थरप्या तका का काम 24 - नुवो नेम (मेवड़ी नया नियम)

राजपाल फेलिक्स के हामे पोलुस को मुकदमो

¹ पाँच दन केड़े मोटा याजक हनन्या अन थोड़ाक मोतबीर अन तिरतुलुस नाम का वकील ने हाते लेन आयो ताँके राजपाल का हामे वो पोलुस का मुकदमा ने पेस कर सके।

² जद्याँ पोलुस ने बलायो तो तिरतुलुस पोलुस पे दोस लगान राजपालऊँ केबा लागो के, “थाँराऊँ माँ घणा सान्तीऊँ रेरिया हा अन माँकी भलई का वाते थाँ ईं देस में घणा हुदार किदा हे।

³ मोटाऊँ मोटा राजपाल फेलिक्स ने माँ हंगळी जगाँ अन हंगळी तरियऊँ धन्नेवाद के हाते मानाँ हा।

⁴ पण ईं बात को थने दुक ने देणो छारियो हूँ, पण थाँराऊँ हात-जोड़न अरज हे के थूँ करपा करन मारी थोड़ीक बाताँ हुणले।

⁵ ईं मनक ने माँ आपत में नाकबावाळो अन हारी दनियाँ का यहूदियाँ में उतम-धड़ा करबावाळो पायो हे। ओ नासरिया का पन्त को मुक्यो हे।

⁶ अणी मन्दर ने भी अबड़ाणो छायो, पण माँ ईंने पकड़ लिदो। (माँ ईंने आपणी वेवस्ता का हस्याबूँ दण्ड देता,

⁷ पण वटा का सेनापती लुसियास अणी ने माकाँ पूँ जोरावरीऊँ कोस लिदो।

⁸ अन सपायाँ ने ईंने थाँरा अटे लाबा को हुकम दिदो।)अणी हंगळी बाताँऊँ, माँ ईंपे दोस लगायो हे, अबे थाँ ईं हारी बात की जाँच खुद कर सको हो।”

⁹ यहूदियाँ मनकाँ भी वणी वकील का हाते रेन क्यो, ईं बाताँ अस्यानीस हे।

फेलिक्स का हामे पोलुस को जवाब

¹⁰ जद्याँ राजपाल पोलुस ने बोलबा के वाते हानी किदी, तो पोलुस क्यो, “मूँ ओ जाणूँ के थाँ नरई वराऊँ अणी देस को न्याव कररिया हो, मूँ राजी वेन मारो जवाब देरियो हूँ।

¹¹ थूँ खुद जाण सके हे के, मने यरूसलेम में परातना करबा ने ग्याने बारा दनईस व्या हे।

¹² वटे मन्दर में मने ने तो किंकई हण्डे माता-फोड़ी करता देक्यो अन नेई यहूदियाँ का परातना घर में कन हाराई नगर में लोगाँ ने उकसाता तका देक्यो।

¹³ अन ने तो ईं मनक जो दोस लगारिया हे वींने साबत कर सके हे।

¹⁴ पण मूँ थाँरा हामे ओ मानूँ हूँ के, जिंने ईं पन्त केवे हे अन खोटो केवे हे, वींका रिति-रिवाजऊँ मूँ आपणाँ बापदादा का परमेसर की सेवा-चाकरी करूँ हूँ, अन जीं बाताँ वेवस्ता अन परमेसर का आड़ीऊँ बोलबावाळा की किताबाँ में लिकी हे, वीं हारी पे मूँ विस्वास करूँ हूँ।

¹⁵ अन परमेसरऊँ अस्यान आस राकूँ हूँ जस्यान ईं लोग राके हे के, धरमी अन पापी दुयाँ को पाछो जी उटणो वेई।

¹⁶ ईं वाते मूँ भी परमेसर अन लोगाँ के हामे हमेस्यान आपणी अंतर आत्माने पुवितर राकबा के वाते कोसीस करतो रेऊँ हूँ।

¹⁷ “नरई वरा केड़े मूँ आपणाँ लोगाँ ने दान देबा वाते अन भेंट चड़ावा वाते यरूसलेम में ग्यो हो।

¹⁸ जद्याँ मूँ यो करीस रियो हो अणा मने मन्दर में पायो, तद्याँ मूँ नेमा का हस्याबूऊँ पुवितर हो अन वटे कुई भीड़ ने ही अन ने कुई हुल्‍लड़ हो।

¹⁹ आसियाऊँ आया तका थोड़ाक यहूदी वटे हा, यद्याँ मारा विरोद में वाँका नके कई बात वे तो वणा ने थाँरा हामे मारा पे दोस लगाणो छावे

²⁰ कन ईं लोगइस बतावे के जद्याँ मूँ राजिपो कराबावाळी सबा के हामे ऊबो हो, तो वाँकाणी मारा पे कई दोस पायो।

²¹ अणी एक बात ने छोड़न ज्या में वाँका बचमें ऊबो वेन की ही, ‘मरिया तका मूँ पाछो जी उठवा का बारा में मारा पे वीं दनऊँ मुकदमो चालरियो हे।’”

²² फेलिक्स राजपाल, जो अणी परमेसर का गेला का बारा में हव तरियाऊँ जाणतो हो, वणी ओ केन बात रोक दिदी के, “जद्याँ सेनापती लुसियास आई, तद्याँ थारी बात को न्याव करूँ।”

²³ अन अदिकारी ने हुकम दिदो के पोलुस ने लेजान थोड़ीक आजादी का हाते रुकाळी करो अन ईंका हण्डाळ्याँ मूँ कुई भी ईंकी मदत करे तो रोकज्यो मती।

फेलिक्स अन वींकी लुगई दुरसिला के हामे पोलुस

²⁴ थोड़ाक दनाँ केड़े फेलिक्स आपणी लुगई दुरसिला ज्या यहूदी ही वींने हाते लेन आयो अन पोलुस को ईसू मसी पे विस्वास का बारा में वींऊँ हुण्यो,

²⁵ जद्याँ वो परमेसर का हामे सई ठेराबावाळी, सबर अन आगे लोगाँ पे आबावाळा न्याव का बारा में केरियो हो, तो फेलिक्स दरपतो तको जवाब दिदो, “अबाणू तो थूँ जा, मोको मली तो मूँ थने पाछो बलाऊँ।”

²⁶ वींने पोलुसऊँ थोड़ाक रिप्या-कोड़ी मलवा की आस ही, ईं वाते वो ओरू भी पोलुस ने बला बलान बाताँ करतो हो,

²⁷ पण जद्याँ दो वर वेग्या तो फेलिक्स की जगाँ परख्युस फेसतुस आयो, अन फेलिक्स यहूदियाँ ने राजी करबा के वाते पोलुस ने जेळ मेंईस छोड़ दिदो।