लूका 3 - नुवो नेम (मेवड़ी नया नियम)

बतिस्मो देबावाळा यहुन्ना को परच्यार

¹ दरबार केसर तिबिरियस का राज को पन्दरवा वर में पुन्तियुस पिलातुस यहूदा परदेस को राजपाल हो। हेरोदेस गलील परदेस को हाकम हो। अन वींको भई फिलिपुस इतुरिया अन त्रखोनितिस परदेस को हाकम हो अन लिसानियास अबिलेने परदेस को हाकम हो।

² अन हन्ना अन केफा मोटो याजक हा, वणी टेम परमेसर को बचन हुन्ना काँकड़ में जकरय्या का बेटा यहुन्ना का नके पूग्यो।

³ तद्याँ यहुन्नो यरदन नंदी का अड़े-भड़े का नगराँ में ग्यो अन परच्यार करबा लागो के, “पापऊँ मन फेरो अन बतिस्मो लो जणीऊँ परमेसर थाँका पाप माप करी।”

⁴ जस्यान के, परमेसर का आड़ीऊँ बोलबावाळा यसाया की किताब में लिक्यो हे के, “हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो

⁵ हरेक घाट्याँ ने भर दिदी जाई अन हाराई मंगरा-मंगरिया ने हिदा कर दिदा जाई। जीं वाँका हे, वी हूँदा अन ज्यो उबड़-खाबड़ हे, वीं हम्मा किदा जाई।

⁶ अन हाराई मनक परमेसर की मुगती ने देकी।’”

⁷ ज्या मनकाँ की भीड़ यहुन्ना का नके बतिस्मो लेबा ने अई वाँकाऊँ वणी क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो?

⁸ थाँको वेवार अस्यो वेणो छावे के, थाँ मन फेर लिदो हे। थाँ आपणाँ-आपणाँ मना में यो मती होचो के, ‘आपीं अबराम का बंस का हा।’ मूँ थाँकाऊँ केऊँ हूँ के, परमेसर अणा भाटाऊँ अबराम का वाते ओलाद जण सके हे।

⁹ अबे रूँकड़ा की जड़ा काटबा का वाते कराड़ो मेल्यो ग्यो हे। जीं रूँकड़ा हव फळ ने देई वाँने काट्या जाई अन वादी में नाक दिदो जाई।”

¹⁰ जद्याँ लोगाँ वणीऊँ पूँछ्यो के, “अबे माँने कई करणो छावे?”

¹¹ यहुन्ने वणाऊँ क्यो, “जिंका नके दो कुरता हे एक जिंका नके ने हे, वींने दे देवे अन जिंका नके खाणो हे वीं भी अस्यानीस करे।”

¹² लगान लेबावाळा भी वींका नके बतिस्मा लेबा आया। वणा यहुन्नाऊँ क्यो, “हो गरुजी, माँ कई कराँ?”

¹³ यहुन्ने वणाऊँ क्यो, “ते किदा तकाऊँ लगानऊँ हेलो मती लेज्यो।”

¹⁴ कुई अदिकारियाँ यहुन्नाऊँ क्यो, “माँ कई करा?” यहुन्ने वणाऊँ क्यो, “किंका नकेऊँ भी ज्योर-जुलमऊँ रिप्या मती लो। अन नेई किंपे जूटो आरोप लगावो। थाँ आपणी तनकाऊँ सन्तोक राको।”

¹⁵ मनक मसी के आबा की वाट नाळरिया हा अन यहुन्ना का बारा में होचबा लागा के, “कटे योईस तो मसी ने हे।”

¹⁶ यहुन्ने वणाऊँ क्यो, “मूँ तो थाँने पाणीऊँ बतिस्मा देरियो हूँ। पण, ज्यो आबावाळो हे, वो माराऊँ घणो ज्योरावर हे। मूँ वींके अतरोक लायक भी ने हूँ के, वींकी पंगरख्या ने खोल सकूँ। वी पुवितर आत्मा अन वादीऊँ थाँने बतिस्मो देई।

¹⁷ वींको छाणो वींका हाताँ में हे अन वो आपणाँ खळा ने हव तरियाऊँ साप करी। वो धान ने बकारी में नाकी पण, डन्कळ्याँने कदी ने बजबा वाळी वादी में बाळ देई।”

¹⁸ अस्यान वो नरी तरियाऊँ वणा मनकाँ ने हमजान हव हमच्यार हूणातो हो।

¹⁹ हेरोदेस आपणाँ भई की लुगई हेरोदियासऊँ ब्याव कर लिदो अन ईंके अलावा नरई बुरो काम किदा। ईं वाते यहुन्ने वींने तापड़्यो,

²⁰ तो हेरोदेस वणाऊँ भी हेलो बुरो काम किदो के, यहुन्ना ने पकड़न जेळ में नाक दिदो।

ईसू को बतिस्मो

²¹ अणीऊँ पेल्याँ जद्याँ हाराई मनक यहुन्नाऊँ बतिस्मा लेरिया हा। तद्याँ ईसू भी बतिस्मो लिदो। जद्याँ ईसू परातना कररिया हा, तद्याँ आकास खुलग्यो।

²² अन पुवितर आत्मा परेवड़ा का जस्यान रूप में आन वाँका ऊपरे उतरी। अन आकासवाणी वींके, “थूँ मारो लाड़लो पूत हे, मूँ थाँराऊँ घणो राजी हूँ।”

ईसू को खानदान

²³ जद्याँ ईसू खुद की सेवा सरू किदी तद्याँ वीं तीस वर का हा। अन मनक अस्यान होचता के, वो युसुप को बेटो हे। युसुप एली को बेटा हे।

²⁴ अन एली ज्यो मतात को, मतात ज्यो लेवी को, लेवी मलकी को, मलकी यन्ना को, यन्ना युसुप को,

²⁵ युसुप मतियाह को, मतियाह आमोस को, आमोस नहूँम को, नहूँम असल्याह को, असल्याह नोगह को,

²⁶ नोगह मात को, मात मतियाह को, मतियाह सिमी को, सिमी योसेख को, योसेख योदाह को,

²⁷ योदाह योनान को, योनान रेसा को, रेसा जरुब्बाबेल को, जरुब्बाबेल सलतियेल को, सलतियेल नेरी को,

²⁸ नेरी मलकी को, मलकी अद्दी को, अद्दी कोसाम को, कोसाम इलमोदाम को, इलमोदाम एर को,

²⁹ एर यहोसु को, यहोसु एलीएजर को, एलीएजर योरिम को, योरिम मतात को, मतात लेवी को।

³⁰ लेवी समोन को, समोन यहूदा को, यहूदा युसुप को, युसुप योनान को, योनान एल्याकिम को।

³¹ एल्याकिम मलेयाह को, मलेयाह मिन्ना को, मिन्ना मतात को, मतात नातान को, नातान दाऊद को।

³² दाऊद यिसे को, यिसे ओबेद को, ओबेद बोअज को, बोअज सलमोन को, सलमोन नहसोन को,

³³ नहसोन अमीनादाब को, अमीनादाब आदमीन को, आदमीन अरनी को, अरनी हेस्रोन को, हेस्रोन फिरिस को, फिरिस यहूदा को,

³⁴ यहूदा याकूब को, याकूब इसाक को, इसाक अबराम को, अबराम तेरह को, तेरह नहोर को,

³⁵ नहोर सरेग को, सरेग रऊ को, रऊ फिलिग को, फिलिग एबेर को, एबेर सिलह को।

³⁶ सिलह केनान को, केनान अर्पग्यत को, अर्पग्यत सेम को, सेम नूह को, नूह लामेक को,

³⁷ लामेक मथूसलेह को, मथूसलेह हनोक को, हनोक येरेद को, येरेद मेहललेह को, मेहललेह केनान को,

³⁸ केनान एनोस को, एनोस सेत को, सेत आदम को अन आदम जिंने परमेसर रच्यो हो।