कुलुसियों 4 - नुवो नेम (मेवड़ी नया नियम)

¹ ओ मालिकाँ, आपणाँ-आपणाँ हाळयाँ का हाते सई वेवार राको अन हाराई ने एक हरिका राको, ओ हमजन के, हरग में थाँको भी एक मालिक हे।

विस्वास्याँ का वाते पोलुस की सला

² थाँ हेंचेत रेन परमेसर को धन्नेवाद करता रेवो अन परातना करता रेवो।

³ अन ईंका हातेई हाते माकाँ वाते भी परातना करता रेवो के, परमेसर माँके परच्यार करबा को अस्यो गेला खोल देवे के, माँ मसी का वीं भेद को बखाण कर सका। अन परच्यार करबा के मस मूँ जेल में बन्द हूँ।

⁴ अन ईंका वाते भी परातना करज्यो के, मूँ वीं भेद ने अस्यान परगट करूँ, जस्यान मने करणो छावे।

⁵ हाराई मोका ने हव तरियाऊँ काम में लेता तका अविस्वासी मनकाँ का हाते हव अकलऊँ वेवार करो।

⁶ थाँकी बोली हरदाण दयाळू अन मिठी वे, ताँके थाँ जाण सको के, हाराई मनकाँ ने कस्यान जवाब देणो हे।

आकरी नमस्कार

⁷ प्यारा भई अन विस्वासी दास, तुखिकुस ज्यो परबू में मारा हाते सेवा करबावाळो हे, वो मारी हारी बाताँ थाँने बता देई।

⁸ में वींने थाँका नके ईं वाते खन्दायो के, वो थाँने माकाँ हमच्यार देवे अन थाँकी हिम्मत बड़ावे।

⁹ वींका हाते विस्वास जोगो अन लाड़लो भई उनेसिमुस भी आरियो हे। वो थाँका मेईलोईस हे। वीं दुई अटा की हारी बाताँ थाँने बताई।

¹⁰ मारा हाते का केदी अरिस्तखुस भी थाँने आद कररियो हे वस्यानीस बरनबास को भई मरकुस भी थाँने आद करे हे। (जद्याँ मरकुस थाँका नके आई तो थाँ वींकी आवभगत करज्यो ईंका वाते में थाँने पेल्याँई आदेस दे दिदो हो।)

¹¹ अन यसू जिंने युसतुस भी बोले हे। वो थाँने आद कररियो हे। मारा नके बेस ईं तीन ईंस यहूदी विस्वासी मनक हे ज्यो परमेसर की राज की बढोतरी का वाते मारा हाते काम करे हे। अणा मारी घणी मदत किदी हे।

¹² इपफरास, ज्यो थाँका मेईलोईस हे अन मसी ईसू को दास हे, वो थाँने आद कररियो हे अन हरदाण थाँका वाते आका मनऊँ परातना करे हे। जणीऊँ थाँ हमजदारी अन पूरा भरोसा का हाते परमेसर की मरजी में अटल रेवो।

¹³ मूँ वींको गुवा हूँ के, वो थाँका वाते अन लोदकिया अन हियारापलिस नगर का लोगाँ का वाते घणी मेनत करे हे।

¹⁴ लाड़लो वेद लूको अन देमास भी थाँने आद कररिया हे।

¹⁵ लोदकिया का रेबावाळा भायाँ ने अन नुमफास अन वाँका घर भेळी वेबावाळी मण्डली ने भी माँ आद कराँ हाँ।

¹⁶ जद्याँ ओ कागद थाँका अटे भण लिदो जावे तो अस्यो करज्यो के, लोदकिया की मण्डली में भी भणाज्यो, अन ज्यो कागद लोदकियाऊँ आयो हे वींने थाँ भी भणज्यो।

¹⁷ अन अर्खिप्पुसऊँ केज्यो के, ज्यो सेवा परबू में वींने हूँपी हे, वींने वो जरुर पुरी करे।

¹⁸ मूँ ज्यो पोलुस खुद थाँने नमस्कार लिकरियो हूँ। मारी हतकड़ीया आद राकज्यो। परमेसर की दया थाँका पे वेती रेवे। आमीन।