इब्रानियों 11 - नुवो नेम (मेवड़ी नया नियम)

विस्वास

¹ विस्वास करबा को अरत हे के, जणा चिजाँ की आपाँ आस लगा राकी हे, वीं आपाँने मलगी हे ईंको भरोसो कराँ हा। अन जीं चिजाँ ने आपाँ देक ने सका, पण आपाँने वाँको मलबा को पूरो भरोसो हे।

² अन अस्यान को विस्वास करबा की वजेऊँईस पुराणा टेम का मनकाँ ने परमेसर का आड़ीऊँ मान मल्यो हो।

³ विस्वास करबा की वजेऊँ आपाँ ओ जाण सका हा के, परमेसर की आग्याऊँईस ईं बरमाण्ड की रचना वीं हे। ईं वाते, ईं हाराई दिकबावाळी चिजाँ, दिकबावाळी चिजाँऊँ ने बणी हे।

⁴ विस्वास करबा की वजेऊँ हाबिल केनऊँ हव भेंट परमेसर के चड़ई ही। विस्वास करबा की वजेऊँ परमेसर वींकी भेंट ने मान लिदी अन वणीऊँ वींने एक धरमी मनक का रूप में मान मल्यो। वींके मरबा का केड़े आज आपाँ वणीऊँ हिका हा।

⁵ विस्वास करबा की वजेऊँ हनोक ने वींके देह हमेत परमेसर वींने आपणाँ नके बला लिदो हे अन वणी मोत ने मेसूस ने किदी। अन वींने होद्‍यो पण वींको पतो कटेई ने चाल्यो। परमेसर वींने आपणाँ नके बला लिदो हो अन वींके नके बलायो जाबाऊँ पेल्याँई आ गवई दिदो गी ही के, वणी परमेसर ने राजी किदा हे।

⁶ काँके विस्वास के बना परमेसर ने राजी ने किदा जा सके हे अन जद्याँ कुई परबू का नके आवे हे, तो वींने विस्वास करणो छावे के, वो हे, अन ज्यो वींने होदे हे, वो वींने फळ देवे हे।

⁷ विस्वास करबा की वजेऊँ नूह भी वणा बाताँ ने ज्यो वींने दिकई कोयने दिदी ही। ईं बारा में चेतावणी पान परमेसर की दरपणी का हाते आपणाँ परवार ने बंचाबा का वाते जाँज बणायो हो, अस्यान करन वणी दनियाँ ने दोसी ठेराई अन वो धारमिकता को वारिस बणग्यो, ज्यो विस्वास करबाऊँ आवे हे।

⁸ विस्वास करबा की वजेऊँ अबराम ने जद्याँ बलायो ग्यो हो तो वो आग्या मानन अस्यी जगाँ का आड़ी चाल पड़्यो, जिंको वारिस बणबावाळो हो, जद्याँ के, वो जाणतो भी ने हो, तद्याँ भी वो वटे ग्यो हो।

⁹ विस्वास करबा की वजेऊँ परमेसर अबराम ने ज्या धरती देबा को वादो किदो हो वणी धरती का ऊपरे वो एक अणजाण मनक का रूप आपणो तम्बू बणान रेवा लागो, वस्यानीस इसाक अन याकूब भी तम्बू बणान रिया हा, ईं मनक भी अबरामऊँ ज्यो वादो किदो हो वणीस परमेसर का वादा का वारिस हे।

¹⁰ काँके अबराम वणी नगर की वाट नाळरियो हो, जिंकी नीम मजबूत हे अन जिंने परमेसर माढ्यो अन बणायो हो।

¹¹ विस्वासऊँ जद्याँ सारा बाँज ही तद्याँ भी वाँ भूड़ापाँ में गरबवती वीं, काँके वणा वादो करबावाळा परमेसर ने विस्वास जोगा मान्यो।

¹² ईंका वजेऊँ एक मनक अबरामऊँ ज्यो मरबावाळा के जस्यान हो, वींकाऊँ आकास का तारा अन समन्द का कनारे पड़ी रेत का जस्यान अनगणत बंस पेदा व्या।

¹³ ईं हाराई मनक विस्वास करता कतराई मरग्या अन ज्यो चीज वाँने देबा को वादो किदो ग्यो हो, वाँ वाँने कोनी मली। पण वीं वाँने छेटीऊँ देकी अन वाँकी आवभगत किदी अन वीं ओ भी मानता हा के, वीं ईं धरती में बारवासी अन अणजाण हे।

¹⁴ अन ज्यो मनक अस्यान की बाताँ करे हे वीं यो दिकावे हे के, वीं आपणाँ खुद का देस की खोज में हे।

¹⁵ यद्याँ वीं वणी देस का बारा में होचता, जटे वीं रेता हा, तद्याँ वाँको वींमें पाछो जाबा को मोको रेतो।

¹⁶ पण वीं तो बड़िया नगर में जाबा की मरजी राके हे, ज्यो हरग हे। ईं वाते वीं परमेसर ने आपणाँ परमेसर केबाऊँ हरम कोनी करे, काँके वणी वाँका वाते एक नगर त्यार करन मेल्यो हे।

^17-18 विस्वास की वजेऊँ जद्याँ परमेसर अबराम की परक कररिया हा, तद्याँ वणी इसाक की बली चड़बा की पुरी त्यारी कर लिदी। जद्याँ के परमेसर वणीऊँ क्यो हो के, “इसाकऊँ थाँरो बंस आगे बड़ी।” ईंका केड़े भी अबराम जिंने वादो मल्यो हो, वो आपणाँ एकलोता बेटी की बली देबा का वाते त्यार वेग्यो।

¹⁹ पण अबराम होच्यो के, परमेसर मरिया तका ने भी जीवतो कर सके हे अन एक दूजी आड़ीऊँ क्यो जावे तो वणी इसाक ने मोतऊँ पाछो पा लिदो हो।

²⁰ विस्वास की करबा की वजेऊँ इसाक, याकूब अन एसाव ने वाँके आबावाळा जीवन का वाते आसीस दिदी ही।

²¹ विस्वास करबा की वजेऊँ याकूब जद्याँ मरबावाळो हा, तद्याँ वणी युसुप का हाराई बेटा ने आसीस दिदी अन आपणी लाटी का टेके ऊबो वेन परमेसर के धोक दिदो।

²² विस्वास करबा की वजेऊँ जद्याँ युसुप की आकरी टेम आगी ही तद्याँ वणी इजराएल का लोगाँ ने मिसरऊँ लेन निरगमन तईं की बाताँ बतई अन वाँने आग्या दिदो ही के, वीं अटूऊँ जावे वीं दाण मारा गाड़्या तका हाड़क्या भी हाते ले जावे।

²³ विस्वास करबा की वजेऊँ मूसा का बई-बापू वींके जनम व्या केड़े वींने तीन मिना तईं हपई राक्यो, काँके वीं जाणता हा के, ओ बाळक रुपाळो हे अन वीं राजा की आग्याऊँ भी ने दरप्या हा।

²⁴ विस्वास करबा वजेऊँ जद्याँ मूसो मोटो व्यो तद्याँ वो खुद फिरोन की बेटी को बेटो केबावाऊँ नटग्यो।

²⁵ अन वींने थोड़ाक दन रेबावाळा पाप का सक लेबाऊँ परमेसर का भगताँ का हाते दुक जेलणो घणो सई लागो।

²⁶ वींने मिसर का धन-दोलतऊँ ज्यादा मसी का हाते बेजत वेणो घणो किमती लागो, काँके वणी परमेसरऊँ मलाबावाळा ईनाम पे ध्यान लगा मेल्यो हो।

²⁷ विस्वास करबा की वजेऊँ वणी राजा की दरपणी ने राकी अन मिसर ने छोड़ दिदो। अन मानो वो ने दिकबावाळा परमेसर ने देकबा का जस्यान हारोई सेण किदो।

²⁸ विस्वास करबा की वजेऊँ जद्याँ परमेसर वींने फसे का तेवार अन लुई छाटकबा का वाते हुकम दिदो हो, जद्याँ वणी वींकी हुकम को पालण किदो। ताँके इजराएल का पेली पोत का छोरा की मोत ने वेवे।

²⁹ विस्वास करबा की वजेऊँ इजराएली मनक लाल समन्द ने अस्यान चालन पार किदो हो जस्यान के वीं हूँकी धरती पे चालरिया हा। पण जद्याँ मिसर का मनक अस्यान करबा लागा, तो वीं डुबग्या।

³⁰ विस्वास करबा की वजेऊँ जद्याँ इजराएली मनक यरीहो नगर की भींत के हात दनाँ तईं चकर लगाया, वींके केड़े वा वटूँ धड़ी गी।

³¹ विस्वास करबा की वजेऊँ राहब नाम की वेस्याँ परमेसर की आग्या ने मानबावाळा मनकाँ का हाते नास ने वीं, काँके वणी भेदू मनकाँ की आवभगत किदी ही।

³² अबे आगे कई बतऊँ। गिदोन, बारक, सिमसोन, यिपतह, दाऊद, समुएल अन परमेसर का आड़ीऊँ बोलबा का बारा में बताबा को मारा नके टेम कोयने हे।

³³ वणाके विस्वास करबा की वजेऊँ वणा राज-दरबाराँ ने जीत लिदा हा अन वणा धारमिकता का काम भी करिया हा अन ज्यो कई भी परमेसर वाँने देबा को वादो किदो हो, वो हारोई वाँने मल्यो। वणा नार का मुण्डा ने बन्द कर दिदा हा।

³⁴ भभकती तकी वादी ने बजा दिदी, अन तरवार की धारऊँ बंचग्या। वीं कमजोर वेता तका भी जोरवार बणग्या अन जद्याँ वीं राजावाँ का हाते लड़्या तद्याँ भी वीं तागतऊँ जितग्या अन दूजाँ देस की फोज ने बखेर दिदी।

³⁵ विस्वासऊँ लुगायाँ आपणाँ मरिया तका ने ईंका केड़े जीवता देक्या। नरई मनकाँ ने हताया ग्या, पण वीं छुटबाऊँ नटग्या ताँके वीं मरिया केड़े पाच्छा जीवता वेन ओरी बड़िया जीवन ने मेसूस करे।

³⁶ घणा की मजाक किदी गी अन घणा के कोड़ा मेल्या, घणा ने हाकळाऊँ बांद्‍या अन घणा केद में नाक दिदा अन यो करन वाँने परक्या।

³⁷ घणा के भाटा की ठोकन मार दिदा, घणा ने आरीऊँ चिरिया ग्या, वाँने तरवारऊँ मारिया अन बकरिया अन गारा की खाळ ओड़न अटने-वटने फरता फरिया, वीं कंगाळ की दसा में, कळेस में, दुक जेलता तका,

³⁸ वीं हुन्ना काकड़ में, मंगरा में, अन गुफा में, अन धरती पे पड़्या तका खाड़ा खोसराँ में लकता फरिया। काँके या दनियाँ वाँके लायक कोयने हो।

³⁹ वणाके विस्वास करबा की वजेऊँ वाँकी बड़ई किदी गी, पच्छे भी वाकामूँ किंने भी वादो किदी तकी चीज ने मली।

⁴⁰ परमेसर का नके आपणी ओजणा का जस्यान आपणाँ का वाते ओरी हव बात ही, ताँके वाँ आपणे बना सिद ने वे सके।