थरप्या तका का काम 15 - नुवो नेम (मेवड़ी नया नियम)

यरूसलेम की सबा

¹ पछे थोड़ाक मनक यहूदियाँऊँ आन वाँने हिकावा लागा, “यद्याँ मूसा का रिति-रिवाजऊँ थाँको खतनो ने वेतो तो, थें बंचाया ने जाता”।

² जद्याँ पोलुस अन बरनबास वाकाँऊँ बात-बच्यार किदी अन वाँका में लड़ई वेगी, तो ओ चुण्यो के, पोलुस अन बरनबास अन वाँका मूँ थोड़ाक मनक ईं बात को फेसलो करबा का वाते आपणाँ थरप्या तका अन बड़ाबा नके यरूसलेम जाई।

³ विस्वास्याँ की मण्डली का मनक वाँने खन्दाया। वीं फिनाके अन सामरिया देस में जाता तका, जो यहूदी ने हा वणा जस्यान विस्वास किदो, वो मण्डली में बताता ग्या, तो मण्डली का लोग ओ हुणन घणा राजी व्या।

⁴ जद्याँ वीं यरूसलेम पराग्या, तो वटा की मण्डली का थरप्या तका अन बड़ाबा वाकाँऊँ घणा आणन्दऊँ मल्या अन वीं मनकाँ ने बतावा लागा के, परमेसर माकाँ लारे कस्या-कस्या काम किदा।

⁵ पण फरीसियाँ जणा विस्वास किदो हो, वाकामूँ नरई जणा ऊबा वेन क्यो, “जो यहूदी ने हे वाँ लोगाँ ने खतनो कराणो छावे अन मूसा का नेमा को पाळन करणो छावे।”

⁶ तद्याँ थरप्या तका अन बुड़ा-ठाड़ा मनक वीं बात पे बच्यार करबा के वाते भेळा व्या।

⁷ तद्याँ बात-बच्यार व्या केड़े पतरस ऊबो वेन क्यो, “हो भायाँ, थाँ जाणो हो के, नरई दन पेल्या परमेसर थाँकामूँ मने चुण्यो के, माराऊँ जो यहूदी ने हे वीं हव हमच्यार हुणन विस्वास करे।

⁸ मन ने जानबावाळे परमेसर आपणाँ जस्यान वाकाँने भी पुवितर आत्मा देन वाँने भी अपणा लिदा।

⁹ वणी आपाँ अन वाँका में कुई दूज-भराँत ने राकी अन वाँका पापाँ ने माप किदा काँके वणा विस्वास किदो।

¹⁰ तो अबे, थाँ काँ परमेसर की परक करो के विस्वासी पे अतरो बोज नाको के, वींने ने तो आपणाँ बापदादा अन ने आपीं तोक सका।

¹¹ पण, माँ ओ विस्वास कराँ हा के, माँ परबू ईसू की करपाऊँ बंचाया ग्या हा, जस्यान के वे।”

¹² तद्याँ हंगळा सबा का लोग छाना-माना वेग्या अन पोलुस अन बरनबास की बाताँ हुणबा लागा, के परमेसर वाकाँऊँ जो यहूदी ने हे वाँका में कस्यान हेन्याण अन अचम्बा का काम कर दिकाया।

¹³ जदी वीं के चुक्या, तो याकूब ऊबो वेन केबा लागो, “हो भायाँ, मारी बात हुणो,

¹⁴ अबाणू थोड़ीक दाण पेल्याँ समोन ओ बतायो हे के, कस्यान परमेसर पेल्याई पेल्याँ जो यहूदी ने हे वामूँ थोड़ाक लोगाँ ने आपणाँ वाते चुणन आपणो परेम परगट किदो।

¹⁵ ईं बातऊँ परमेसर का आड़ीऊँ बोलबावाळा की बात मलती-जुलती हे, जस्यान लिक्यो हे के,

¹⁶ “‘ईंका केड़े मूँ पाछो आन दाऊद का राज ने पाछो लाऊँ, ढूँण्डा पड़्या तका ने पाच्छा बणान ऊबो करूँ,

¹⁷ ईंका वाते हारी दनियाँ का लोग जो बंच्या तका हे, वीं परबू ने होदे जो यहूदी ने हे, वाँने में बलाया हे, वे हारई मारा नके आई।

¹⁸ वेईस बाताँ हे, ज्याँने मूँ पेल्याऊँ केतो आरियो हूँ।’”

¹⁹ याकूब पाछो क्यो, “ईं वाते में ओ धारियो हे के, जो यहूदी ने हे, वीं परमेसर का आड़ी आवे, तो आपाँने वाँने दुक ने देणो छावे,

²⁰ पण वाँने आपाँ ओ लिकीन खन्दावाँ के, थाँ मूरताँ पे चड़ई तकी चिजाँ ने मत खाज्यो अन कूकरमऊँ छेटी रेज्यो, गळो मरोड़िया तका को माँस ने खावो, अन लुई ने पीजो।

²¹ सरुआतऊँ मूसा का नेमा ने हरेक सबद का दन यहूदियाँ का परातना घर में भण्यो जावे हे अन नगर-नगर में परच्यार वेतो आरियो हे।”

जो यहूदी ने हे वाँका वाते कागद

²² तद्याँ थरप्या तका, बुड़ा-ठाड़ा, हंगळी विस्वास्याँ की मण्डळ्याँ के हण्डे आपणाँ मूँ थोड़ाक मनकाँ ने चुणन पोलुस अन बरनबास के हाते अन्ताक्या खन्दाबा का वाते फेसलो किदो। अन वणा भायाँ मूँ जाणिता मनक, यहूदो जो बरसबा केवावे, सिलास ने चुणन वाँका हण्डे खन्दाया।

²³ वाँकाणी वाँका हाते ओ लिकन खन्दायो, “अंताकिया, सिरिया अन किलिकिया में रेबावाळा जो यहूदी ने हे, वाँ विस्वास्याँ ने थाँका भई थरप्या तका अन बड़ाबा को नमस्कार।

²⁴ माँ हुण्यो हे के, माकाँ मूँ कुई थाँका अटे आन, थाँने वाँकी बाताँऊँ घबरा दिदा अन मन ने पळट दिदा, पण माँ वाँने आग्या ने दिदी ही।

²⁵ ईं वाते माँ हंगळा भेळा वेन बात-बच्यार करन आपणाँ मूँ थोड़ाक मनकाँ ने प्यारा पोलुस अन बरनबास के हाते थाँका नके खन्दावाँ।

²⁶ ईं अस्या मनक हे, जो आपणो जीव ने परबू ईसू मसी का नाम के वाते दुक में नाक्यो हे।

²⁷ ईं वाते माँ यहूदा अन सिलास ने खन्दाईरा हा, जो आपणाँ मुण्डाऊँ ईं बाताँ के देई।

²⁸ पुवितर आत्माने अन माने बड़िया लागो के, थाँका पे जरूरी बाताँ ने छोड़न, कई ओरुँ दूजो बोज ने मेलाँ

²⁹ के थाँ मूरताँ के चड़ई तकी चिजाँ, अन गळो मरोड़िया तका को माँस ने खावो, कूकरमऊँ छेटी रेज्यो अन लुई ने पीजो। ईंऊँ थाँको भलो वेई, अबे माँ विदा लेवा।”

³⁰ पछे वीं वटूँ हिक लेन अंताकिया ग्या, अन वटे मनकाँ ने भेळा करन वो कागद वाँने दे दिदो।

³¹ धिजो बन्दाबावाळा कागद ने भणन वाँने घणो आणन्द व्यो।

³² यहूदा अन सिलास जो परमेसर का आड़ीऊँ बोलबावाळा हा, वाँने ओरी उपदेस देन वाँने धिजो बन्दान विस्वास में गाटा किदा।

³³ वीं वटे थोड़ाक दन रेन, वटा का मनक वाँने परेमऊँ पाच्छा जटेऊँ आया हाँ वटे खन्दा दिदा।

³⁴ (पण सिलास ने वटे रेणो बड़िया लागो।)

³⁵ पण पोलुस अन बरनबास अंताकिया में रिया, अन दूजाँ मनकाँ के हाते परबू का बचन हिकाता अन हव हमच्यार को परच्यार करता रिया।

पोलुसऊँ बरनबास को अलग वेणो

³⁶ थोड़ाक दन केड़े पोलुस बरनबासऊँ क्यो “आपाँ जणी-जणी नगर में परबू को बचन हुणायो हो, वटे चाला अन देकाँ के आपणाँ वीं भई कई कररिया हे।”

³⁷ तद्याँ बरनबास यहुन्ना ने जो मरकुस केवातो हो वींने हाते लेबा को बच्यार किदो।

³⁸ पोलुस वींने ले जाणो हव ने हमजो काँके मरकुस पंफुलिया नाम का नगरऊँ वाँने छोड़ दिदो अन परबू का काम का वाते वाँका लारे ने ग्यो।

³⁹ ईंऊँ अस्यी माता-फोड़ी वेगी अन वीं एक-दूजाऊँ अलग वेग्या, अन बरनबास मरकुस ने हाते लेन जाँजऊँ साइपरस परोग्यो।

⁴⁰ पण पोलुस सिलास ने चुण्यो, अन विस्वासी भायाँ पोलुस ने परबू की करपा में हूँप दिदो अन वीं वटूँ पराग्या।

⁴¹ अन पोलुस सिरिया अन किलिकिया में जातरा करतो तको विस्वास्याँ की मण्डळ्या ने धिजो बन्दातो तको परोग्यो।