कुलुसियों 2 - नुवो नेम (मेवड़ी नया नियम)

¹ मूँ छावूँ हूँ के, थाँकाणी जाण लो के, “थाँके अन ज्यो लोदकिया नगर में हे, अन वाँकाणी हंगळा का वाते जणा मारो मुण्डो कदी ने देक्यो के, वाँका वाते मूँ कस्यान मेनत कररियो हूँ?

² मूँ यो ईं वाते करूँ हूँ, ताँके वाँका मन ने हिम्मत मले अन थाँ आपस में परेमऊँ बन्द जावो, जणीऊँ थाँ पुरी हमजऊँ हारोई धन पा लेवो अन बापू परमेसर का भेदऊँ भररियो हाँच ने, मतलब ईसू मसी ने जाण ले।

³ मसी में हाराई ग्यान अन हमज का भण्डार हप्या तका हे।”

⁴ यो मूँ थाँने ईं वाते केवूँ के, “कुई मनक थाँने हव हव बाताँ करन धोको ने दे देवे।”

⁵ काँके यद्याँ मूँ देहऊँ तो थाँकाऊँ छेटी हूँ, तद्याँ भी मूँ आत्माऊँ तो थाँके नके हूँ, अन थाँको वेवार अन विस्वास ज्यो मसी में गाटो हे, वणीऊँ मूँ घणो राजी वेवूँ हूँ।

मसी का जस्यान जीवणो

⁶ जस्यान थाँकाणी ईसू मसी ने परबू मानन गरण किदा हाँ, वस्यानीस वींका विस्वास मेंईस चालता रेवो।

⁷ अन वींका मेंईस थाँ जड़ गाटी पकड़ीन बड़ता जावो अन थाँका जीवन का विस्वास की नीम वटेईस नाको अन हेलऊँ हेलो परमेसर ने धन्नेवाद करता रेवो।

⁸ हूँस्यार रेज्यो, कुई थाँने अकलऊँ अन धोकाऊँ आपणाँ गुलाम ने बणा ले, ज्यो मनकाँ का रिति-रिवाजऊँ अन दनियाँ की बाताँ के जस्यान तो हे, पण ईसू मसी के जस्यान कोयने।

⁹ काँके मसी की देह मेंईस परमेसर आपणी हाराई गुणा का हाते हमेस्या का वाते वास करे हे।

¹⁰ अन थाँ वींका मेंईस पाका व्या तका हो, ज्यो हाराई परदानाँ अन आत्मिक सगत्याऊँ घणो मोटो हे।

¹¹ वींका मेंईस थाँको अस्यो हाँचो खतनो व्यो, ज्यो हातऊँ ने वेवे हे पण मसी को खतनो, जिंका में सारिरिक देह की हारी बुरी मरजी उतार दिदी जावे हे।

¹² अन मसी का हाते बतिस्मा में आपीं भी गाड़या ग्या अन परमेसर की तागत पे विस्वास करबा की वजेऊँ आपाँ भी मसी का हाते जिवाया ग्या हा, जणी तागत ईसू मसी ने मरिया तकाँ मेंऊँ पाच्छा जीवता किदा हा।

¹³ मसी पे विस्वास करबा के पेल्याँ आपीं आपणाँ पापाँ की वजेऊँ आत्मा में मरिया तका अन बना खतना का हा। पण अबे परमेसर आपाँने ईसू मसी का हाते पाच्छा जिवाया अन आपणाँ हाराई पापाँ ने माप किदा हे।

¹⁴ अन नेमाँ का वीं लेकऊ ज्यो आपणाँ हामे अन दसमण हो, वाँने वगाड़ी नाक्या, अन वाँने ईसू हूळी पे खिला ठोकन आपणाँ हामेंऊँ छेटी कर नाक्यो।

¹⁵ अन हाराई बुरा आत्मिक परदानाँ अन बुरी सगत्याँ का हत्यार कोसन हूळीऊँ वाँको हाराई का हामे तमास्यो किदो अन वाँने आपणे पाच्छे कर नाक्या अन जीत को जुलस काड़्यो।

¹⁶ ईं वाते खाबा-पिबा अन तेवार अन नवो चाँद अन सबद का दनाँ में कुई थाँको फेसलो ने करे।

¹⁷ काँके ईं हाराई आबावाळी बाताँ की खाली छाया हे, पण ईं हंगळी चिजाँ में हाँच तो ईसू मसी हे।

¹⁸ कुई मनक दया को दिकावो करन हरग-दुताँ की पुजा करन थाँने थाँका फळऊँ छेटी ने कर दे। अस्यान मनक देकी तकी बाताँ में लाग्या तका रेवे, अन आपणी दनियादारी की हमज ने बेकार में फुलावे अन बड़ावे हे।

¹⁹ अन वीं आपणाँ खुद ने मसी का केबा में ने राके हे ज्यो हाराऊँ मोटो हे। मसी का वजेऊँ हारी काया ज्योड़ अन हाड़क्याऊँ मलन जस्यान परमेसर छावे हे वस्यान बड़ती जावे।

मसी का हाते जीवणो अन मरणो

²⁰ जद्याँ के, थाँ मसी का हाते दनियाँ का रिति-रिवाज के आड़ीऊँ मरग्या हो, तो पछे काँ वणाके जस्यान ईं दनियाँ का रिवाजाँ में जीवन बितारियाँ हो?

²¹ थाँ अस्या नेमा का वंस में काँ रेरिया हो? जस्यान के, “ईंने ने तोकणो, ईंने ने चाकणो अन ईंके हात भी ने लगाणो।”

²² ईं हंगळी चिजाँ काम में आती आती नास वे जाई, काँके ईं मनकाँ का बणाया तका नेम अन हिक हे।

²³ हरग-दुताँ की पुजा करणी, आपणी देह ने दुक देणो, दिकावा की दया अन मनकाँ का बणाया तका जूटा नेम, ईं हाराई ग्यान की बाताँ तो लावे हे, पण देह की बुरी मरजी ने रोकबा का वाते अणाऊँ कई नफो ने वेवे हे।