यहुन्ना 7 - नुवो नेम (मेवड़ी नया नियम)

ईसू अन वींका भई

¹ ईंका केड़े पछे ईसू गलील में जातरा किदी। वो यहूदियाँ परदेस में जाणो ने छावतो हो, काँके यहूदी अदिकारी वींने मारबा की कोसीस कररिया हा।

² अन यहूदियाँ मनकाँ को झोपड़्या को तेवार नके हो।

³ ईं वाते ईसू का भई वणीऊँ क्यो, “थूँ अटेऊँ यहूदियाँ परदेस परोजा, ताँके ज्यो काम थूँ करे हे, वींने थने मानबावाळा भी देक सके।

⁴ यद्याँ कुई भी मनक प्रसिद वेणो छावे तो वो छुपन कई ने करे। थूँ यो काम करे हे, तो आपणाँ खुद ने दनियाँ का हामे परगट कर।”

⁵ काँके वींका भई भी वींको विस्वास ने करता हा।

⁶ तद्याँ ईसू वाँने क्यो, “मारा वाते अबाणू तेवार में जाबा का वाते सई टेम ने आयो हे, पण थाँका वाते हरेक टेम सई हे।

⁷ या दनियाँ थाँकाऊँ नपरत ने राके हे, पण माराऊँ नपरत राके हे, काँके मूँ वाँका विरोद में केऊँ के, वाँका काम बुरा हे।

⁸ ईं तेवार में थाँ जावो। मूँ अबाणू ईं तेवार में ने जावूँ, काँके मारो वाते सई टेम आलतरे ने आयो हे।”

⁹ ईसू वाँकाऊँ ईं बात करन गलील मेंईस रेग्यो।

¹⁰ ईंका केड़े जद्याँ वींका भई तेवार में पराग्या, तो वो भी छानो-मानो वटे परोग्यो।

¹¹ यहूदी अदिकारी तेवार में ओ केता तका वींने होदरिया हाँ के, “वो कटे हे?”

¹² ईसू का बारा में लोगाँ में छाने-छाने घणी बाताँ वी। कतराई तो केता हाँ, “वो भलो मनक हे।” अन दूजाँ केता हा के, “ने, वो तो लोगाँ ने भरमावे हे।”

¹³ कुई भी मनक वाँका वाते खुलन बाताँ ने कर पारियो हो, काँके वीं लोग-बाग यहूदी अदिकारियाऊँ दरपता हा।

यरूसलेम में ईसू को उपदेस

¹⁴ जद्याँ तेवार का आदा दन बीत चुक्यो हा, तो ईसू मन्दर में जान उपदेस देबा लागो।

¹⁵ तद्याँ यहूदी अदिकारियाँ घणो अचम्बा किदो अन क्यो, “यो मनक अतरो कस्यान जाणे हे, यो तो आपणाँ अटे कदी भणवाई ने आयो?”

¹⁶ ईसू वाँने क्यो, “ज्या हिक मूँ देरियो हूँ वाँ मारी ने हे, पण मने खन्दाबावाळा की हे।

¹⁷ यद्याँ कुई वींकी मरजी पे चालणो छावे, तो वीं खुद ईं हिकऊँ जाण जाई के, या हिक परमेसर का आड़ीऊँ हे कन मारा आड़ीऊँ हे।

¹⁸ ज्यो कुई आपणाँ आड़ीऊँ केवे हे वो खुद की बड़ई छावे हे पण ज्यो आपणाँ खन्दाबावाळा की बड़ई छावे हे वो हाँचो हे अन वींमें कई खोट ने हे।

¹⁹ कई मूसे थाँने वेवस्ता का नेम ने दिदा हा? पण थाँकामूँ कुई भी नेम को पालण ने करे हे। तो थाँ मने मारबा की कोसीस काँ कररियाँ हो?”

²⁰ लोग-बाग वींने क्यो, “थाँरा में हुगली आत्मा धस्यी तकी हे। कूण हे ज्यो थने मारणो छावे हे?”

²¹ ईसू वाँने क्यो, “में एक काम किदो हे अन थाँ हाराई अचम्बो करो हो।

²² सबद का दन थाँ मूसा की आग्या ने मानन जद्याँ थाँ मनकाँ को खतनो करो हो, तो थाँ भी तो सबद का दन काम करो हो। पण या रीत तो मूसा का पेल्याऊँ आपणाँ बड़ाबा की टेमऊँ चाली आरी हे।

²³ सबद का दन कणी मनक को खतनो करबाऊँ मूसा को नेम ने टुटे हे, तो थाँ मारा पे गुस्सा काँ करो हो के, में एक मनक ने सबद के दन पुरी तरियाऊँ हव कर दिदो हे?

²⁴ मुण्डा देकन न्याव मती करो, पण ठीक-ठीक न्याव करो।”

कई ईसू मसी हे?

²⁵ जद्याँ कुई यरूसलेम का रेबावाळा केबा लागा, “कई यो वोईस हे, जिंने लोग-बाग मारबा की ताक में हे?

²⁶ पण देको, यो तो चोड़े-धाड़े बाताँ करे हे अन कुई भी वींने कई ने के पारिया हे। कई यहूदी अदिकारी हाँची में जाणतो ने ग्या हे के, योईस मसी हे?

²⁷ ईंने तो आपाँ जाणा हाँ के, यो कटा को हे। पण हाँची में मसी आई, तो कुई ने जाणी के, वो कटाऊँ आयो हे।”

²⁸ तद्याँ ईसू मन्दर में हिक देता तका जोरऊँ क्यो, “थाँ केवो हो के, थाँ हाँची में मने जाणो हो अन यो भी जाणो हो के, मूँ कटा को हूँ। मूँ खुद आपणाँ आड़ीऊँ ने आयो, पण मने खन्दाबावाळो हाँचो हे। वींने थाँ ने ओळको हो।

²⁹ पण मूँ वींने ओळकूँ हूँ, काँके मूँ वींका आड़ीऊँ खन्दायो तको हूँ।”

³⁰ पछे वीं वींने पकड़णो छायो, पण कुई भी वींने हात ने लगा सक्यो, काँके वींके पकड़्यो जावा को टेम अबाणू ने आयो हो।

³¹ पछे भी वीं भीड़ मेंऊँ घणा लोग-बाग वींपे विस्वास किदो अन केबा लागा के, “जद्याँ मसी आई तो वो जतरा परच्या अणी बताया हे अणीऊँ हेला ने बताई, कई वो अस्यान करी?”

ईसू ने पकड़बा की कोसीस करणी

³² फरीसी जद्याँ मनकाँ ने ईसू का बारा में छाने-छाने बाताँ करता तका हुण्या, तो वणा अन मुक्य याजकाँ ईंस ने पकड़बा का वाते मन्दर का चोकीदाराँ खन्दाया।

³³ ईंपे ईसू क्यो, “मूँ थोड़ी देर तईं थाँका रेवूँ हूँ, तद्याँ मूँ मारा खन्दाबावाळा के नके पाछो परो जाऊँ।

³⁴ थाँ मने होदो पण मूँ ने लादूँ अन जटे मूँ हूँ वटे थाँ ने आ सको हो।”

³⁵ यहूदी अदिकारी एक-दूजाऊँ केबा लागा, “यो कटे जाबावाळो हे, जटे ईंने होदा अन यो ने लादी? कई यो युनानी नगराँ में जाई जटे आपणाँ मनक रेवे हे अन कई युनानी मनकाँ ने हिकाई?

³⁶ अन अणी बात को अरत कई हे ज्यो अणी क्यो हे के, ‘थाँ मने होदो, पण मूँ ने लादूँ,’ अन ‘जटे मूँ हूँ वटे थाँ ने आ सको’?”

जीवन देबावाळी नंद्‍याँ

³⁷ पछे तेवार के आकरी दन ज्यो खास दन वेतो हो। वीं दन ईसू ऊबो वेन जोरऊँ क्यो, “यद्याँ कुई तरियो वे तो मारा नके आवे अन पिवे।

³⁸ ज्यो कुई मारा में विस्वास केरी, जस्यान पवितर सास्तर बतावे हे के, ‘वींका मेंऊँ जीवन का पाणी की नंद्‍याँ वेबा लागा जई।’”

³⁹ ईसू या बात पुवितर आत्मा का बारा में किदी ही, ज्या वींपे विस्वास करबावाळा ने मलबावाळी ही। अबाणू तईं या आत्मा किंने भी ने मली ही, काँके ईसू आलतरे आपणी मेमा उटाया ने ग्या हा।

मनकाँ में फुट

⁴⁰ तद्याँ भीड़ मेंऊँ कुई ईं बाताँ हुणन क्यो, “हाँची में, यो परमेसर का आड़ीऊँ बोलबावाळो हे।”

⁴¹ कुई दूजाँ मनक केरिया हा के, “यो मनक मसी हे।” पण कुई केरिया हा, “मसी गलीलऊँ ने आई।

⁴² कई सास्तर में यो ने लिक्यो हे के, मसी दाऊद का बंसऊँ अन बेतलेम गामऊँ आई, जटे राजा दाऊद रेतो हो?”

⁴³ अस्यान ईसू की वजेऊँ मनकाँ में फुट पड़गी।

⁴⁴ वणा मेंऊँ थोड़ाक जणा वींने पकड़ाणो छारिया हा, पण कुई भी वींके हात ने लगा सक्यो।

यहूदी अदिकारी ईसू को विस्वास ने किदो

⁴⁵ जद्याँ मन्दर का चोकीदार पाच्छा आग्या, तो मुक्य याजकाँ अन फरीसियाँ वाँकाऊँ पूँछ्यो, “थाँ वींने पकड़न काँ ने लाया?”

⁴⁶ वणा जवाब दिदो, “कुई भी मनक कदी अस्यी बाताँ ने किदी जस्यी वो करे हे।”

⁴⁷ अणीऊँ फरीसियाँ वाँकाऊँ क्यो, “कई थाँ भी तो ने भरमाया ग्या हो?

⁴⁸ थाँ यहूदी अदिकारियाँ कन फरीसियाँ मूँ किंने एक ने भी जाणो हो कई? जणी ईंपे विस्वास किदो वेवे?

⁴⁹ पण या मनकाँ की भीड़ ज्या मूसा का नेमाने ने जाणे हे। परमेसर को हराप ईंपे हे।”

⁵⁰ निकेदुमस ज्यो पेल्याँ ईसू का नके ग्यो हो अन यो वणा फरीसियाँ मूँ एक हो, वणी क्यो,

⁵¹ “आपणी मूसा का नेमा में कणी भी मनक की जद्याँ तईं वींकी पेल्याँ हुण ने लेवे अन हमज ने लेवे के, वो कई करे हे। वतरे वींने दोसी ने बणायो जावे हे।”

⁵² वणा वींने जवाब दिदो, “कई थूँ भी गलील को हे? सास्तर में देक अन होद के, गलीलऊँ कुई भी परमेसर का आड़ीऊँ बोलबावाळो परगट ने वेबावाळो हे।”