मत्ती 1 - नुवो नेम (मेवड़ी नया नियम)

ईसू की वंसावली

¹ अबराम का बेटा, दाऊद का बेटा ईसू मसी की वंसावली को बखाण अस्यान हे,

² अबराम को बेटो इसाक, पछे इसाक को बेटो याकूब, याकूब को बेटो यहूदो हो अन वींके ओरी भी ओलाद ही।

³ यहूदा को बेटा फरिस अन ज्योरो हा अन फरिस अन ज्योरो की माँ तोमार ही। फरिस को बेटो हिस्तोन अन हिस्तोन बेटो एराम हो।

⁴ एराम को बेटो अमीनादाब हो, अमीनादाब को बेटो नसोन, नसोन को बेटो सलमोन हो।

⁵ सलमोन अन वींकी लुगई राहब को बेटो बोहाज हो अन बोहाज अन वींकी लुगई रुत को बेटो ओबेद हो अन पछे ओबेद को बेटो यिसे हो।

⁶ यिसे को बेटो राजा दाऊद हो।

⁷ दाऊद को बेटो सुलेमान, वीं लुगईऊँ जनम व्यो, ज्या लुगई पेल्या उरिया की लुगई ही।

⁸ सुलेमान को बेटो रहबाम हो, रहबाम को बेटो अबिया हो अबिया को बेटो आसा हो, आसा को बेटो यहोसापात हो अन यहोसापात को बेटो योराम हो, अन योराम को बेटो उज्जिया हो।

⁹ उज्जिया को बेटो योताम हो अन योताम को बेटो आहाज हो, आहाज को बेटो हिजक्या हो।

¹⁰ हिजक्या को बेटो मनस्सिया हो। मनस्सिया को बेटो आमोन हो अन आमोन को बेटो योस्सिया हो।

¹¹ अन इजराएलऊँ बंदी वेन बेबीलोन जाती दाण योसिया को बेटो यकुन्या व्यो अन वींके ओरी भई व्या।

¹² बंदी वेन बाबुल पोछ्याँ केड़े यकुन्या को बेटो सालतिएल व्यो अन सालतिएल को बेटो जरुब्बाबेल हो।

¹³ अन जरुब्बाबेल को बेटो अबीहुद हो, अबीहुद को बेटो इल्याकिम हो अन इल्याकिम को बेटो अज्योर हो।

¹⁴ अज्योर को बेटो सदोक हो, सदोक को बेटो अखीम हो अन अखीम को बेटो इलीहुद हो।

¹⁵ इलीहुद को बेटो एलीयाजार हो, एलीयाजार को बेटो मत्तान हो अन मत्तान को बेटो याकूब हो।

¹⁶ याकूब को बेटो युसुप हो ज्यो मरियम को धणी हो मरियमऊँ ईसू को जनम व्यो ज्यो मसी केवावे हे।

¹⁷ अस्यान अबरामऊँ दाऊद तईं चवदा पिड़ीयाँ वीं। दाऊदऊँ लेन बंदी बणान बेबीलोन ले जाया तईं चवदा पीड़ी वी। बेबीलोन पोछ्याँ केड़े ईसू मसी का जनम तईं चवदा पिड़ीयाँ वीं।

ईसू मसी को जनम

¹⁸ ईसू मसी को जनम ईं तरिया व्यो, जद्याँ वींकी माँ मरियम की हगई यसुपऊँ वेगी तो वाँके ब्याव वेबा के, पेल्याई मरियम पुवितर आत्मा की तागतऊँ गरबवती वेगी।

¹⁹ ईं वाते वींको घर–धणी युसुप ज्यो धरमी मनक हो अन वींने बदनाम ने करबो छातो हो, ईं वाते वो छानो–मानो वींने छोड़बा को बच्यार किदो।

²⁰ जद्याँ वो ईं बाताँ पे होच-बच्यार कररियो हो के, परबू को एक हरग-दुत वींने हपना में दिक्यो अन केबा लागो, “हे युसुप, दाऊद की बेटा, थूँ आपणी हगई वीं तकी मरियमऊँ ब्याव करन अटे लेन आबाऊँ मती दरप, काँके ज्यो वींका पेट में हे, वो पुवितर आत्मा का आड़ीऊँ हे।

²¹ वाँ एक छोरा ने जणी, थूँ वींको नाम ईसू राकज्ये, काँके वो आपणाँ मनकाँ ने वाँका पापाऊँ बचाई।”

²² यो हारोई ईं वाते व्यो के, ज्यो बचन परमेसर का आड़ीऊँ बोलबावाळे क्यो हो, वो पूरा वेवे के,

²³ “देको, एक कूँवारी गरबवती वेई अन एक बेटा ने जनम देई, अन वींको नाम इम्मानुएल राक्यो जई,” जिंको मतलब हे, “परमेसर आपणी हाते हे।”

²⁴ तद्याँ युसुप नींदऊँ जाग्यो अन वणी वस्यानीस किदो जस्यान परमेसर का हरग-दुत क्यो हो। वो मरियमऊँ ब्याव करन आपणाँ घरे लायो।

²⁵ अन जतरे वणी पूत ने जण्यो, वतरे वो वींका नके ने ग्यो। वणी आपणाँ बेटा को नाम ईसू राक्यो।