थरप्या तका का काम 17 - नुवो नेम (मेवड़ी नया नियम)

थिसलुनीके नगर में पोलुस अन सिलास

¹ पछे वीं अम्पिपुलिस अन अपुलोनिया नगराँ में वेन थिसलुनीके में आया, जटे यहूदियाँ को एक परातना घर हो।

² पोलुस आपणाँ रिति-रिवाज के जस्यान वाँऊँ मलबाग्यो, अन तीन सबद का दनाँ में वाँका हाते पुवितर सास्तरऊँ बात-बच्यार किदी।

³ अन एक-एक बचन ने हव तरियऊँ साबत करन हमजातो हो के, मसी को अस्यान दुक जेळणो अन मरिया तकाऊँ जीवतो वेणो जरूरी हो, अन ईसू, जिंको मूँ थाँने हव हमच्यार हुणारियो हूँ, वोईस मसी हे।

⁴ वटे वणा मूँ नरई मनक पोलुस अन सिलास ने मानन, वाँके हाते वेग्या अन अस्यानीस नरई युनानी भगत अन नरी जानी-मानी लुगायाँ भी वाँके हाते वेगी।

⁵ पण यहूदियाँ थोड़ाक फोगट्या मनकाँ ने आपणाँ आड़ी मला लिदा, अन भेळा वेन नगर में धामा-चोकड़ी मचाबा लाग्या अन वाँने हंगळा के हामे लाबा वाँते यासोन का घर पे हमलो कर दिदो।

⁶ जद्याँ वाँने पोलुस अन सिलास ने मल्या, तो वीं यासोन अन कुई विस्वास्याँ ने पकड़न नगर का हाकमाँ का नके गड़ीन लान हाको करन केबा लागा, “अणा मनकाँ दनियाँ में उळट-पुळट किदी हे, अन वीं मनक अटे भी आग्या हे

⁷ अन यासोन वणा ने आपणाँ अटे राक मेल्या हे अन वीं हंगळाईं ओ केवे हे के ‘ईसू ही राजो हे’, अन राजा केसर की आग्या ने कोयने माने।”

⁸ ओ केन वणा मनकाँ, भीड़ अन नगर का हाकमाँ के बचमें हाका-हूक कर दिदी।

⁹ तद्याँ अदिकारियाँ यासोन अन वाँका नकूँ जरीबानो लेन छोड़ दिदा।

बिरिया नगर में पोलुस अन सिलास

¹⁰ यासोन अन विस्वासी भायाँ, पोलुस अन सिलास ने रातूँ-रात वटूँ बिरिया नगर खन्दा दिदा, अन वीं वटे जान यहूदियाँ का परातना घर में ग्या।

¹¹ बिरिया का लोग थिसलुनीके का लोगाऊँ खुला मन का हा। आपणो मन लगान बचन हूणता हा अन हरेक दन पुवितर सास्तर में होदता के, जो भी पोलुस केरियो हे, वो हे के ने हे।

¹² वणा मूँ खास यहूदी लोगाँ अन जानी-मानी लुगायाँ अन मोट्यार भी विस्वास किदो।

¹³ पण जदी थिसलुनीके का यहूदी जाणग्या के, पोलुस बिरिया में भी परमेसर का बचन हुणारियो हे, तो वीं वटे आन भीड़ ने उकसान भड़कई।

¹⁴ तद्याँ तरत विस्वासी लोगाँ पोलुस ने वटूँ समन्द का नके खन्दा दिदो पण सिलास अन तिमुतियुस बिरिया मेंईस रेग्या।

¹⁵ पोलुस ने मेलबा ग्या वीं वाँके हाते एतेंस नगर तईं ग्या अन ओ हमच्यार लेन आया के सिलास अन तिमुतियुस ने फटाकऊँ मारा नके खन्दावे।

एतेंस नगर में

¹⁶ जदी पोलुस एतेंस में वणा की वाट नाळरियो हो, तो वटे हंगळी जगाँ मूरताँ देकन वींको मन घणो दकी वेग्यो।

¹⁷ वो यहूदियाँ का परातना घर में यहूदियाँऊँ अन जो यहूदी ने हा वीं भगताऊँ, चोराया अन बाजार में जो कुई मलतो वाँकाऊँ रोज बात-बच्यार करतो रेतो।

¹⁸ तद्याँ इपिकुरी अन स्तोकी का थोड़ाक अकलमन्द मनक वींकाऊँ आपणी बात-बच्यार किदी अन क्यो, “ओ बेण्डो कई केणो छारियो हे”। पण दूजाँ क्यो “ओ दूजाँ देवी-देवताँ का बारा में बतावे हे”। वे अस्यान ईं वाते केरिया हा, काँके वो ईसू का बारा में अन वींके पाछो जीवतो वेबा को हव हमच्यार हुणारियो हो।

¹⁹ तद्याँ वीं वींने आपणाँ हाते अरियुपगुस नाम की सबा में लेग्या अन पुछ्यो, “कई माँ जाण सका हाँ के, थूँ ओ नुवी बाताँ हुणावे हे, वे कई हे?

²⁰ काँके जो बाताँ थूँ हुणावे हे वे माने अणजाणी लागे हे, ईं वाते माँ जाणणा छावाँ के अणाको कई मतलब हे।”

²¹ हंगळा एतेंस वासी अन परगाम का लोग जो वटे रेवे हे, वे नुवी-नुवी बाताँने हुणबा अन हुणाबा को मोको होदता हा।

²² तद्याँ पोलुस अरियुपगुस सबा का बचमें ऊबो वेन केबा लागो, हो एतेंस का लोगाँ, में देक्यो हे के, थें सब हारई बाताँ में घणा धरमी हो।

²³ काँके मूँ अटने-वटने फरतो तको थाँकी पूजबा की चिजाँ ने देकरियो हो, तो एक अस्यी वेदी भी देकी जिंपे मण्ड्यो हे, “अणजाण परमेसर के वाते।” ईं वाते थाँ जिंने बना जाण्या पूजो हो, मूँ थाँने वींको हव हमच्यार हूँणऊँ हूँ।

²⁴ जणी परमेसर धरती अन ईंकी हंगळी चिजाँ ने बणई, वो हरग अन धरती को परबू हे अन वो हाताऊँ बणाया तका मन्दर में कोयने रेवे हे।

²⁵ अन वींके कई कमी ने हे, के वो मनकाँऊँ सेवा लेवे, काँके वो खुदईस हंगळा ने जीव, जीवन अन हंगळी चिजाँ देवे हे।

²⁶ वाँकाणी एकीस मनकऊँ हंगळा लोगाँ ने बणाया ताँके वे आकी धरती पे रेवे, अन वणीस ते किदो के, वे कटे रेई अन वाँकी उमरकाळ भी ते किदा।

²⁷ परमेसर अस्यान किदो के, वीं परमेसर ने होदे, अन वींका नके जान वींने पाले। यद्याँ के वो आपाऊँ छेटी कोयने।

²⁸ “काँके आपीं वणी मेंईस जीवता हाँ अन चाला-फराँ हाँ अन आपीं वींका मेंईस रेवा हाँ।” जस्यानीस थाँका कवियाँ भी क्यो हो के, “आपीं तो वींकाईस बंस का हाँ।”

²⁹ आपीं परमेसर का बंस का वेन आपाँने ओ हमजणो हव ने हे के, परमेसर मनक का हाताऊँ अन कारीगरीऊँ बणाई तकी होना-चाँदी की अन भाटा की मूरताँ के जस्यान कोयने हे।

³⁰ ईं वाते परमेसर वीं दाण का मनकाँ की, परमेसर ने ने जाणबा अण-हमज पे ध्यान ने दिदो, पण अबे हरेक जगाँ लोगाँ ने मन फराबा की आग्या देवे हे।

³¹ काँके वणी एक दन ठेरायो हे, वीं आपणाँ थरप्या तकाऊँ वो धरती का हंगळा मनकाँ को हाँचऊँ न्याव केरी, अन वणी मरिया तका मूँ पाछो जीवतो वेन हंगळा मनकाँ में आ बात पाकी कर दिदी हे।

³² पाछो जी उठबा की बात ने हुणन कुई मनक रोळ करबा लागा, अन कुई तो क्यो “आ बात माँ पाच्छी हूणणो छावाँ हाँ”

³³ ईंपे पोलुस वटूँ परोग्यो।

³⁴ पण थोड़ाक मनक वींका हाते वेग्या, अन विस्वास किदो। वणा मूँ दियुनुसियस जो अरियुपगुस सबा को सदस हो, दमरिस नाम की लुगई ही, अन वणाके हाते ओरू घणा लोग भी हा।