थरप्या तका का काम 4 - नुवो नेम (मेवड़ी नया नियम)

पतरस अन यहुन्नो यहूदी मोटी सबा में

¹ जद्याँ वीं दुई जणा लोगाऊँ बात-बच्यार कररिया हा, वीं दाण ईं याजक, मन्दर को मुक्यो अन सदुकी लोग वाँका नके आया

² वे वाँ दुई जणाऊँ ईं बात पे रिस्याँ बळरिया हा के, पतरस अन यहुन्नो ईसू के मरिया केड़े पाछो जीवतो वेबा को परच्यार करन मरिया तका को पाछो जीवतो वेबा ने साबत कररिया हा।

³ ईं वाते वाँ वाँने पकड़न बन्दी बणा लिदा अन दूजे दन तईं वाँने जेळ में राक्या हा, काँके हाँज वेगी ही।

⁴ पण, जणा वीं परच्यार ने हुण्यो, वामूँ नरई जणा विस्वास किदो। विस्वास करबावाळा की गणती लगे-भगे पाँचेक हजार पोंछगी ही।

⁵ आगले दन नेता, बुड़ा-ठाड़ा अन यहूदी धरमसास्तरी यरूसलेम में भेळा व्या।

⁶ वीं मोटा याजक हन्ना, केफा, यहुन्ना, सिकन्दर अन मोटा याजकाँ का परवार का दूजाँ जणाऊँ मल्या।

⁷ वे वाँ दुई थरप्या तका ने लाया अन पूँछबा लागा, “थाँकाणी कस्यी सगती अन कस्या हकऊँ ओ काम किदो?”

⁸ तो पतरस का डिले पुवितर आत्मा आन वाँने क्यो, “ओ नेता अन बुड़ा-ठाड़ा लोगाँ,

⁹ जद्याँ आज थाँ माँकाऊँ एक लंगड़ा को भलो करबा के वाते पूँछरिया हो के, ‘वो हव कस्यान व्यो?’

¹⁰ तो थाँ सब जणा अन इजराएल का लोगाँ ने ओ पतो वेणो छावे के, ओ मनक थाँके हामे ईसू मसी नासरी का नामऊँ पुरी तरियाऊँ हव वेन थाँका हामे ऊबो हे, वो ईसू नासरी, जिंने थाँकाणी हूळी पे चड़ा दिदो हो अन परमेसर पाछो वींने मरिया तका मूँ जीवतो कर दिदो।”

¹¹ सास्तर ईसू का बारा में अस्यान केवे हे के, “‘ओ वोईस भाटो हे, जिंने थाँ कारिगराँ नकार दिदो, आज वोईस भाटो खास नीम को बणग्यो हे।’”

¹² बेस वोईस ईसू आपाँने बंचा सके हे, काँके ईं हारी धरती अन लोगाँ में दूजो नाम कोयने हे, जो आपाँने बंचा सके।

¹³ जद्याँ वणा पतरस अन यहुन्ना की हिम्मत देकी अन हमज्या के, वे दुई अणभण्या अन भला मनक हे। तो वाँने घणो अचम्बो व्यो। पछे वे जाणग्या के, ईं दुई ईसू की लारे रे चुक्या हाँ।

¹⁴ अन वे वीं हव व्या तका लंगड़ा मनक ने वाँकी लारे ऊबो देक्यो, तो वाँके हामे बोल ने सक्या।

¹⁵ वाँ वाँने यहूदी सबाऊँ बारणे जाबा वाते क्यो, अन पछे बात-बच्यार करबा लागा के,

¹⁶ “ईं लोगाँ की लारे अबे कई कराँ? काँके यरूसलेम का हारई लोग-बाग ओ जाणे हे के, वाँ घणा अचम्बावाळो परच्यो दिदो हे। अबे आपाँ वाँने नकार भी तो ने सका।

¹⁷ पण, आपाँ आने चेतावणी दे देवाँ के, वीं ईसू का नाम को परच्यार अबे किंका भी हामे ने करे, ताँके लोगाँ में आ बात ओर ने फेले।”

¹⁸ तद्याँ वे वाँने मयने बलाया अन ओ क्यो के, थें कदी भी ईसू का नामऊँ ने तो किंने कई केवो अन नेई उपदेस देवो।

¹⁹ पण, पतरस अन यहुन्ने जबाव दिदो, “थाँईस बतावो, परमेसर का हामे हव कई हे? माँ परमेसर की हुणा कन थाँकी हुणा।

²⁰ अन ओ तो वेई ने सके के, माँ जो कई भी देक्यो अन हुण्यो हे, वींने ने बतावा।”

²¹ तो पछे मोटी सबा का लोगाँ वाँ दुई जणा ने तापड़न छोड़ दिदा। वाँने सजा देबा को कई भी मोको ने मल्यो हो, काँके जो भी व्यो, वींका वाते लोग-बाग परमेसर की मेमा गारिया हाँ।

²² जीं मनक पे आ करपा व्यी ही, वींकी उमर चाळी वराऊँ हेली ही।

विस्वासी लोगाँ की परातना

²³ जद्याँ पतरस अन यहुन्ना ने छोड़ दिदा, तो वे आपणाँ लोग-बागाँ नके आया अन वाँने जो भी यहूदी मोटा याजक अन बुड़ा-ठाड़ा क्यो हो, वो सब वाँने के हुणायो।

²⁴ जद्याँ वाँ लोगाँ ओ हुण्यो, तो वे एक मन वेन परमेसरऊँ कल्ड़ी अवाज में परातना करबा लागा के, “मालिक, थाँईस हो जो आकास, धरती, समन्द अन वीं मयने जो भी हे, वींने बणायो।

²⁵ थाँईस पुवितर आत्माऊँ आपणाँ दास अन माकाँ पुरवज दाऊद का मुण्डाऊँ क्यो हो, “‘अणा ज्यो यहूदी ने हे वा लोगाँ काँ हाका-हूक किदी? अन बेकार में लोगाँ काँ जाळ बचायो?

²⁶ परबू अन वाँका मसी का विरोद में धरती का राजा त्यार वेग्या अन राज करबावाळा दरबार में अगेटा व्या।’”

²⁷ काँके हाँचई में, थाँका पुवितर दास ईसू, जिंको थाँ राजतलक किदो। वींका विरोद में हेरोदेस अन पिलातुस, ज्यो यहूदी ने हा अन इजराएल्याँ की लारे वेन ईं नगर में भेळा व्या।

²⁸ वीं हारोई करबा ने भेळा व्या, ताँके जो पेल्याऊँ थाँकी तागत अन मरजीऊँ पूरो व्यो हो, वो पूरो वेवे।

²⁹ अन अबे ओ परबू, थाँ वाँकी दरपावणी ने देको अन थाँका चेला ने बना दरप्या थाँरा बचन हुणाबा की सगती दो।

³⁰ थूँ थाँरा पुवितर दास ईसू का नामऊँ लोग-बागाँ ने हव करबा के वाते, अचम्बा अन हेन्याणी का काम करबा के वाते आपणो हात बड़ा।

³¹ जद्याँ वणा परातना कर लिदी, तो वाँ जगाँ जटे वे अगेटा व्या हाँ, हालगी। अन वे हारई पुवितर आत्माऊँ भरग्या अन परमेसर का वसना ने बना दरप्याई हुणाबा लागग्या।

विस्वासी लोगाँ खुद का धन-दोलत ने आमी-हामी बाटी

³² हारई विस्वास करबावाळा एक मन अन हरदा का हाँ। अटा तईं के, वे आपणी धन-दोलत ने आपणी ने केता हा, पण हारी चिजाँ वाँका भेळा में ही।

³³ अन वे थरप्या तका परबू ईसू के पाछो जीवतो वेबा की गवई देता अन परमेसर वाँ हाराई ने घणो आसीस दिदो।

³⁴ वाँकी बंच में किंने भी कणी की कमी ने ही, काँके जिंका नके जगाँ अन घर-बार हा, वे वाँने बेंच देता अन वींऊँ जो भी रिप्या-कोड़ी मलता,

³⁵ वाँने लान थरप्या तका का पगाँ में मेल देता। अन जिंने जतरीक जरूत वेती, वीं हस्याबूऊँ एक-दूँजा ने बाँट देता हा।

³⁶ जस्यान के, युसुप नाम को एक लेवी हो, जो साइपरस नाम का देस को हो। थरप्या तका वींको नाम बरनबास राक्यो हो, जिंको मतलब धिजो बंदाबावाळो पूत।

³⁷ वींके खेत हो, जिंने बेंच दिदो अन वींका रिप्या-कोड़ी लान थरप्या तका का पगाँ में मेल दिदा।