इब्रानियों 9 - नुवो नेम (मेवड़ी नया नियम)

दनियाँ अन हरग में भगती

¹ देको पेलो करार ज्यो इजराएली मनकाँ अन परमेसर का बचमें हो, वींमें सेवा-चाकरी का नेम हा, अन एक सेवा करबा का वाते पुवितर जगाँ भी बणईगी ही।

² एक तम्बू बणायो ग्यो हो, जिंका पेला कमरा में दिवो मेलबा को आळ्यो, टेबल अन भेंट की रोट्याँ ही, वा पुवितर जगाँ केवाती ही।

³ अन दूजाँ परदा का पाच्छे वो कमरो हो, ज्यो खास पुवितर जगाँ केवातो हो।

⁴ अन पछे मयने खुसबु आबा का वाते धुप-ध्यान करबा होना की वेदी अन होनाऊँ मढी तकी करार की पेटी ही। अन ईं पेटी का मयने होनाऊँ मढ्यो तको एक ठामड़ो हो, जिंमें मन्ना हो अन हारून की वाँ लाकड़ी भी जिंके कूँपळा फुटगी ही अन करार लिक्या तका भाटा हा।

⁵ करार की पेटी का ऊपरे परमेसर की मेमामय हाजरी का वाते करूब नाम का हरग-दुताँ की मूरत्याँ बणी तकी ही, जी मापी की जगाँ पे छाया कररिया हा। पण ईं टेम में माँ अणा बाताँ की हेली चरचा ने कर सका हाँ।

⁶ तम्बू को हारोई काम सई तरियाऊँ पूरो व्या केड़े याजक पेला ओवरा में रोज जान आपणी सेवा को काम करता हा।

⁷ पण मयने का ओवरा में मायाजक साल में एक दाण जातो हो। वो बना वीं लुई के कदी ने जातो हो, जिंने वो खुद अन आपणाँ मनकाँ का अणजाण में किदा ग्या पापाँ का वाते परमेसर के भेंट चड़ातो हो।

⁸ अणीऊँ पुवितर आत्मा योईस बतावे हे के, जद्याँ तईं तम्बू को पेलो ओवरो ऊबो तको हे, तद्याँ तईं खास पुवितर जगाँ को गेलो परगट ने वेई।

⁹ अन यो तम्बू अबाणू की टेम का वाते एक केणी हे, जिंमें अस्यी भेंट अन बलीदान चड़ाया जावे हे, जणीऊँ आरादना करबावाळा का मन पुरी तरियाँ सुद ने वे सके हे।

¹⁰ ईं हारी चिजाँ तो खाबा-पिबा, नावा-धोबा का सुद वेबा का मनकाँ का अलग अलग नेम हे। अन ईं नेम जद्याँ तईं परमेसर को आगलो क्रम लागू ने वेजावे, वतरे लागू रेई।

मसी को लुई

¹¹ पण मसी अणा हव हव चिजाँ को मायाजक बणन आयो हे। तो वीं हात का बणाया तका तम्बू में ने, पण अणीऊँ भी मोटा अन सिद तम्बू में सेवा करे हे। मतलब वो तम्बू अणी दनियाँ को भाग ने हे।

¹² अन बकरा अन पाडो का लुईऊँ ने पण आपणाँ खुद का लुईऊँ एकीस दाण पुवितर जगाँ में ग्यो अन आपणाँ वाते हमेस्यान को छुटकारो पाको कर दिदो।

¹³ काँके जद्याँ बकरा अन पाडा का लुई अन पाडी की भभूत वाँका पे छाटी जावे, ज्यो रिति-रिवाज का जस्यान असुद ने सुद बणावे हे, ताँके वीं देह का हस्याबूँ सुद वे सके।

¹⁴ आ बात हाँची हे तो मसी को लुई कतरो जोरावर वेई? जणी अनंत आत्माऊँ खुद ने निरदोस बली का रूप में हमेस्या वाते परमेसर के चड़ा दिदो। वींके अस्यान करबाऊँ अन वींके लुईऊँ आपाँने मोत का आड़ीऊँ लेन जाबावाळा करमाऊँ आपणाँ मन सुद कर करी, ताँके आपाँ जीवता परमेसर की सेवा कर सका।

¹⁵ ईं वाते मसी एक नुवा करार को बिचोलिया हे, ताँके जीं बुलाया ग्या हे, वीं अनंत उतरादिकार पा सके, जिंको वादो परमेसर किदो हो। अबे देको, जी पेला करार का जस्यान जणा पापाँ किदो हो, वाँने पापाऊँ छुड़ाबा की वाते मरन किमत चुकई अन वाँने आजाद किदा।

¹⁶ काँके जटे वसीयतनामो लिक्यो जावे हे वटे वसीयतनामो बणाबावाळा की मोत की मोत को सबूत मलणो जरूरी हे। तद्याँईस वो काम करे हे

¹⁷ काँके वसीयतनामो मरबा केड़ेईस लागू वेवे हे। अन जद्याँ तईं वसीयतनामो बणाबावाळो जीवतो रेवे हे, तद्याँ वो लागू ने वेवे हे।

¹⁸ ईं वाते पेलो करार भी बना लुई के, लागू ने किदो ग्यो हो?

¹⁹ ईं वाते जद्याँ मूसे नेमा की हारी आग्या लोगाँ ने हुणई नाकी, तो वणी पाडा-पाडी अन बकरा को लुई पाणी में मलान लाल ऊन अन जुफा की डाळ्याऊँ वीं किताब पे अन हाराई लोगाँ पे छाँट दिदो।

²⁰ वणी क्यो हो, “यो वीं करार को लुई हे, जिंकी आग्या परमेसर थाँने दिदी हे।”

²¹ अन अणी तरियाँ वणी तम्बू अन सेवा का हाराई समान पे लुई छाँट्यो।

²² मूसा का नेमा का जस्यान हारी चिजाँ ने लुई छाटकन सुद किदी जावे हे अन बना लुई वेवाड़्याँ मापी ने मले हे।

मसी के बली वेबाऊँ पाप माप वेग्या

²³ ईं वाते ओ जरूरी हे के, जीं चिजाँ हरग का नकल का रूप में हे, वाँने जनावराँ का बलीऊँ पुवितर करणी छावे। पण हरग की चिजाँ तो अणाऊँ ओरी बड़िया बलीऊँ पुवितर किदी जावे हे।

²⁴ काँके मसी हात का बणई तकी पुवितर जगाँ में ने ग्यो, ज्या जगाँ हाँची पुवितर जगाँ की नकल का जस्यान हे, पण हरग में ग्यो हे, ताँके आपणाँ वाते परमेसर का हामें पेरवई वेवे।

²⁵ ईंको अरत ओ ने के, वो आपणाँ खुद ने बार-बार बली चड़ाबा का वाते हरग में ग्यो, जस्यान मायाजक हर साल दूजाँ को लुई लेन पुवितर जगाँ में बली चड़ाया करे हे।

²⁶ यद्याँ अस्यान वेतो तो दनियाँ का रचनाऊँ लेन वींने आकोदाण दुक जेलणो पड़तो, पण अबे जुग का अन्त में वो एकीस दाण परगट व्यो हे, ताँके आपणाँ बलीदानऊँ पाप ने छेटी कर दे।

²⁷ जस्यान मनकाँ का वाते एक दाण मरणो अन वींका केड़े न्याव वेणो पको हे।

²⁸ वस्यान मसी भी एक दाणइस नरई का पापाँ ने छेटी करबा का वाते बलीदान व्यो हे। वो अबे पापाँ ने छेटी करबा का वाते ने, पण ज्यो वींकी वाट नाळरिया हे वाँका छूटकारा का वाते दूजी दाण परगट वेई।