इपिसियों 4 - नुवो नेम (मेवड़ी नया नियम)

मसी का डील में एकता

¹ ईं वाते मूँ ज्यो परबू की सेवा का वाते बन्दयो तको हूँ, थाँकाऊँ हाता-जोड़ी करूँ हूँ के, जीं मनसाऊँ परमेसर थाँने बलाया, वींके जस्यानीस चाल चालो।

² ईंको मतलब दीनता अन नरमाई का हाते सेण करबा की तागत राकन परेमऊँ एक दूजाँ ने सेण करो।

³ पुवितर आत्मा एकता देवे हे, वींने बणी रेवा का वाते गट-जोड़ करबावाळी सान्तीऊँ थाँ जतरो भी कर सको हो वतरो करो।

⁴ जस्यान के एकीस डील अन एकीस आत्मा हे वस्यानीस एकीस आस हे जिंका वाते परमेसर थाँने बलाया हे।

⁵ एकई परबू हे, एकई विस्वास हे अन एकीस बतिस्मो,

⁶ एकीस परमेसर हे अन वींइस हाराई का बापू हे। हाराई का मालिक भी वींइस हे, हाराई में वींइस काम करे हे अन हाराई में बसे हे।

⁷ मसी जस्यान छाया वणीस नापऊँ आपाँ हाराई ने एक खास वरदान दिदो।

⁸ ईं वाते सास्तर केवे हे के, “वो ऊँसी जगाँ में ग्यो, बन्दीया तका ने आपणाँ हाते लेग्यो, अन मनकाँ ने वरदान दिदा।”

⁹ वींको ऊँसी जगाँ में जाबा को मतलब कई हे। बेस ओ हे के, वो पेल्याँ पाताळ में उतरियो हो।

¹⁰ अन ज्यो रेटे उतरियो हो, वो वोईस हे ज्यो आकासऊँ ऊपरे भी चड़ग्यो के, हारी चिजाँ ने भर सके।

¹¹ वाँकाणी किंनेई तो थरप्या तका वेबा का वाते, अन किंनेई परमेसर का आड़ीऊँ बोलबावाळा, किंनेई तो हव हमच्यार हुणाबावाळा, अन किंनेई तो परमेसर का मनकाँ का गवाळ अन किंनेई हिकाबावाळा बणाया।

¹² वणा ओ ईं वाते किदो के, वी हाराई पुवितर मनकाँ ने सेवा करबा का वाते त्यार करे ताँके मसी को डील तकड़ो वेतो जावे।

¹³ ओ तद्याँ तईं वेई जद्याँ तईं आपाँ हाराई विस्वास में अन परमेसर का बेटा का ग्यान में एक कोयने वे जावाँ अन मसी का हारई गुण में पाका कोयने वे जावाँ।

¹⁴ जणीऊँ आपीं आगे बाळक कोयने रेवा, ज्यो ठग मनक की ठग-वद्‍याँ अन चतुराईऊँ, भेंम की बाताँ अन छळ का उपदेस का वइराऊँ ऊछाळ्यो जावे हे अन अटने-वटने भटके हे।

¹⁵ पण माँकाणी परेम का हाते हाँचा बोलता तका हारई तरियाऊँ मसी ज्यो मातो हे जिंको मतलब मण्डली को मुक्यो, वींमें वदता जावाँ।

¹⁶ मसी का केवा में हरेक टेको देबावाळा जोड़ऊँ डील का हाराई अंग जोड़्या जावे अन एक वेजावे हे। ईं वाते जद्याँ हरेक अंग आपणो आपणो काम करे तद्याँ आको डील वदतो जावे हे अन वो परेम में भी वदे हे।

मसी में नुवो जीवन

¹⁷ मूँ ईं वाते ओ केवूँ हूँ अन परबू का नाम में थाँने हेंचेत करूँ हूँ के, ज्यो विस्वास ने करे हे वाँके जस्यान अबे कदी भी जीवन ने जीवो, जिंको बच्यार कई काम को ने हे।

¹⁸ वीं बना हमज का हे अन परमेसरऊँ मलबावाळा जीवनऊँ घणा छेटी हे, काँके वाँकी अकल अंदकारऊँ भरी तकी हे अन वाँका मन कल्डा वेग्या हे।

¹⁹ हरम की भावना वाँका में ने ही अन वाँकाणी खुद ने हूँगला कामाँ में उळजा दिदा अन अस्या अवारा कामाँ ने हमेस्यान करबा की मरजी राकता हा।

²⁰ पण मसी का बारा में ज्यो थाँ हिक्यो हे, वो तो अस्यो ने हे।

²¹ थाँ पको ईसू का बारा में हुण्यो अन वींका बारा में थाँने भणाया भी ग्या हा के, हाँच ईसू में वास करे हे।

²² थाँके पाला जीवन को चालचलन ज्यो धोको देबावाळी मरजीऊँ बगड़ग्यो हे, वींने छोड़बा का वाते थाँने हिकायो ग्यो हो।

²³ जणीऊँ थाँको मन अन आत्मा बदलन नुवी वेणी छावे।

²⁴ अन थाँ नुवा चालचलन ने पेरलो, ज्यो परमेसर का गुण का जस्यान रच्यो ग्यो हे अन ज्यो हाँची में पुवितर अन परमेसर का हामे सई हे।

²⁵ ईं वाते थाँ जूट बोलणो छोड़ दो। आपणाँ हण्डाळ्याऊँ हारई ने हाँच बोलणो छावे, काँके आपाँ हाराई एकीस डील का अंग हाँ।

²⁶ रीस में आन पाप मती करो अन दन आत्याँ पेल्याइस आपणी रीस ने खतम कर दो।

²⁷ सेतान ने मोको मती दो के, वो थाँने पाप में नाक दे।

²⁸ ज्यो चोरी करतो आरियो हे, वो अबे कदीई चोरी ने करे, पण ईंका बदले वींने स्यवकार वेन खुद की मेनतऊँ काम करणो छावे। ईंऊँ वो जिंने जरूत हे वींने भी दे सके।

²⁹ थाँका मुण्डाऊँ कई नकसाण करबावाळी बाताँ ने निकळणी छावे, पण लोगाँ के धिज्यो बंदाबा का वाते ज्याँने जरूत हे, अस्यी हव बाताँइस निकळणी छावे, ताँके ज्यो हुणे वाँको भलो वे।

³⁰ परमेसर की पुवितर आत्माने दकी मती करो, काँके छुड़ाबा के दन का वाते वा खुद छाप थाँका पे लागी हे।

³¹ हारी कड़वाहट, गुस्सो अन रीस, लड़ई, गाळ्याँ देणो, अन हारी बुरई ने छोड़ दो।

³² एक दूजाँ का वाते करपा वाळा अन दयाळू बणो अन एक दूजाँ का गुना ने वस्यानीस माप करो जस्यान परमेसर थाँने मसीऊँ माप किदा।