यहुन्ना 5 - नुवो नेम (मेवड़ी नया नियम)

कुण्ड पे अड़तीस साल का माँदा ने हव करणो

¹ अणा हारी बाताँ का पछे यहूदी लोग-बागाँ का एक धारमिक तेवार में ईसू यरूसलेम ग्या।

² यरूसलेम में भेड़ फाटक के नके एक कुण्ड हो, जिंने इबरानी भासा में “बेतसेदा” केता हो अन वींके च्यारूँमेर पाँच टापरियाँ बणी तकी ही।

³ जणामें नरई माँदा मनक ज्यामें आन्दा, लंगड़ा अन लकवा मारिया तका मनक पड़्या रेता हा।

⁵ वटे एक मनक हो, ज्यो अड़तीस वराऊँ मांदो हो, वो वटेईस पड़्यो तको हो।

⁶ ईसू वींने वटे पड़्या तको देकन अन ओ जाणन के, वो घणा दनाऊँ अणी दसा में हे। तो ईसू वींने क्यो, “कई थूँ हव वेणो छावे हे?”

⁷ वीं मांदे मनक वाँने जवाब दिदो के, “हो हुकम, मारा नके कुई मनक ने हे के, जद्याँ पाणी हलायो जावे, तो मने कुण्ड में उतारे, पण मारे उतरता-उतरता दूजाँ माराऊँ पेल्या उतर जावे हे।”

⁸ ईसू वींने क्यो, “उठ, आपणो माचो उठा अन चाल-फर।”

⁹ अन वो मनक तरत हव वेग्यो, अन आपणो कुतल्यो उठान चालबा-फरबा लागो। यो दन सबत को दन हो।

¹⁰ ईं वाते यहूदी अदिकारी मनकाँ ज्यो मांदकीऊँ हव किदो ग्यो हो। वींने केबा लागा के, “थाँरो कुतल्यो उठाणो ठीक ने हे, यो आपणाँ नेमा का खिलाप हे, काँके आज सबत को दन हे।”

¹¹ ईंपे वणी वाँने जवाब दिदो के, “जणी मने हव किदो, वणी मने क्यो, ‘आपणो वसाणो उठा अन चाल-फर।’”

¹² तो मनकाँ वींने पूँछ्यो, “वो कूण मनक हे जणी थने क्यो, ‘वसाणो उठान चाल-फर’?”

¹³ पण वो ज्यो हव वेग्यो हो, वो ने जाणतो हो के, “वो कूण हे।” काँके वणी जगाँ नरई भीड़ वेबाऊँ ईसू पराग्या हा।

¹⁴ अणा हारी बाताँ के पछे वो मनक ईसू ने मन्दर में मल्यो, जद्याँ ईसू वींने क्यो, “देक, अबे थूँ हव वेग्यो हे, अबे पाछो थूँ पाप मती करज्ये, अस्यान ने वे कुई मोटी आपत थारे गळा में पड़ जावे।”

¹⁵ पछे वो मनक परोग्यो अन जान यहूदी अदिकारी मनकाऊँ के दिदो के, “जणी मने हव किदो हे, वो ईसू हे।”

¹⁶ ईं वाते यहूदी मनक वाँने हताबा लागा, काँके ईसू यो काम आराम का दन में किदो हो।

¹⁷ ईं वाते ईसू वाँकाऊँ क्यो के, “मारो बाप कदी भी काम करतो तको ने रके हे, ईं वाते मूँ भी काम करतो रूँ हूँ।”

¹⁸ या बात यहूदी अदिकारियाँ ने घणी अकरगी अन वीं ईसू ने मारबा का ओरी हेला मोका होदबा लागा। काँके ईसू बेस सबद का नेम नेईस ने तोड़्यो, पण परमेसर ने आपणो बाप बतान खुद ने परमेसर का बराबर कर दिदो।

बेटा का अदिकार

¹⁹ ईं बात पे ईसू वाँने क्यो, “मूँ थाँने सई–सई केवूँ हूँ, मूँ, बेटो, खुद कई ने कर सके हे, मूँ बेस वोईस करूँ हे, ज्यो बापू परमेसर ने करता तका देकूँ हे। काँके परमेसर ज्यो कई करे हे। मूँ भी वस्यानीस करूँ हूँ।

²⁰ काँके परमेसर माराऊँ लाड़ राके हे अन ज्यो ज्यो काम वो खुद करे हे, वीं हाराई मने बतावे हे अन वो अणीऊँ भी मोटा-मोटा ने मने करबा का वाते देई। तद्याँ थाँ देकन अचम्बो करो।

²¹ जस्यान परमेसर मरिया तका ने उठान जिवावे हे, वस्यानीस मूँ बेटो भी ज्याँने छाऊँ हे, वाँने जीवावूँ हूँ।

²² अन परमेसर किंको भी न्याव ने करे हे, पण न्याव करबा को हारोई काम मने हूँप दिदो हे।

²³ ईं वाते हाराई लोग-बाग जस्यान परमेसर को आदर-मान करे हे वस्यानीस मारो भी आदर-मान केरी। ज्यो मारो आदर-मान ने करे हे, वीं वणा परमेसर को भी आदर-मान ने करी, जणा मने खन्दायो हे।

²⁴ “मूँ थाँने सई-सई केवूँ हूँ, ज्यो मारा बचनाँ ने हुणन मारा खन्दाबावाळा को विस्वास करे हे, वो अनंत जीवन पावे हे। अन वाँने दण्ड ने दिदो जाई, पण वीं मोतऊँ छेटी वेन जीवन में परवेस करग्या हे।

²⁵ मूँ थाँकाऊँ सई-सई केवूँ हूँ, वो टेम आरियो हे, अन अबाणू भी हे, जीं मरिया तका हा, वीं परमेसर का बेटा का बचन हूणी अन ज्यो हूणी, वीं जीवता वे जाई।

²⁶ काँके जस्यान बापू परमेसर आपणाँ खुद में जीवन राक मेल्यो हे, वस्यानीस वणा मने ओ हक दिदो हे के, मूँ भी आपणाँ खुद में जीवन राकूँ।

²⁷ पण मने न्याव करबा को भी हक दिदो ग्यो हे काँके मूँ, मनक को पूत हूँ।

²⁸ “ईंपे थाँ अचम्बो मती करो, काँके वाँ टेम आरी हे के, ज्यो भी कबराँ में हे, वीं मारा बचन हूणी,

²⁹ अन कबराऊँ बारणे आ जाई। जणा भलई किदी हे वीं जीवन का वाते मरिया तकाऊँ पाच्छा जीवता वे जाई। जणा बुरई किदी हे, वीं दण्ड पाबा का वाते जीवता वे जाई।

ईसू को यहूदी लोगाऊँ वाद-विवाद

³⁰ “मूँ आपणाँ खुद का हकऊँ कई भी ने कर सकूँ हूँ, ज्यो परमेसरऊँ हूणूँ हूँ, वींके जस्यानीस न्याव करूँ हूँ। अन मारो न्याव हाँचो हे, काँके मूँ मारी मरजी ने कोयने, पण मारा खन्दाबावाळा की मरजी ने पुरी करूँ हूँ।

³¹ “यद्याँ मूँ खुद मारी गवई दूँ, तो वाँ मानबा जोगी ने वेई।

³² मूँ ने पण कुई ओरी हे ज्यो मारी गवई देवे हे अन मूँ जाणूँ हूँ के, ज्याँ वो गवई देवे हे, वाँ हाँची हे।

³³ थाँ आपणाँ मनकाँ ने यहुन्ना का नके पूछबा का वाते खन्दाया हा, तद्याँ वणी हाँच की गवई दिदी।

³⁴ में या बात ईं वाते ने क्यो के, मनक बारा में गवई देवे, पण ईं वाते क्यो, ताँके थाँ बंचाया जावो।

³⁵ यहुन्नो तो वीं दिवा का जस्यान हो ज्यो बळतो अन उजितो देतो रेवे हे अन थाँ वींका उजिता को थोड़ाक टेम तईं मजो लेणा छावता हा।

³⁶ पण मारा नके एक ओरी गवा हे जिंकी गवई यहुन्ना की गवईऊँ मोटी हे काँके परमेसर ज्यो काम पूरो करबा के वाते मने हुप्यो हे, मूँ वाँका काम ने कररियो हूँ अन वीं कामइस मारी गवई हे के, परमेसर मने खन्दायो हे।

³⁷ परमेसर जणा मने खन्दायो हे, वीं भी मारी गवई देवे हे। थाँकाणी वाँकी वाणी कदी भी ने हूणी अन ने थाँ वींने देक्यो हे।

³⁸ अन नेई खुद का मन में वाँका बचन राको हो, काँके थाँ वींपे विस्वास ने करो हो, जिंने परमेसर खन्दायो हे।

³⁹ थाँ सास्तरा की किताब में होदो हो, काँके थाँ हमज्यो हो के, थाँने वींमें अनंत जीवन मले हे। पण ईं हाराई सास्तर भी मारी गवई देवे हे।

⁴⁰ पछे भी थाँ अनंत जीवन पाबा का वाते मारा नके ने आणा छावो हो।

⁴¹ “मूँ मनकाँ का मुण्डाऊँ किदी तकी बड़ई ने छावूँ हूँ।

⁴² काँके मूँ थाँने ओळकूँ हूँ के, थाँ कणी तरिया का मनक हो। थाँकामें परमेसर को परेम कोयने हे।

⁴³ मूँ मारा बापू परमेसर का हकऊँ आयो हूँ, तद्याँ भी थाँ मने ने मानो हो। पण यद्याँ कुई दूजो आपणाँ खुद का नामऊँ आवे, तो थाँ वींने मान लेवो हो।

⁴⁴ थाँ ज्यो एक-दूजाऊँ मान छावो हो अन वो मानज्यो खाली परमेसर का आड़ीऊँ मले हे, वींकी थाँने कई परवा ने हे। तो थाँ मारा पे कस्यान विस्वास कर सको हो?

⁴⁵ यो मती हमज्यो के, मूँ मारा बापू परमेसर का हामे थाँका ऊपरे दोस लगाऊँ। थाँका पे दोस लगाबावाळो तो मूसो हे, जिंपे थाँ आस लगा मेली ही।

⁴⁶ यद्याँ थाँ हाँची में मूसा को विस्वास करता, तो मारो भी विस्वास करता, काँके वणी मारा बारा मेंईस लिक्यो हे।

⁴⁷ पण यद्याँ थाँ वणी ज्यो लिक्यो हे वींपे भी विस्वास ने करो हो तो पछे मारी बाताँ पे कस्यान विस्वास करो?”