ जाबा लागा हा, तो ईसू यहुन्ना का बारा में लोग-बागाऊँ केबा लागो, “थाँ हुन्ना कांकड़ में कई देकबा ग्या हाँ? कई हवा में हालता आकण्डा ने?

⁸ तो पछे कई देकबा ने ग्या, कई मेंगा गाबा पेरिया तका मनक ने? देको, ज्यो मेंगा गाबा पेरे हे, वीं मेलाँ में रेवे हे।

⁹ तो थाँ काँ ग्या? कई कणी परमेसर का आड़ीऊँ बोलबावाळा ने देकबाने? हाँ, मूँ थाँकाऊँ कूँ हूँ के, जिंने थाँ देक्यो हे वो परमेसर का आड़ीऊँ बोलबावाळाऊँ भी मोटो हे।

¹⁰ यो वोईस हे, जिंका बारा में पुवितर सास्तर में लिक्यो हे के, “देक, मूँ आपणाँ दूत ने अदिकार का हाते थाँरा आगे खन्दाऊँ हूँ, ज्यो मनकाँ का मन ने थाँरा वाते त्यार करी।”

¹¹ “मूँ थाँकाऊँ हाँची कूँ हूँ के, जीं लगईऊँ जनम्याँ हे, वाँका मूँ यहुन्नो बतिस्मा देबावाळाऊँ कुई मोटो कोयने हे। पण हरग का राज में फोराऊँ फोरो मनक भी यहुन्नाऊँ मोटो हे।

¹² यहुन्ना बतिस्मा देबावाळा का दनाऊँ अबाणू तईं ओ संदेस परच्यार किदो ग्यो के, परमेसर का राज का लोगाँ का हाते मार-पिट किदी जावे अन मार-पिट करबावाळा वीं राज ने लेबा की कोसीस करे हे।

¹³ यहुन्ना के आबा तईं हाराई परमेसर का आड़ीऊँ बोलबावाळा अन मूसा का नेम ईं बात की आगेवाणी करे हे के, परमेसर मनकाँ का जीवन पे राज करी।

¹⁴ यद्याँ थें अणी बात पे विस्वास करो तो हुणो, यहुन्नोईस एलियो हे, ज्यो आबावाळो हो।

¹⁵ ज्याँके हुणबा का वाते कान्दड़ा हे वीं हुणलो।

¹⁶ “मूँ ईं टेम की पीड़ी का लोगाँ ने किंका बराबर गणूँ? वीं वणा बाळकाँ का जस्यान हे, ज्यो बजारा में बेटन एक-दूजाऊँ हेलो पाड़न केवे हे के,

¹⁷ ‘माँ थाँका वाते बाजो बजायो, अन थाँ ने नाच्या, माँ होक-गीत किदो, पण थाँ ने रोया।’

¹⁸ यहुन्नो दूजाँ के जस्यान ने तो खातो अन ने दाकरस पितो अन वीं मनक केवे हे के, ‘वींमें हुगली आत्मा हे।’

¹⁹ पछे मनक को पूत दूजाँ का जस्यान खातो-पितो आयो अन वीं केवे हे के देको, ‘यो खवगड़्यो अन दारुड़्यो हे, कर लेबावाळा को अन पाप्याँ को गोटी हे।’ पण परमेसर का ग्यान पे चालबावाळा आपणाँ करमाऊँ वींको ग्यान हाँचो साबत वेवे हे।”

परमेसर की बात, ने मानबावाळा नगरा ने धिकार

²⁰ तद्याँ ईसू वणा नगराँ ने धिकार देबा लागो, जणामें वणी नरई अचम्बावाळा काम किदा हा। काँके वटा का लोगाँ पाप करणो ने छोड़्यो अन ने आपणाँ मन ने वींका आड़ी फेरियो।

²¹ ईसू क्यो, “खुराजीन अन बेतसेदा नगर का लोगाँ, थाँने धिकार हे, काँके जीं परच्या बताया ग्या, यद्याँ वीं सूर अन सेदा नगर में किदा जाता, तो वटे का मनक बोरी का गाबा पेरन अन आपणाँ सरीर पे वानी लगान कदी का पापऊँ मन फेर लेता।

²² पण मूँ थाँकाऊँ केवूँ हूँ के, न्याव का दन में थाँकी दसा सूर अन सेदा की दसाऊँ भी घणी खराब वेई।

²³ अन हे कफरनूम, कई थूँ बच्यार करे हे के, थने हरग में उटायो जाई? थूँ तो पाताळ में नाक्यो जाई। जीं अचम्बा का काम थाँरा में किदा ग्या, यद्याँ सदोम में किदा जाता, तो वटा का मनक आपणाँ मना ने पापऊँ फेर लेता अन आज तईं वो नगर बस्यो तको रेतो।

²⁴ पण मूँ थाँकाणी केवूँ हूँ के, न्याव का दन थारे लोगाँ की दसा सदोम नगर का लोगाँ की दसाऊँ भी घणी खराब वेई।”

बोजऊँ दबिया तका मनकाँ ने आराम

²⁵ वीं दाण ईसू क्यो, “हो परम बापू, हरग अन धरती का परबू, मूँ थाँको धन्नेवाद करूँ हूँ के, थाँ अणा बाताँ ने ग्यानी अन स्याणाऊँ हपान राकी अन भोळा मनकाँ पे परगट किदी हे।

²⁶ अन हाँ परम बापू, यो ईं वाते व्यो, काँके थाँने योईस हव लागो।

²⁷ “मारा परम बापू मने हारोई हूँप्यो हे, परमेसर के अलावा कुई बेटा ने कोयने जाणे हे, अन ने कुई बेटा के अलावा परमेसर ने जाणे हे, पण अबे वीं मनक परमेसर ने जाणे हे जाँने बेटो बतावे हे।

²⁸ “ओ थाँक्या, माँदा अन बोजऊँ दब्या तका मनकाँ, मारा नके आवो, मूँ थाँने आराम देवूँ।

²⁹ मारो जूँड़ो आपणाँ खादा पे जोत लो अन माराऊँ हिको, काँके मूँ हुदो हूँ अन मारो मन दयाऊँ भरियो तको हे अन थाँने भी आपणाँ मन में आराम मली,

³⁰ काँके मारो जूँड़ो जोतबा में हेल अन बोज में हलको हे।”