इपिसियों 5 - नुवो नेम (मेवड़ी नया नियम)

ऊजळा मनकाँ का जस्यान जीवो

¹ ईं वाते लाड़ला छोरा-छोरी के जस्यान ज्यो परमेसर करे वस्यानीस करो।

² मसी थाँकाऊँ परेम किदो अन आपणाँ वाते परमेसर का हामे हव लागबा वाळी बली वेग्यो अन खुद ने भेंट चढा दिदो। वाँके जस्यानीस परेमऊँ रो।

³ थाँ तो परमेसर का मनक हो, ईं वाते थाँकामें कुकरम, कणी तरिया का हूँगला काम अन लोब-लाळच अस्सी बाताँ का बात-बच्यार भी थाँका बचमें ने वेणो छावे।

⁴ लाज अन फोगट की बाताँ अन हूँगला चुटकला की बाताँ थाँका बचमें ने वेणी छावे, पण वाँकी जगाँ पे थाँने धन्नेवाद देणो छावे।

⁵ थाँने ओ जाणणो हे के, कुकरमी, हूँगला मनक, अन लोबी मनक ज्यो मूरत पुजा करबावाळा का जस्यान हे अस्या मनकाँ का वाते मसी अन परमेसर का राज में बापोती कोयने हे।

⁶ कुई थाँने फोगट की बाताँऊँ धोको ने दे, काँके ईं कामाँ का मस परमेसर की रीस वींकी आग्या ने, ने मानबावाळा पे भड़के हे।

⁷ ईं वाते थाँ वाँका काम में भेळा मती रेज्यो।

⁸ काँके थाँ तो पेल्याँ अन्दारो हा, पण अबे परबू का गट-जोड़ में थाँ उजाळो हो, ईं वाते उजाळो का मनकाँ का जस्यान चालो।

⁹ काँके उजाळा को फळ हाराई तरियाँ की भलई, ज्यो परमेसर छावे वो करणो अन हाँच हे।

¹⁰ अन ओ परको के, परबू ने कई हव लागे हे।

¹¹ वणा अन्दारा का कामाँ में भेळा मती वो, पण वणा कामाँ ने चोड़े करो।

¹² काँके अस्या काम ज्याँने वीं छाने करे हे वाँ काम का बारा में बात करणी भी हरम की बात हे।

¹³ वीं हाराई काम उजाळाऊँ चोड़े वेन हारई का हामे आवे हे।

¹⁴ काँके उजाळोईस हे ज्यो हाराई ने चोड़े करे हे। ईं मस अस्यान केवे हे, “ओ हुबावाळा, बेटो वे अन मरिया मूँ जीवतो वेजा, तो मसी को ऊजासो थाँरा पे चमकी।”

¹⁵ ईं वाते ध्यानऊँ देको के, कस्यी चाल चालो हो, बना ग्यान का जस्यान ने पण अकलमन्दा का जस्यान चालो।

¹⁶ हाराई मोका ने हव तरियाऊँ काम में लो, काँके दन बोदा हे।

¹⁷ ईं मस बना अकल का मती बणो, पण ध्यानऊँ हमजो के, परबू की मरजी कई हे।

¹⁸ दारुँड़ीया मती बणो, काँके ईंऊँ नागाईपणो वेवे हे, पण आत्माऊँ भर जावो।

¹⁹ अन थाँ भजन, आत्मिक गीत अन परबू की बड़ई का गीत एक-दूँजा का वाते गावो अन आपणाँ-आपणाँ हरदाऊँ परबू का वाते भजन-भाव करता रो।

²⁰ अन हरदाण हारी बाताँ का वाते आपणाँ परबू ईसू मसी का नामऊँ आपणाँ बापू परमेसर को धन्नेवाद करता रेवो।

धणी अन लुगई

²¹ थाँ मसी को आदर-मान राको हो, ईं वाते एक-दूँजा को केणो मानो।

²² ओ लुगायाँ, आपणाँ-आपणाँ धणी का केवाँ में रेवो जस्यान परबू का।

²³ काँके जस्यान मसी मण्डली को मुक्यो हे, वस्यानीस लुगई पे धणी को अदिकार हे अन विस्वास्याँ की मण्डली मसी को डील हे अन मसी मण्डली ने बंचाबावाळो हे।

²⁴ जस्यान मण्डली मसी का केवा में रेवे हे, वस्यानीस लुगायाँ भी हारी बाताँ में आपणाँ-आपणाँ धणी का केवा में रेणी छावे।

^25-26 ओ धण्या, जस्यान मसी मण्डळीऊँ परेम राकन, वींने पाणी अन वसनऊँ धोन पुवितर बणाबा का वाते आपणाँ खुद ने बली कर दिदो। वस्यानीस थाँ भी आपणी-आपणी लुगायाऊँ परेम राको।

²⁷ ताँके मसी वणी मण्डली ने अस्यी पुवितर अन बना दोस की बणान सजी-धजी तकी आपणाँ हामे लावे, ज्यामें ने कळंक, ने हळ, ने कई अस्यी कमी वे।

²⁸ अणीस तरिया धणी आपणी-आपणी लुगईऊँ आपणाँ डील का जस्यान परेम राकणो छावे। ज्यो आपणी लुगईऊँ परेम राके हे, वो आपणाँ खुदऊँ परेम राके हे।

²⁹ काँके कणी भी कदीई आपणाँ डीलऊँ दसमणी ने राकी हे। जस्यान मसी मण्डली को पालण करन हार-हमाळ करे हे वस्यानीस थाँने भी आपणाँ डील को पालण करन हार-हमाळ करणो छावे,

³⁰ काँके आपाँ वाँका डील का अंग हा।

³¹ सास्तर केवे हे के, “ईं वाते मनक आपणाँ बई-बापू ने छोड़न आपणी लुगईऊँ मल्यो रेई, अन वीं दुई एक डील रेई।”

³² ओ भेंद तो मोटो हे, पण मूँ ईंने मसी अन मण्डली का बारा में केवूँ हूँ।

³³ पण थाँ मूँ हाराई आपणी लुगईऊँ आपणाँ जस्यान परेम राको अन लुगई भी आपणाँ धणी को आदर-मान करे।