थरप्या तका का काम 13 - नुवो नेम (मेवड़ी नया नियम)

बरनबास अन साउल ने खन्दाणा

¹ अन्ताक्या का विस्वास्याँ की मण्डली में परमेसर का आड़ीऊँ बोलबावाळा अन हिकाबावाळा हा, बरनबास अन समोन जो नीगर केवावे हे, अन कुरेन को लुकियुस, देस का चोता हिस्सा को राजपाल हेरोदेस की लारे पळ्या-बड़्या मनाएन अन साउल जस्या नरई हिकाबावाळा हा।

² वे जद्याँ वरत करता तका परबू की मेमा कररिया हा, तद्याँई पुवितर आत्मा क्यो, “बरनबास अन साउल ने जीं काम के वाते में बलाया हा, वीं काम के वाते वाँने न्यारा कर दो।”

³ जद्याँ वे वरत अन परातना करन बरनबास अन साउल पे आपणो हात मेल्यो अन वाँने हिक दे दिदी।

बरनबास अन साउल की साइपरस की जातरा

⁴ पुवितर आत्माऊँ खन्दान बरनबास अन साउल सलुक्या ग्या, वटूँ नाव में बेटन वे साइपरस नाम का टापू पे पूगा।

⁵ अन वे सलमीस नगर पूगा, तो वाँकाणी यहूदियाँ की परातना घर में परमेसर का बचनाँ को परच्यार किदो। मरकुस नाम को यहुन्नो वाँकी सायता करबा वाते वाँकी लारे हो।

⁶ वीं आकई टापू की जातरा करता तका वीं पाल्ड़े का पापुस तईं जा पूगा। वटे वाँने बारईसू नाम को एक यहूदी जादूगर अन जूटो परमेसर का आड़ीऊँ बोलबावाळो मल्यो।

⁷ वो घणा हूँस्यार राजपाल हरग्युस पोलुस को हण्डाळी हो। हरग्युस पोलुस परमेसर को बचन हुणबा के वाते बरनबास अन साउल ने पाच्छा बलाया हा।

⁸ पण अलीमास जादूगर, जिंको युनानी नाम बारईसू हो, वणी वाँको विरोद किदो। वीं टापू के राजपाल को विस्वास तोड़बा के वाते जोर दिदो।

⁹ पछे साउल जिंको दूजो नाम पोलुस हो। वो पुवितर आत्माऊँ भरन, अलीमास के हामे ताकते तके क्यो,

¹⁰ “हे हंगळा छळ-कपटऊँ भरिया तका सेतान का पूत, थूँ हारी तरिया की भलई को दसमण, कई थूँ परबू का हव गेला ने बगाड़णो ने छोड़ी?

¹¹ अबे देक परबू को हात थाँरा दयने आरियो हे। थूँ आन्दो वे जाई अन थोड़ाक दनाँ तईं दन को उजितो भी ने देक सेकी।” तरत वींने धुधळो दिकबा लागो अन अन्दारो पड़ग्यो, वो अटने-वटने हात लाम्बो करबा लागो के, कुई वींको हात पकड़न वींने चलावे।

¹² जद्याँ टापू के राजपाल ओ सब देक्यो, तो वो परबू पे भरोसो करबा लागो अन परबू का वसना की हिकईऊँ घणो अचम्बो व्यो।

पोलुस अन बरनबास पिसदिया का अन्ताक्या में

¹³ पछे पोलुस अन वींका हण्डाळी पापुसऊँ नाव में बेटन पफुलिया का पिरगा में आ पूग्या। पण यहुन्नो जिंको नाम मरकुस हो, वाँने वटेई छोड़न यरूसलेम परोग्यो।

¹⁴ वटने वे आपणी जातरा करता तका पिरगाऊँ पिसदिया का अन्ताक्या में आ पूगा। पछे सबत के दन यहूदी परातना घर में जान बेटग्या।

¹⁵ मूसा की वेवस्ता का नेम अन परमेसर का आड़ीऊँ बोलबावाळा की पोत्याँ का पाट भणन यहूदी परातना घर का अदिकारी वाँका नके अस्यान पूँछबा खन्दाया के, “ओ भई-लोगाँ, थाँका नके धिजो बन्दाबा के वाते ओरी बचन वेवे, तो हुणावो।”

¹⁶ ईं बात पे पोलुस ऊबो व्यो अन हातऊँ हानी करतो तको केबा लागो, ओ इजराएल का अन परमेसरऊँ दरपबावाळा लोगाँ हुणो।

¹⁷ “इजराएल का लोगाँ के परमेसर आपणाँ पूरबजाँ ने थरप्या अन जद्याँ आपणाँ लोग मिसर देस में रूक्या तका हा, तो वाँकाणी वाँने मान बणाया अन वे आपणी सगतिऊँ वाँने मिसरऊँ बारणे लाया हा।

¹⁸ अन पछे चाळी सालाँ तईं वो हुन्ना काँकड़ में वाँने सेण करतो रियो।

¹⁹ अन कनान देस का हात राज ने खतम करन वणी वा जगाँ इजराएल का लोगाँ ने बापोती का रूप में दे दिदी।

²⁰ ईं हारई काम में लगे-भगे हाडा च्यारसे वर लागा। ईंका केड़े परमेसर का आड़ीऊँ बोलबावाळा समुएल की टेम तईं वाँने नरई न्याव करबावाळा दिदा हा।

²¹ पछे वाँकाणी एक राजो माँग्यो, तो परमेसर वाँने बिन्यामीन की गोत का कीस का छोरा साउल ने चाळी सालाँ तईं राजो बणायो।

²² पछे साउल ने हटान दाऊद ने वाँको राजो बणायो, जिंका बारा परमेसर अस्यान क्यो हो के, में ईसे का पूत दाऊद ने देक्यो हे के, वो एक अस्यो मनक जो मारा मन का जस्यान हे। मूँ जो कई भी छावूँ, हारोई वो केरी।

²³ अणीस मनक का बंसऊँ आपणो बचन पूरो करबा के वाते परमेसर इजराएल का लोगाँ ने बंचाबावाळा ईसू ने खन्दायो।

²⁴ ईसू का आबाऊँ पेल्याँ यहुन्नो इजराएल का मनकाँ ने मन बदलन बतिस्मो लेबा को परच्यार करतो हो।

²⁵ यहुन्नो जद्याँ आपणो काम पूरो करबा में हो, तो वणी क्यो, ‘जस्यान थें मारा बारा में होचरया हो वस्यान मूँ ने हूँ। पण, एक अस्यो मनक मारा केड़े आरियो हे, मूँ जिंकी पगरख्याँ का कसणा खोलबा के जोगो भी कोयने हूँ।’”

²⁶ ईं वाते भई-लोगाँ, अबराम की ओलादाँ अन थाँकामूँ परमेसरऊँ दरपबावाळा लोगाँ, बंचाबावाळो ओ सन्देसो आपणाँ वातेई खन्दायो ग्यो हे।

²⁷ यरूसलेम में रेबावाळा अन वाँका अदिकारियाँ भी ईसू ने कोयने ओळक्यो अन सबद का हरेक दन हुणाता तका परमेसर का आड़ीऊँ बोलबावाळा का बचन ने कोयने हमज्या, पण ईसू पे दोस लगान वाँ वसना ने पूरा किदा।

²⁸ अन जद्याँ वींने मारबा के वाते कई मोको ने मल्यो, तुई वाँकाणी पिलातुसऊँ वींने मारबा के वाते क्यो।

²⁹ ईसू वाते जो भी सास्तर में लिक्यो हो, वो हारोई वणा पूरो कर नाक्यो हो, तो वाँकाणी वींने हूळीऊँ उतारन कबर में मेल दिदो।

³⁰ पण, परमेसर वींने मरिया केड़े पाछो जीवतो कर दिदो हो।

³¹ अन पछे जो भी मनक गलीलऊँ यरूसलेम तईं वींकी लारे आया हा, वाँका हामे वो नरई दनाँ तईं परगट व्यो। वीं अबे मनकाँ में वींकी गवई हे।

³² माँ अटे वो हव हमच्यार लाया हा जिंका बारा में परमेसर आपणाँ बड़ाबाऊँ वादो किदो हो,

³³ जो आपीं आपणाँ पूरबजाँ का बंस का हा, आपणाँ वाते परमेसर पूरो किदो हे। जस्यान के, भजनाँ की किताब का दूजाँ पाट में लिक्यो हे, “थूँ मारो बेटो हे, आजइस मूँ थारो बापू बण्यो हूँ।”

³⁴ अन परमेसर वींने मरयाँ तकाऊँ जीवतो किदो, ताँके वींकी देह कदी हड़े कोयने। ईंका बारा में परमेसर अस्यान क्यो हो, “मूँ थने पुवितर वरदान देवूँ, जिंको में दाऊदऊँ वादो किदो हो।”

³⁵ अस्यानीस वणी एक ओरी भजन में क्यो हे, “थूँ आपणाँ वीं धरमी मनक ने हड़बा ने देई।”

³⁶ पछे दाऊद आपणाँ जुग में परमेसर के वाते आपणो काम पूरो करन मरग्यो अन वींने वटेईस गाड़्यो जटे वींका बड़ाबा ने गाड़्या हा, वींकी लास हड़गी,

³⁷ पण जणी ने परमेसर मरिया तकाऊँ पाछो जीवतो किदो, वींकी लास कदी ने हड़ी।

^38-39 ईं वाते ओ भायाँ, थाँकाणी जाणणो छावे के, बेस ईसुऊँइस थाँका वाते हाराई पापाँ की मापी घोसित वीं हे अन जो कुई भी विस्वास करी वो परमेसर का हामे सई मान्यो जाई, अस्यान मूसा का नेम कदी ने कर सके।

⁴⁰ ईं वाते अबे हेंचेत रेवो, कटेई परमेसर का आड़ीऊँ बोलबावाळा जो क्यो हो, वो थाँका हाते ने वे जावे,

⁴¹ “‘रोळ करबावाळा देको, अचम्बा में आन मर जावो, काँके थाँका जुग में एक अस्यो काम करूँ, जिंने कुई थाँने हमजाई तुई थें विस्वास ने करो।’”

⁴² पोलुस अन बरनबास जद्याँ वटूँ जारिया हा, तो लोगाँ वाँने आगला सबत के दन अस्यी बाताँ ओरी केबा के वाते क्यो।

⁴³ जद्याँ सबा खतम व्यी, तो नरई यहूदी अन यहूदी धरम ने मान लिदा तका लोग भी पोलुस अन बरनबास का पाच्छे वेग्या। पोलुस अन बरनबास वाँकाऊँ बाताँ करता तका लोगाँ ने मनारिया हा के, वे परमेसर की करपा में बण्या रेवे।

⁴⁴ आगले सबत के दन तो हारई नगर का मनक परमेसर का बचन हुणबा के वाते भेळा वेग्या।

⁴⁵ जद्याँ यहूदियाँ आ मनकाँ की भीड़ देकी, तो वे रिस्याँ बळता तका पोलुस जो भी क्यो हो, वींको विरोद करबा लागा अन खोट्याँ खाबा लागा।

⁴⁶ पण पोलुस अन बरनबास बनाई दरप्या क्यो, “ओ जरूरी हे के, परमेसर का बचन सबऊँ पेल्याँ थाँने हूणावाँ, पण थाँकाणी वाँने नकारता तका खुद ने अमर जीवन जीबा के जोगा ने हमज्या। ईं वाते माँ अबे यहूदियाँ ने छोड़न जो यहूदी ने हे वाँका नके जारिया हा।

⁴⁷ काँके परबू माँने ओ आदेस दिदो के, “‘में थाँने जो यहूदी ने हे, वाँके वाते उजितो बणायो, ताँके वीं बंचाया जाई, धरती का ईं खुणाऊँ वीं खुणा तईं।’”

⁴⁸ वाँ लोगाँ जो यहूदी ने हे जद्याँ ओ हुण्यो, तो वे घणा राजी व्या अन परमेसर का वसना को मान किदो अन जणा अमर जीवन जीबा ने चुण्यो वणा विस्वास किदो।

⁴⁹ अस्यान वटे हारी जगाँ परबू का बचन फेलग्या।

⁵⁰ तो वटने यहूदियाँ, जानी-मानी लुगायाँ जणी यहूदी धरम ने मान लिदो हो अन नगर का मुक्या ने उकसाया, तो वे पोलुस अन बरनबास पे अन्याव करन हताबा लागा अन दरपाता तका जोरावरीऊँ वाँने आपणाँ अटूँ बारणे निकाळ दिदा।

⁵¹ पछे पोलुस अन बरनबास वाँका विरोद में आपणाँ पगाँ को धूळो जाटकन इकुनियम पराग्या।

⁵² पण, विस्वासी लोग राजी वेता तका पुवितर आत्माऊँ भरग्या।