थरप्या तका का काम 19 - नुवो नेम (मेवड़ी नया नियम)

इपिसुस नगर में पोलुस

¹ जद्याँ अपुलोस कुरिन्तुस नगर में हो, तो पोलुस मईने का इलाकाऊँ वेतो तको इपिसुस में आयो। वटे वणी थोड़ाक चेला ने देक्याँ

² अन वाँने पूँछ्यो, “कई थाँ विस्वास किदो वीं दाण पुवितर आत्माने पई?” वाँकाणी क्यो, “माँ तो पुवितर आत्मा की बात ने हुणीस कोयने।”

³ वणी वाँने पूँछ्यो, “पच्छे थाँ कस्यो बतिस्मो लिदो?” वाँकाणी क्यो, “यहुन्ना को बतिस्मो लिदो”।

⁴ पोलुस वाँकाऊँ क्यो, “जणी पापाऊँ मन फरायो हे वाँका वाते यहुन्ना को बतिस्मो हे अन वणी लोगाँ ने क्यो के, जो माराऊँ केड़े आबावाळो हे, वो ईसू मसी हे, जिंपे थाँ विस्वास करजो”

⁵ ओ हुणन वाँकाणी परबू ईसू मसी का नाम में बतिस्मो लिदो।

⁶ जद्याँ पोलुस वणापे हात राक्यो, तो पुवितर आत्मा वाँके डिले आयो, अन वीं तरे-तरे की बोली ने अन परमेसर का आड़ीऊँ बोलबा लागा।

⁷ ईं हाराई लगे-भगे बारा हा।

⁸ वो वटे यहूदियाँ का परातना घर में जान तीन मिना तईं बना दरप्या बचन बोलतो रियो, अन परमेसर का राज का बारा में बात-बच्यार करन लोगाँ ने हमजातो रियो।

⁹ पण जद्याँ थोड़ाक लोग नसेड़ा वेन वींकी बात पे विस्वास ने किदो अन लोगाँ का हामे परमेसर का गेला का बारा में भलो-बुरो केबा लागा। तो पोलुस वाँने छोड़ दिदा अन चेला ने लारे ले लिदा अन पछे हर-दन तुरनुस नाम की पाटसाला में बात-बच्यार करतो रियो।

¹⁰ दो वर तईं अस्यानीस वेतो रियो, अन अस्यान आसिया में रेबावाळा हंगळा यहूदी अन युनानी लोगाँ परबू का बचन हुण लिदा हा।

इस्किवा का छोरा

¹¹ परमेसर पोलुस का हाताऊँ अचम्बावाळा काम करवाता हा,

¹² अटा तईं के रुमाल अन हस्ताड़ा पोलुस के अड़ान, माँदा मनकाँ के अड़ाता तो वीं हव वे जाता अन हुगली आत्मा भी वाँका मूँ निकळ जाती ही।

¹³ पण थोड़ाक यहूदी जाणकार, जो हरेक जगाँ जान हुगली आत्माने निकाळता हा, वीं भी ईंका वाते परबू ईसू को नाम लेता हा अन केता हा के “जणी ईसू को परच्यार पोलुस करे हे, वींका नामऊँ हुकम दूँ हूँ”।

¹⁴ इस्किवा नाम का एक यहूदी मुक्या याजक के हात छोरा हा, जीं भी अस्यानीस करता हा,

¹⁵ पण हुगली आत्मा वाँने क्यो, “ईसू ने तो माँ जाणा अन पोलुस ने भी ओळका हाँ, पण थाँ कूण हो?”

¹⁶ अन जणी में हुगली आत्मा ही, वो वाँका पे जपट्यो अन वाँने हरा दिदा। वे नागा-पागा अन लोया-जाळ वेन वीं घरऊँ भागग्या।

¹⁷ आ बात इपिसुस में रेबावाळा हंगळा यहूदी अन युनानी जाणग्या, अन दरपबा लागा। परबू ईसू का नाम की बड़ई करबा लागग्या।

¹⁸ जणा विस्वास किदो हो, वीं वटे आन जीं जीं हूँगला काम वे करता हा वाँने हंगळा के हामे मान लिदा।

¹⁹ झाड़-फूक करबावाळा हंगळा जणा आपणाँ पोत्या-पानड़ा लाया अन हंगळा के हामे बाळ नाक्या। वणा पोत्या-पानड़ा का रिप्या जोड़्याग्या तो पचा हजार चाँदी का सिक्का के जतरा व्या।

²⁰ ईं तरियऊँ परबू का बचन सामरतऊँ हरेक जगाँ बड़वा लागी।

इपिसुस में दंगो

²¹ ईं बाताँ व्या केड़े पोलुस आपणी आत्मा में होच्यो के मकिदुनिया अन अखाया वेन यरूसलेम जाऊँ, अन क्यो “वटे जान मने रोम में भी जाणो पड़ी।”

²² ईं वाते वणी आपणी मदत करबावाळा मूँ, तिमुतियुस अन अरास्तुस ने मकिदुनिया खन्दाया अन खुद थोड़ाक दन आसिया में रियो।

²³ वीं टेम इपिसुस में परबू का गेला का बारा में घणो हुल्‍लड़ मच्यो।

²⁴ दिमेत्रियुस नाम को एक होनार चाँदीऊँ, अरतिमिस देवी को मन्दर बणातो हो अन वींका कामाँऊँ कारिगराँ ने हेलो नफो मलतो हो,

²⁵ वणी अस्यी चिजाँ वणाबावाळा कारिगराँ ने भेळा किदा अन क्यो, “हो लोगाँ, थाँ जाणो हो के, आपाँने ओ काम करवाऊँ नरई रिप्या-कोड़ी मले हे।

²⁶ थाँ देक्यो अन हुण्यो भी हे के, बेस इपिसुस मेंईस ने, पण हंगळा आसिया का लोगाँ ने पोलुस ओ केन भोळाया हे के, जीं हाताऊँ घड्या तका देवताँ हे, वींमें परमेसर ने हे।

²⁷ ईंऊँ बेस या एक बातईस की दरप कोयने हे के, आपणो काम धन्धो बदनाम वेई, पण ओ भी के, आपणी पुवितर देवी अरतिमिस का मन्दर ने भी नेजोगो मान्यो जाई अन ईं मोटी देवी की मेमा भी खतम वे जाई, जिंने हंगळा आसिया अन दनियाँ का लोग पूजे हे।”

²⁸ ओ हुणन हंगळा रीस में आग्या अन हाका करन केबा लागा, “इपिसियों की देवी अरतिमिस मोटी हे।”

²⁹ अन हंगळा नगर में हाका-भार वेगी, अन लोगाँ मकिदुनिया का गयुस अन अरिस्तखुस जो पोलुस का हण्डाळ्याँ हा, वाँने पकड़ लिदा, अन हंगळा एक हाते मेदान में आग्या अन भेळा वेग्या।

³⁰ जदी पोलुस लोगाँ का नके जाणो छायो तो चेला वींने जाबा ने दिदो।

³¹ वीं इलाका का थोड़ाक आसिया हाकिमा भी जो पोलुस का हण्डाळ्याँ हा, वणा पोलुस के संदेसो खन्दायो के, वो मेदान में जान कई आपत माते ने ले।

³² वटे सबा में नरई मनक हाका-हूक कररिया हा, अन थोड़ा कई केरिया हा, दूजाँ ओरी कई केरिया हा, काँके वामूँ घणा तो ओ ने जाणता के वीं वटे कणी वाते भेळा व्या हा।

³³ तद्याँ थोड़ाक यहूदी मनक सिकन्दर ने ऊबो करन आगे खन्दायो। अन वो लोगाँ ने छाना करबा वाते हाताऊँ हानी किदी अन बात-बच्यार करणो छारियो हो।

³⁴ पण जदी मनकाँ ने नंगे पड़गी के ओ यहूदी हे तो वीं हंगळा एक हाते दो घण्टा तईं हाका करता रिया “इपिसियों की देवी अरतिमिस मोटी हे”।

³⁵ तद्याँ नगर के बाबू, लोगाँ ने छाना करन क्यो “हो इपिसुस का लोगाँ, हंगळा मनक जाणे हे के, इपिसुस मोटी देवी अरतिमिस का मन्दर को रुकाळ्यो हे अन वींकी मूरत हरगऊँ अई हे।

³⁶ अणा बाताँ ने कुई नट ने सके, ईं वाते थाँ छाना-माना रो अन कस्यी भी बात पे बात-बच्यार मत करो।

³⁷ थाँ अणा मनकाँ ने पकड़न लाया, अणा ने तो मन्दर ने लुट्यो अन ने ही देवी माँ को अपमान किदो हे।

³⁸ यद्याँ दिमेत्रियुस अन वींका हण्डाळ्याँ कारिगराँ हाते लड़ई-जगड़ो किदो वे तो, न्याव-गादी के हामे जावो, हाकम वटे हे वाँको न्याव वटे वेई।

³⁹ पण थाँकामूँ किंने ओरुँ कई केणो अन पूँछणो वे तो वीं बात को हमजोतो न्याव सबा में किदो जाई।

⁴⁰ काँके आज जो कई व्यो हे, वींऊँ आपीं हंगळा पे दोस लाग सके हे अन जो हुल्‍लड़ किदो हे, ईंऊँ बंचबा वाते आपाँ नके कुई बायनो कोयने हे।”

⁴¹ ओ केन वणा वीं सबा ने खतम किदी।