थरप्या तका का काम 14 - नुवो नेम (मेवड़ी नया नियम)

इकुनियम देस में पोलुस अन बरनबास

¹ इकुनियम में अस्यान व्यो के, वीं दुई जणा यहूदियाँ की सबा में हाते ग्या, अन अस्यान बाताँ किदी के यहूदियाँ अन जो यहूदी ने हे वणा विस्वास किदो

² पण विस्वास ने करबावाळा यहूदियाँ मनक जो यहूदी ने हे वाँका मन में विस्वास्याँ को विरोद करबा वाते उकसाया।

³ वीं दुई जणा घणा दन तईं वटीस रिया अन बना दरप्याँ परबू की बाताँ ने बताता रिया, अन परबू वाँने तागत देन वाँकाऊँ अचम्बा अन हेन्याणी का काम करवान वाँका करपाऊँ भरया तका संदेसा को मान बड़ातो रियो।

⁴ पण वीं नगर का मनकाँ में फुट पड़गी, तो थोड़ाक मनक यहूदियाँ के आड़ी अन थोड़ाक थरप्या तका का आड़ी वेग्या हा,

⁵ पण जो यहूदी ने हा वीं अन यहूदी मनक आपणाँ नेता ने भी हाते लेन वाँकी नन्दया करबा वाते अन भाटाऊँ ठोकबा वाते होच्यो।

⁶ तो वीं हंगळी बाताँ ने जाणन वटूँ लुकानिया का लुस्त्रा अन दिरबे अन अड़े-भड़े का नगर में भागग्या

⁷ अन वटे हव हमच्यार हुणाबा लागा।

लुस्त्रा अन दिरबे नगर में

⁸ लुस्त्रा नगर में एक मनक जनमऊँ लंगड़ो हो, जो कदी ने चाल्यो हो

⁹ वो मनक पोलुस ने बाताँ करतो तको हुणरियो हो, पोलुस वींका आड़ी देक्यो अन होच्यो के, ईंमें हव वेबा को विस्वास हे।

¹⁰ अन पोलुस जोरऊँ हाको करन क्यो, “आपणाँ पगाँ पे ऊबो वे” वो ओ हुणताई फदकन ऊबो व्यो अन चालबा-फरबा लागग्यो।

¹¹ वटा का मनक पोलुस को ओ काम देकन, लुकानिया की भासा में जोरऊँ क्यो, “कुई देवताँ मनक को रूप धारण करन आपणाँ बंच में परगट व्या हे।”

¹² वणा मनक बरनबास ने जेयास अन पोलुस ने हिरमेस क्यो, काँके पोलुस बाताँ करबा में खास हो।

¹³ जेयास को मन्दर नगर का बारणे हो। वींको पूजारी हाण्ड अन फूला को हार लेन फाटकाँ के बारणे आन पोलुस अन बरनबास के वाते बली देणो छारियो हो।

¹⁴ पण जदी थरप्या तका चेला पोलुस अन बरनबास ओ हुण्यो, तो आपणाँ गाबा फाड़न भीड़ में ग्या अन जोरऊँ केबा लागा,

¹⁵ “हो लोगाँ, थाँ ओ कई कररिया हो। माँ भी थाँके जस्यानीस मनक हाँ, अन थाँने हव हमच्यार हुणाबा आया, ताँके थाँ अणा फोगट की चिजाँऊँ छेटी वेन जीवता परमेसर के आड़ी आवो, जणी हरग, धरती, समन्द अन जो कई अणामें हे वणीस बणाया हे।

¹⁶ वणी बित्या तका टेम में दनियाँ का लोगाँ ने आपणाँ-आपणाँ गेला पे चालबा दिदा।

¹⁷ पण तद्याँ भी वो भलई करतो तको खुद की गवई देतो रियो, आकासऊँ बरका वरई, हारी रिता में हव हाक देतो रियो अन थाँको मन आणन्दऊँ भरतो रियो।”

¹⁸ ओ केन भी भीड़ ने घणी अबकीऊँ रोकी के, वीं वींका वाते बली ने देवे।

¹⁹ पण थोड़ाक यहूदियाँ अन्ताक्या अन इकुनियमऊँ आन मनकाँ ने आपणी आड़ी करन पोलुस के भाटा ठोक्या अन वींने मरियो तको हमजन नगरऊँ बारणे गड़ीन लेग्या।

²⁰ पण जदी चेला वींके च्यारूँमेर आन ऊबा वेग्या, तो वो ऊबो वेन नगर में ग्यो अन दूजे दन बरनबास के हाते दिरबे नगर में परोग्यो।

सिरिया का अन्ताक्या में पाछो आणो

²¹ वीं दुई वणी नगर में मनकाँ ने हव हमच्यार हुणाता अन वटे घणा चेला बणाया, पछे पाच्छा लुस्त्रा, इकुनियम अन पिसदिया का अन्ताक्या में पराग्या।

²² अन चेला ने हिम्मत देन विस्वास में बड़वा वाते धिजो बन्दाता रिया अन केता रिया के “परमेसर का राज में जाबा वाते आपाँने घणो दुक जेळणो पेड़ी।”

²³ वटे की हरेक विस्वास्याँ की मण्डली में बुड़ा-ठाड़ा ने थरप्या अन वाँने वरत अन परातना करन परबू का हाताँ में हूँप दिदी, जिंपे वीं विस्वास करता हा।

²⁴ तद्याँ वीं दुई पिसदिया वेता तका पंफुलिया देस में ग्या।

²⁵ पछे पिरगा देस में हव हमच्यार हुणान अन्तळिया देस में पूग्या।

²⁶ वटूँ जाँज में बेटन अन्ताक्या में ग्या अन अटेईस वीं काम के वाते वणा ने परमेसर का अनुगरे में हुप्याँ ग्या हा। जिंने वणा अबाणू पूरो किदो हे।

²⁷ जदी वणा वटे जान वटा की विस्वास्याँ की मण्डली का मनकाँ ने भेळा किदा, अन जो काम परमेसर वाँका हाते किदो हो वींने बतायो, अन केबा लागा के जो यहूदी ने हे, वाँका वाते भी विस्वास करबा ने परमेसर गेलो खोल नाक्या हे।

²⁸ अन पछे वीं वटे विस्वासी मनकाँ के हाते नरई दन तईं रिया।