इब्रानियों 13 - नुवो नेम (मेवड़ी नया नियम)

परमेसर ने कस्यान राजी कराँ?

¹ भईचारा का परेम में बण्या रो।

² अणहेन्दा की आवभगत करणी मती भुलो, काँके अस्यान करता तकाईस नरई लोगाँ अणजाण में हरग-दुताँ की आवभगत किदी हे।

³ केदी मनकाँ का लारे अस्यान वेवार राको के, थाँ भी वाँका हाते केदी हो। जणा का हाते बुरो वेवार व्यो हे वाँने यो जाणन आद करो के, जस्यान थाँका हाते बुरो व्यो हे।

⁴ ब्याव को हाराई ने मान करणो छावे। लोग-लुगई एक-दूँजा का वाते वफादार रेवो। काँके दूजाँ का हाते गलत वेवार राकबावाळा लोग-लुगई ने अन कुकरम करबावाळा ने परमेसर सजा देई।

⁵ आपणाँ जीवन में धन का लाळचऊँ छेटी रेवो। ज्यो थाँका नके हे, वींमेंईस सबर राको, काँके परमेसर क्यो हे, “मूँ थाँने कदी ने छोड़ूँ, मूँ थाँने कदी ने त्यागूँ।”

⁶ ईं वाते आपीं विस्वास का हाते केवा हा, “परबू मारी मदत करबावाळा हे, मूँ कदी भी ने दरपूँ। मनक मारो कई ने कर सके हे।”

⁷ आपणाँ मुक्या ने आद राको, जणा थाँने परमेसर का बचन हुणाया हे, वाँके चालचलन का फळ का बारा में होचो अन वाँके विस्वास की नकल करो।

⁸ ईसू मसी काले आज अन हमेस्यान एक जस्यान रेई।

⁹ अलग अलग तरियाँ का अणजाणी हिकऊँ भटको मती, काँके थाँका मन का वाते यो हव के, वो खाबा-पिबा की नेमा का बजाए दयाऊँ मजबूत बणे। अन जणा खाबा-पिबा का नेमाने मान्याँ वणाऊँ वाँको कदी भलो कोनी व्यो।

¹⁰ आपणाँ नके एक अस्यी वेदी हे, जिंपूँ खाबा को अदिकार वाँने ने हे, जी तम्बू में सेवा करे हे।

¹¹ मायाजक परम पुवितर जगाँ पे पापबली चड़ाबा का वाते ढान्ढा-ढोर को लुई तो ले जावे हे, पण वाँकी देह ने डेराऊँ बारणे बाळ दिदी जावे हे।

¹² अणीस वाते ईसू भी लोगाँ ने आपणाँ खुद का लुईऊँ पुवितर करबा का वाते नगर का बारणे दुक जेल्यो हे।

¹³ ईं वाते आवो, वींका अपमान ने आपणाँ ऊपरे लेन नगर का बारणे वींका नके परा जावा।

¹⁴ काँके अटे आपणो कस्योई हेमस्यान रेवा वाते नगर ने हे, पण आपीं तो वणी नगर की वाट नाळरिया हे, ज्यो आबावाळो हे।

¹⁵ ईं वाते आपाँ ईसू का जरिये गुणगान रूपी बलीदान मतलब वणा होटा को फळ जीं वींको नाम लेवे हे, परमेसर ने हमेस्यान चड़ाया करे।

¹⁶ अन भलई करणी अन एक-दूँजा की मदत करणी ने भुलणी, काँके परमेसर अस्या बलीदानाऊँ राजी वेवे हे।

¹⁷ आपणाँ आत्मिक मुक्या को भरोसो करो अन वाँके बंस में रो। वीं परमेसर का हामें थाँको लेको देबावाळा का जस्यान वीं जागता तका थाँके जीव की रुकाळी करे हे। अन यद्याँ वस्यानीस करो, तो वीं यो काम राजी वेन करी, पण थाँ वस्यान ने करो, तो वीं यो काम दकऊँ करी। अन अणीऊँ थाँको कई नफो ने वेई।

¹⁸ माकाँ वाते परातना करता रेवो, काँके माँने भरोसो हे के, माँकी अंतर-आत्मा सुद हे। अन माँ हारी बाताँ में बड़िया चालचलन छावाँ हा।

¹⁹ मूँ खासतोरऊँ अरज करूँ हूँ के, परातना करता रेवो, ताँके परमेसर मने थाँका नके वेगो खन्दा सके।

आकरी परातना

^20-21 जणी गारा का वणी मान गवाळ्याँ आपणाँ परबू ईसू ने वीं अनंतकाल का करार करबावाळा लुईऊँ मरिया तका मेंऊँ पाच्छा जीवता कर दिदा, वीं सान्तीदाता परमेसर, थाँ हाराने हव चिजाँ में धपा दे, जणीऊँ थाँ वाँकी मनसा ने पुरी कर सको। अन ज्यो कई वींने भावे हे, वींने ईसू मसीऊँ आपाँ में पूरो करे। परमेसर की मेमा हमेस्यान वेती रेवे। आमीन।

आकरी संदेस

²² हो भायाँ, मूँ थाँकाऊँ अरज करूँ हूँ के, अणा हिम्मत बन्दाबावाळा उपदेस पे चालो, काँके में कागद में हेली बाताँ ने लिकी हे।

²³ मूँ छावूँ हूँ के, थाँने यो पतो पड़ जावे के, आपणो भई तिमुतियुस छुटग्यो हे, अन यद्याँ वो वेगो आग्यो तो, मूँ वींका हाते थाँकाऊँ मलूँ।

²⁴ मारा आड़ीऊँ आपणाँ हाराई अगुवाँ अन हाराई पुवितर लोगाँ ने नमस्कार केज्यो, अन इटली का विस्वासी मनक थाँने नमस्कार केवे हे।

²⁵ परमेसर की दया थाँ हाराई का हाते बणी तकी रेवे।