इपिसियों 2 - नुवो नेम (मेवड़ी नया नियम)

मोतऊँ जीवन आड़ी

¹ एक टेम ही, जद्याँ थाँ आपणाँ गुना अन पापाँ का मस आत्मिक जीवन में मरिया तका हा।

² थाँ पेल्याँ दनियाँ का हूँगला नेमा पे चालता हा। अन वीं वादळा की आत्मिक सगत्याँ का राजा ने मानता हा, ज्यो आत्मा लोगाँ ने अबे परमेसर को मान ने करबा का वाते मजबूर करती ही।

³ पेल्याँ आपाँ हारई भी वाँके जस्यान आपणाँ डील की हुगली मनसा के जस्यान दन बिताता हा, डील अन मन की मरजी पुरी करता हा अन दूजाँ लोगाँ के जस्यान परमेसर का दण्ड के जोगा हा।

⁴ परमेसर की दया घणी मोटी हे अन वाँको परेम आपणाँ वाते घणो मोटो हे।

⁵ जद्याँ आपाँ गुना का मस आत्मिक जीवन में मरिया तका हा, तो आपाँने मसी का हाते जिवाया। वाँकी करपाऊँ थाँ बंचाया ग्या हो।

⁶ आपणो ईसू मसी का हाते गट-जोड़ हो, ईं वाते परमेसर आपाँने ईसू मसी का हाते पाच्छा जीवता कर दिदा अन हरग में वाँके नके बेठाया।

⁷ अणा अस्यान किदो ताँके वो आबावाळा जुग में दया का हाते ईसू मसीऊँ ओ दिकाई के खुद की करपा ज्यो आपाँने दिकई ही वा कतरीक हेली हे।

^8-9 काँके थाँ विस्वास का मस करपाऊँ बंचाया ग्या हो। अन ओ थाँके करमा को फळ कोयने पण ओ तो परमेसर को दान हे। ईं वाते अणीऊँ कुई मेपणो ने कर सके हे।

¹⁰ काँके आपीं वींका बणाया ग्या हा अन ईसू मसी का गट-जोड़ऊँ वणा भला कामाँ वाते बणाया ग्या हाँ ज्याँने परमेसर पेल्याई आपणे करबा का वाते त्यार किदा।

मसी में एक

¹¹ ईं वाते आद करो के थाँ जनमऊँ यहूदी ने हो। डील में मनकाँ का हाताऊँ खतनो किदा तका यहूदी मनक आपणाँ खतना पे मेपणो करे हे अन थाँने बना खतना का केवे हे।

¹² वीं टेम थाँ मसी ने जाणता ने हा। थाँ पराया हा मतलब परमेसर का चुण्या तका इजराएली कोयने हा। परमेसर का दिदा तका वादा के करार का भागीदार ने हा अन ईं दनियाँ में बना आस अन बना परमेसर को जीवन जीरिया हा।

¹³ पण थाँ ज्यो पेल्याँ परमेसरऊँ छेटी हा, अबे ईसू मसी का गट-जोड़ में, मसी की मोतऊँ भड़े लाया ग्या हो।

¹⁴ काँके वणीस यहूदी अन ज्यो यहूदी ने हा वाँने मेल-मिलाप करन एक बणा दिदा अन वाँका डीलऊँ वाँ दुयाँ ने अलग करबावाळी दसमणी की भींत ने धड़ई दिदी।

¹⁵ वणा मूसा का नेम अन वींका काण-कायदा का हाते मटा दिदा हे ताँके वो दुयाँ ने आपणाँ गट-जोड़ऊँ एक नुवो मनक बणावे अन मेल-मिलाप करे।

¹⁶ अन हूळी पे बेर ने नास करन दुया ने एक डील बणान परमेसरऊँ पाछो मेल-मिलाप कर दिदो।

¹⁷ वाँकाणी आन थाँने ज्यो छेटी हा अन वाँने ज्यो भड़े हा, मेल-मिलाप करबावाळो हव हमच्यार हुणायो।

¹⁸ काँके मसीऊँइस आपीं दुई एक पुवितर आत्माऊँ बापू परमेसर का नके पोछ सका।

¹⁹ ईं वाते थाँ अबे पराया अन परदेसी ने हो, पण पुवितर लोगाँ का हाते परमेसर के राज का रेवासी अन वाँके घर का वेग्या हो।

²⁰ थाँ अस्यो एक मेल हो जणी की नीम थरप्या तका अन परमेसर का आड़ीऊँ बोलबावाळा हे, अन वींके नासीक को भाटो खुद ईसू मसी हे।

²¹ वणी मेंईस मेल की हारी चिजाँ एक हाते मलन परबू का वाते एक पुवितर मन्दर बणती जारी हे।

²² वाँके हाते गट-जोड़ऊँ आपाँ हाराई भी परमेसर का वाते पुवितर आत्माऊँ वाँके रेवा को मेल बणाया जारिया हो।