यहुन्ना 8 - नुवो नेम (मेवड़ी नया नियम)

कुकरम में पकड़ाणी तकी लुगई ने मापी

¹ पछे ईसू जेतुन का मंगरा पे पराग्या।

² अन आगले दन भाग-फाट्याँ पाच्छा मन्दर की चोकी में आया अन हारई लोग-बाग वाँका नके आया जद्याँ वीं बेटन वाँने हिकबा लागा।

³ तद्याँ नेमा ने हिकाबावाळा अन फरीसी लोग कुकरम में पकड़ाणी तकी एक लुगई ने वटे लाया अन वींने हाराई का बचमें ऊबी कर दिदी।

⁴ अन वणा ईसुऊँ क्यो, “हो गरुजी, या लुगई कुकरम करती तकी पकड़ागी हे।

⁵ मूसा का नेम माने आग्या देवे हे के, अस्यी लुगई ने भाटा ठोकन मार देणी छावे। तो ईं वाते थूँ अणी बारा में कई केवे हे?”

⁶ वाँकाणी ईसू की जाँच-परक का वाते या बात किदी, काँके वाँने वींपे दोस लगाबा का वाते कई बात मल जावे। पण ईसू पगा पे बेटन धुळा में आँगळीऊँ कई लिकबा लागो।

⁷ जद्याँ वीं वाँकाऊँ पूँछता रिया, तो वो हुदो ऊबो वेन वाँकाऊँ क्यो, “थाँका मेंऊँ कणी पाप ने किदो वे, वो पेल्याँ ईंके भाटा की ठोको।”

⁸ अन ईसू पाच्छा पगा पे बेटन धुळा में आँगळीऊँ लिकबा लागा।

⁹ तद्याँ या बात हुणन हाराई मनक एक-एक करन पराग्या अन हाराऊँ पेल्याँ भूण्डा मनक ग्या अन आकरी में वटे लुगई अन ईसूइस बच्या।

¹⁰ पसे ईसू हुदा ऊबा वेन वणीऊँ पूँछ्यो, “वीं हारई कटे ग्या? कई कुई भी थने सजा देबा का वाते ने रक्यो?”

¹¹ वणी लुगई वाँकाऊँ क्यो, “हो मालिक कुई ने बच्यो।” तो ईसू वींने क्यो, “मूँ भी थने सजा ने देवूँ हूँ। जा अन अबे पाप मती करज्ये।”

दनियाँ को उजाळो ईसू

¹² तद्याँ ईसू फरीसियाऊँ पाछो क्यो, “दनियाँ को उजितो मूँ हूँ, ज्यो मारा नके आई, वीं अंदारा में ने चाली, पण जीवन को उजितो पाई।”

¹³ फरीसी वाँकाऊँ क्यो, “थूँ आपणी गवई खुद देवे हे। ईं वाते थाँरी गवई मानबा जोगी हे।”

¹⁴ ईसू वाँने क्यो, “मूँ मारी गवई पलई देवूँ, पछे भी मारी गवई मानबा जोगी हे, काँके मूँ जाणूँ हूँ के, मूँ कटाऊँ आयो हूँ अन कटे जाऊँ। पण थाँ ने जाणो हो के, मूँ कटाऊँ आयो हूँ अन कटे जाऊँ।

¹⁵ थाँ मनकाँ का नेमा ने देकन न्याव करो हो, पण मूँ किंकोई न्याव ने करूँ हूँ।

¹⁶ अन यद्याँ मूँ न्याव करूँ, तो मारो न्याव हाँचो हे। काँके ईंमें मूँ एकलो ने हूँ, पण मारा हाते मने खन्दाबावाळा परमेसर भी हे।

¹⁷ अन जस्यान थाँका नेमा में भी लिक्यो हे के, ‘यद्याँ दो जणा एक जस्यी गवई देवे, तो वाँ हाँची हे।’

¹⁸ एक तो मूँ खुद, खुद की गवई देवूँ हूँ, अन दूँजा मारा बापू मारी गवई देवे हे जणी मने खन्दायो हे।”

¹⁹ ईंपे वणा वींकाऊँ पूँछ्यो, “थाँरा बापू कटे हे?” ईसू जवाब दिदो, “ने थाँ मने ओळको हो, नेई मारा बापू ने। यद्याँ मने जाणता तो मारा बापू ने भी ओळकता।”

²⁰ ईं बाताँ वणी मन्दर के दान-पेटी का भड़े हिक देती दाण क्यो अन कणी भी वींने ने पकड़्यो, काँके वींको टेम आलतरे ने आयो हो।

विस्वास ने करबावाळा ने चेतावणी

²¹ ईसू पाछो एक दाण ओरी वाँने क्यो, “मूँ परो जाऊँ अन थाँ मने होदो, पण थाँ खुद का पाप मेंईस मरोगा। जटे मूँ जारियो हूँ, वटे थाँ ने आ सको।”

²² ईं वाते यहूदी अदिकारी केबा लागा, “कई वो आपणाँ खुद ने मारबावाळो हे, काँके वो केवे हे के, ‘जटे मूँ जाऊँ, वटे थाँ ने आ सको’?”

²³ ईंपे ईसू वाँने क्यो, “थाँ ईं धरती का हो पण मूँ ने हूँ, मूँ ऊपरे हरगऊँ आयो हूँ। थाँ अणी दनियाँ का हो, पण मूँ अणी दनियाँ को ने हूँ।

²⁴ ईं वाते में थाँकाऊँ क्यो के, थाँ खुद आपणाँ पाप मेंईस मरो, काँके यद्याँ थाँ विस्वास ने केरो के, ‘मूँ वोईस हूँ’ तो थाँ थाँके खुद का पाप मेंईस मरो।”

²⁵ वाँकाणी ईसुऊँ पूँछ्यो, “थूँ कूण हे?” ईसू वाँने जवाब दिदो, “मूँ वोईस हूँ ज्यो सरूऊँ थाँने केतो आरियो हूँ।

²⁶ थाँका बारा में मने घणी बाताँ करणी हे अन थाँने सजा देबा का वाते भी घणी बाताँ हे पण मने खन्दाबावाळो हाँचो हे अन ज्यो में वणीऊँ हुण्यो हे वोईस मूँ दनियाँ ने केवूँ हूँ।”

²⁷ वाँकाणी यो ने हमज पाया के, यो बापू परमेसर का बारा में बतारियो हे।

²⁸ ईं वाते ईसू क्यो, “जद्याँ मनक का पूत ऊसो उटायो जाई, तद्याँ थाँ हमज जावो के ‘मूँ कूण हूँ’ अन यो भी जाण जावो के, मूँ मारी ओरुँ कई ने करूँ। पण मूँ ज्यो कई केवूँ हूँ, वस्यानीस केवूँ हूँ, जस्यान मारा बापू मने हिकायो हे।

²⁹ जणी मने खन्दायो हे, वो मारे नके हे। वणी मने कदी एकलो ने छोड़्यो, काँके मूँ हमेस्यान वोईस करूँ हूँ, ज्यो वींने भावे हे।”

³⁰ ईसू जद्याँ ईं बाताँ केरियो हो, तद्याँ नरई वींपे विस्वास किदो।

हाँच थाँने आजाद करी

³¹ जणा यहूदी मनकाँ वींपे विस्वास किदो, वाँने ईसू क्यो, “यद्याँ थाँ मारा हिक का जस्यान चाल पे अटल रेवो, तो हाचेई मने मानबावाळा बणो।

³² थाँ हाँच ने ओळको अन हाँच थाँने आजाद करी।”

³³ ईं वाते वणा ईसुऊँ पूँछ्यो, “माँ अबराम की बंस हा, माँ कदी भी किंका गुलाम ने रिया। तो थूँ ओ कस्यान के सके हे के, ‘थाँ आजाद वे जावो’?”

³⁴ ईसू वाँने क्यो, “मूँ थाँकाऊँ हाँची केवूँ हूँ, ज्यो कुई पाप करे हे, वो पाप को गुलाम हे।

³⁵ मालिक का घर में कुई गुलाम हक ने जमा सके हे, पण मालिक का पूत को हमेस्यान हक रेवे हे।

³⁶ ईं वाते यद्याँ पूत थाँने आजाद करी, तो थाँ हाचेई आजाद वेवो।

³⁷ मूँ जाणूँ हूँ के, थाँ अबराम की बंसज हो। पछे भी थाँ मने मारबा की ताक में रेवो हो, काँके थाँ मारी हिकने ने मानो हो।

³⁸ मूँ वोईस बताऊँ हूँ जस्यान मने मारा बापू परमेसर बतायो हे अन थाँ वोईस करो जस्यान थाँ थाँका बापूऊँ हुण्यो हे।”

³⁹ वाँकाणी ईसुऊँ क्यो, “माँ अबराम की ओलाद हा।” ईंपे ईसू वाँने क्यो, “यद्याँ थाँ अबराम की ओलाद वेता, तो अबराम के जस्यान काम करता।

⁴⁰ में परमेसरऊँ हूणी तकी हाँची बाताँ थाँने बता दिदी हे, ईं वजेऊँ थाँ मने मारबा का वाते त्यार बेट्या तका हो। पण अबराम तो थाँके जस्यान ने किदो हो।

⁴¹ थाँ तो थाँका बाप को काम कररिया हो।” वणा ईसुऊँ क्यो, “माँ कूकरमऊँ पेदा ने व्या हा। माँको एकीस बाप हे अन वो परमेसर हे।”

⁴² ईसू वाँने क्यो, “यद्याँ परमेसर थाँको बाप वेतो, तो थाँ माराऊँ भी परेम करता, काँके मूँ परमेसर का आड़ीऊँ आयो हूँ अन अटे हूँ। मूँ मारी मरजीऊँ ने आयो, पण मने वणा खन्दायो हे।

⁴³ थाँ मारी हिकने काँ ने हमजो हो? ईंको कारण योईस हे के, थाँ मारी बाताँने ने हुणो हो।

⁴⁴ थाँको बाप तो सेतान हो अन थाँ वींकी मरजी ने पुरी करणा छावो हो। वो तो ठेटऊँ हत्यारो हो। वो कदी भी हाँच का आड़ी ने रियो, काँके वींमें हाँच कोयने हे, जद्याँ वो जूट बोले हे, तो आपणाँ हाव-भाव के तरिया बोले हे। काँके वो जूटो हे अन हरेक जूट को बाप हे।

⁴⁵ पण मूँ हाँच बोलूँ हूँ, ईं वाते थाँ मारा ऊपरे विस्वास ने करो हो।

⁴⁶ थाकामूँ कुई भी मारा पे पाप को दोस ने लगा सके हे? यद्याँ मूँ हाँच बोलूँ हूँ, तो थाँ मारा पे विस्वास काँ ने करो हो?

⁴⁷ ज्यो परमेसर को हे, वो परमेसर की बाताँ हुणे हे। थाँ ईं वाते ने हुणो हो, काँके थाँ परमेसर का ने हो।”

ईसू अन अबराम

⁴⁸ यहूदी मनकाँ ईसू ने पूँछ्यो, “कई माँको यो केणो सई ने के, थूँ सामरी हे अन थाँरा में हुगली आत्मा धस्यी तकी हे?”

⁴⁹ ईसू वाँने क्यो, “मारा में हुगली आत्मा कोयने हे। मूँ मारा बाप ने मान देवूँ हूँ। अन थाँ मारी बेजती करो हो।

⁵⁰ मूँ मारा खुद को मान ने छावूँ हूँ। पण एक हे ज्यो मारो मान छावे हे, अन वोईस न्याव भी करे हे।

⁵¹ मूँ थाँने हाचेई केवूँ हूँ, यद्याँ कुई मारी हिक को पालण करी, तो वो कदी ने मरी।”

⁵² ईंपे यहूदी नेता वाँने क्यो, “अबे माँने पको विस्वास वेग्यो हे के, थाँरा में हुगली आत्मा धस्यी तकी हे। अबराम अन परमेसर का आड़ीऊँ बोलबावाळा तो मरग्या, पण थूँ केवे हे के, ‘यद्याँ कुई मारी हिक ने मानी, तो वो कदी ने मरी।’

⁵³ कई थूँ माकाँ बड़ाबा अबरामऊँ भी मोटो हे? वो तो मरग्यो अन परमेसर का आड़ीऊँ बोलबावाळा भी मरग्या। तो पछे थूँ आपणाँ खुद ने कई हमजे हे?”

⁵⁴ ईसू वाँने क्यो, “यद्याँ मूँ खुद को मान करतो, तो वो मान कई ने हे। पण मने मान देबावाळो मारो बाप हे, जिंने थाँ थाँको परमेसर केवो हो।

⁵⁵ थाँ वींने ने जाणो हो, पण मूँ वींने जाणूँ हूँ। यद्याँ मूँ केतो के, मूँ वींने ने जाणतो, तो मूँ थाँका जस्यान जूट बोलवावाळो जूटो ठेरतो। पण मूँ वींने जाणूँ हूँ अन वींका बचना को पालण करूँ हूँ।

⁵⁶ थाँका बापू अबराम यो जाणन खुस व्या के, वो मारे आबा को दन देकी अन वणी वो देक्यो अन राजी व्यो।”

⁵⁷ पछे यहूदी नेता वाँकाऊ क्यो, “अबार तईं थाँ पचा वर का भी ने व्या अन थें अबराम ने कस्यान देक लिदो?”

⁵⁸ ईसू वाँकाऊँ क्यो, “मूँ थाँकाऊँ हाचेई केऊँ हूँ के, अबराम का जनम लेबा के, पेल्याँऊँ मूँ मोजुद हूँ।”

⁵⁹ ईं बात पे वणा ईसू ने मारबा के वाते भाटा हाताँ में ले लिदा, पण वो छानेकूँ मन्दरऊँ बारणे निकलग्यो।