इब्रानियों 4 - नुवो नेम (मेवड़ी नया नियम)

¹ ईं वाते जद्याँ वींके रईम्बावाळी जगाँ में आबा को वादो अबाणू तईं हे, तो आपाँने ध्यानऊँ रेणो छावे, अस्यान ने वे के, थाँकामूँ कुई भी वणीऊँ चूक जावे।

² काँके आपाँने वाँके जस्यानीस हव हमच्यार हुणायो ग्यो हे, पण हुण्या तका बचनऊँ वाँने कई नफो ने व्यो, काँके वीं हूणबावाळा वींने विस्वास के हाते ने हुण्यो हो।

³ अबे देको, आपीं ज्यो विस्वासी हा, वीं रईम्बावाळी जगाँ में जा सक्या हा। जस्यान के परमेसर भी क्यो हो, “में गुस्सा में अणीऊँइस होगन खान क्यो हो के, ‘वीं कदी भी मारी रईम्बावाळी जगाँ में ने जा सकी।’” जद्याँ के, दनियाँ की रचना के टेमऊँइस वींको काम पूरो वेग्यो हो।

⁴ काँके हातवे दन का बारा में वणी सास्तर में कटे यो क्यो हो के, “परमेसर हातवे दन आपणाँ हाराई काम ने पूरो करन रईम्बो लिदो।”

⁵ अन वटे वणी पाछो यो क्यो हे के, “वीं कदी भी मारी रईम्बावाळी जगाँ में ने जा सकी।”

⁶ ज्याँने पेल्याँ हव-हमच्यार हुणायो ग्यो हो, वीं आग्याने ने मानन रईम्बावाळी जगामें ने जा सक्या हा, ईं वाते अबाणू भी थोड़ाक मनकाँ का वाते रईम्बावाळी जगाँ को कमाड़ खुल्यो तको हे।

⁷ ईं वाते परमेसर पछे एक खास दन ने ठेरान अन वींको नाम दिदो, “आज” थोड़ाक वरा केड़े दाऊदऊँ परमेसर वीं दन का बारा में सास्तर में बतायो हे, जिंका बारा में पेल्याँ क्यो हो के, “यद्याँ थाँ आज परमेसर की अवाज हुणो, तो आपणाँ मन ने गाटो मती करज्यो।”

⁸ अन यद्याँ यहोसु वाँने रईम्बावाळी जगाँ में लातो, तो वींका केड़े परमेसर ने कस्या दूजाँ दन का बारा में केवा की जरुतई ने वेती।

⁹ ईं वाते जाण लो, परमेसर का मनकाँ का वाते एक अस्यो रईम्बो वाट नाळरियो हे, जस्यो हातवे दन परमेसर रईम्बो लिदो हो।

¹⁰ काँके ज्यो भी परमेसर का रईम्बा में आयो हे, वणी आपणाँ करमाऊँ रईम्बो पायो हे। जस्यान परमेसर आपणाँ कामाँ ने पूरा करन रईम्बो लिदो हो।

¹¹ ईं वाते आवो, आपाँ भी रईम्बावाळी जगाँ में जाबा का वाते कोसीस करा, कटे अस्यान वे के, कुई मनक वाँके जस्यान आग्याने ने मानन वीं रईम्बावाळी जगाऊँ चूक जावे।

¹² परमेसर का बचन तो जीवता अन काम करबावाळा हे, वीं कस्यी तीकी तरवारऊँ भी तिका हे। अन परमेसर को बचन पराण, आत्मा, हन्ट अन गुदा ने अलग करन आर-पार वेवे हे अन मन की मनसा अन बच्यार ने जाँचे हे।

¹³ दनियाँ की कस्यी भी चीज परमेसरऊँ हपी तकी ने हे, वाँकी आक्याँ का हामे हारी चिजाँ खुली अन बना परदा की हे। वाँका हामे आपाँने आपणो लेको देणो हे।

मायाजक ईसू

¹⁴ ईं वाते परमेसर को बेटो ईसू एक अस्यो मोटो मायाजक हे, जीं हरग में ग्यो, तो ज्याँ बात आपीं मानाँ हा, वींमें आपाँने मजबूत रेणो छावे।

¹⁵ काँके आपणाँ नके ज्यो मायाजक हे, वो अस्यो ने हे ज्यो आपणी कमजोरी ने मेसूस ने कर सके। वो हारी बाताँ में आपणे जस्यान परक्यो ग्यो अन बना पाप को निकळ्यो।

¹⁶ ईं वाते आवो, आपीं हिम्मत का हाते परमेसर की दया की गादी का आड़ी चाला, ताँके आपाँ पे दया वे अन करपा पावा, ज्या जरूत की टेम में आपणी मदत करे।