गलातियों 2 - नुवो नेम (मेवड़ी नया नियम)

दूजाँ थरप्या तका चेला को पोलुस ने मानणो

¹ पछे मूँ चवदा वर केड़े बरनबास ने हाते लेन पाछो यरूसलेम ग्यो, अन तीतूस ने भी हाते लेग्यो।

² अन मारो वटे जाणो परमेसर की पुवितर आत्मा के केबाऊँ व्यो, ज्यो हव हमच्यार को परच्यार मूँ ज्यो यहूदी ने हे वाँका में करूँ, वणी हमच्यार का बारा में छानेकूँ वाँने बता दिदो जीं मण्डली में मोटा हमज्या जाता हा, मूँ वटे ईं वाते ग्यो काँके परमेसर मने दरसण दिदो हो के, मने वटे जाणो छावे, ताँके अस्यो ने वे, ज्यो काम में पेला किदो अन ज्यो अबाणू कररियो, वो फोगट को ठेरे।

³ वटे अस्यान व्यो के, तीतूस ज्यो मारा हाते हो, ज्यो युनानी हो, पछे भी वणा वींने खतनो करावा का वाते भी ने क्यो हो।

⁴ अन यो वणा जूटा भायाँ ज्यो छानेकूँ आपणाँ बचमें आग्या हाँ ताँके ज्यो आजादी आपाँने आपणाँ मसी ईसू की दयाऊँ मली वींको भेद लेन माँने दास बणा सके।

⁵ ईं वाते माँ एक घड़ी तईं भी वाँका गुलाम ने रिया, ताँके हव हमच्यार को हाँच थाँका पे बण्यो रेवे।

⁶ पछे ज्यो मनक कई हमज्या जाता हाँ, वाँकाऊँ मने कई ने मल्यो। वीं मनक कस्या भी हे, मने वाँकाऊँ कई लेणो-देणो कोयने, काँके परमेसर किंको भेद-भाव ने करे हे, वीं मान्याँ तका मनक मारा में कन मारे हुणाया ग्या हव हमच्यार में कई कमी ने निकाळ सक्या।

⁷ पण ईंका हामे वीं मानग्या के, जस्यान यहूदी मनकाँ में हव हमच्यार हुणाबा को काम परमेसर पतरस ने हुप्यो हे, वस्यानीस जीं यहूदी ने हे वणा मनकाँ में हव हमच्यार हुणाबा को काम मने हुप्यो ग्यो हे।

⁸ काँके जणा पतरसऊँ यहूदी मनकाँ में परच्यार को काम मोटा रूपऊँ करवायो, वस्यानीस वणा माराऊँ भी ज्यो यहूदी ने हे वणा लोगाँ में काम करवायो।

⁹ अन जदी वणा मारा में परमेसर की दया को वरदान जाणग्या, तो याकूब, केफा अन यहुन्ना जीं मण्डली का मुक्या हमज्या जाता हा, वणा मारा अन बरनबास का हाते हात मला लिदो के, माँ जी यहूदी ने हे वणा मनकाँ में हव हमच्यार ने हुणावा का वाते जावा, अन वीं यहूदी का नके जावे।

¹⁰ वणा माँने बेस ओ क्यो के, माँ गरीबा को ध्यान राका अन अणी काम का वाते तो मूँ खुद भी घणी कोसीस करूँ हूँ।

पोलुस को पतरस ने तापड़णो

¹¹ पछे जदी केफा अन्ताक्या का नगर में आयो तो में वींने तापड़्यो, काँके ज्यो काम वो कररियो हो वो गलत हो।

¹² काँके वो याकूब का आड़ीऊँ खन्दाया तका मनकाँ के आबाऊँ पेल्याँ वो जीं यहूदी ने हे वाँका हाते खातो-पितो हो, पण जद्याँ वीं आग्या तो वो वणा मनकाँऊँ दरपीन जीं ज्यो यहूदी ने हे वाँको खतना करणो छावता हाँ, वणा मनकाऊँ छेटी रेवा लागो।

¹³ अन दूजाँ यहूदी मनक भी वींका हाते दिकावो किदो हो, अटा तईं बरनबास भी वींका दिकावा में आग्यो।

¹⁴ पछे जदी में देक्यो के, वीं हव हमच्यार का गेला पे ने चालरियो हे, तो में हाराई का हामे केफाऊँ क्यो, “जद्याँ थूँ यहूदी वेन ज्यो यहूदी ने हे वाँके जस्यान चालरियो हे अन थूँ यहूदी वेन हव हमच्यार का गेला पे ने चाले तो ज्यो यहूदी ने हे वाँने हव हमच्यार का गेला पे चालबा वाते काँ केवे हे?”

विस्वासऊँ धरमी बणणो

¹⁵ आपाँ तो जनमऊँ यहूदी हाँ, आपणो जी यहूदी ने हे वणा पाप्याऊँ कई काम ने हे।

¹⁶ पछे भी आपाँ यो जाणा हे के, कुई मनक मूसा का नेमाऊँ ने पण ईसू मसी पे विस्वास करबाऊँ धरमी बणे हे। आपाँ ईं वाते ईसू मसी पे विस्वास किदो के आपाँ मूसा का नेमाऊँ ने पण ईसू मसी का विस्वासऊँ धरमी बणन रेवा, काँके मूसा का नेमाऊँ कुई मनक धरमी बणन ने रे सके हे।

¹⁷ यद्याँ आपाँ ईसू मसी का गट-जोड़ में धरमी वेणा छावाँ अन मूसा का नेम आपाँने पापी बतावे तो कई ईंको यो मतलब के, मसी पाप को दास हे? कदी ने हे

¹⁸ काँके जणा नेमाँ ने में बणाया अन वाँने में छोड़ दिदा अन यद्याँ मूँ पाछो वाँको परच्यार करूँ तो मूँ आग्या का विरोद में गुनेगार ठेरूँ हूँ।

¹⁹ काँके मूँ तो नेमा का जस्यान नेमाँ में मरयो ताँके मूँ परमेसर की आत्मा में पाछो जीवू, मूँ मसी का हाते हूळी पे चड़ायो ग्यो हूँ।

²⁰ मूँ अबे जीवतो कोयने हूँ, पण मूँ ईसू मसी में जीवतो हूँ अन मूँ अणी देह में जीवतो हूँ तो बेस ईसू पे विस्वास करबा का मस जीवतो हूँ, ज्यो परमेसर को बेटो हो अन वणी माराऊँ अतरो परेम किदो के, आपणाँ खुद ने मारा वाते दे दिदो।

²¹ मूँ परमेसर का अनुगरे ने बेकार ने जाणूँ हूँ, काँके यद्याँ मनक मूसा का नेमाऊँ धरमी वेता, तो ईसू मसी को मरणो बेकार वेतो।