2 तिमुतियूस 4 - नुवो नेम (मेवड़ी नया नियम)

¹ ईसू मसी राजा का रूप में आई अन हाराई जीवता अन मरिया तका को न्याव करी, वाँने अन परमेसर ने गवा मानन मूँ थने आदेस दूँ हूँ के,

² परमेसर का हव हमच्यार को परच्यार कर, पलई ईंने हाराई मनक ने माने, पण ईंका केड़े भी थूँ ईंने पूरा मनऊँ करतो रे। थूँ लोगाँ ने सई कर अन वाँका पापाँ को वाँने ध्यान करान चेता। हातेई हाते वाँने उदास मती वेबा दे, वाँने सला देती दाण हमेस्यान धीरज राकज्ये।

³ अस्यान को टेम आरियो हे जद्याँ मनक हव हिक ने, ने हूणी, पण ईंकी अलावा वीं आपणाँ वाते अस्यान का हिकाबावाळा होद लेई, जीं वाँने वीं बाताँइस हिकाई जस्यी हूणणी वाँने हव लागे हे।

⁴ वीं हाँचऊँ छेटी वे जाई अन बना मतलब की बाताँ पे ध्यान लगाई।

⁵ थूँ सान्तीऊँ टक्यो तको रेज्ये अन दुक भोगबा का वाते त्यार रे। हव हमच्यार को परच्यार करबा का वाते घणी मेनत कर अन थाँरी जिमेदारी ने हव तरियाऊँ पुरी करज्ये।

⁶ मूँ मारो यो जीवन परमेसर की सेवा करबा का वाते दे चुक्यो हूँ। ओ वो टेम हे जद्याँ मने यो सरीर छोड़णो पड़ी।

⁷ मूँ हव तरियाऊँ लड़्यो, में मारी दोड़ पुरी करी लिदी हे अन मूँ विस्वास जोगो रियो।

⁸ अन अबे वटे परमेसर का हाते जीत को ईनाम मारी वाट नाळरियो हे, जिंने धरमी अन खरा न्याव करबावाळा परबू आकरी दन में मने देई। मने एकला नेईस ने, पण वाँ हाराई ने भी ज्यो परेम का हाते वींके परगट वेबा की वाट नाळे हे।

निजी सला

⁹ थूँ जट मारा नके आबा की कोसीस कर,

¹⁰ काँके देमास तो ईं दनियादारी का मो-माया में पड़न मने छोड़न थिस्सुलुनिक्यों नगर परोग्यो हे। क्रेसकेस गलातिया नगर में अन तीतूस दलमतिया नगर में परोग्यो हे।

¹¹ मारा हाते बेस लुकोइस रिया हे। काम में तो मरकुस जोरदार खिलाड़ी हे। वे सके तो, वींने थाँरा हाते लेतो आज्ये, ताँके मारे काम में मने जेलो देवे।

¹² तुखिकुस ने में इपिसुस नगर खन्दायो हे।

¹³ जद्याँ थूँ आवे तो त्रोआस का रेबावाळा करपुस का घरेऊँ मारो कोट, पोत्याँ अन चामड़ा का पतर ने तो खास तरियाऊँ आद राकन लेतो आज्ये।

¹⁴ धातु को काम करबावाळे सिकन्दर मने घणो दुक दिदो हे। परबू वींकी करणी के जस्यान वींने फळ देवे।

¹⁵ थूँ भी वणीऊँ हमळन रेज्ये, काँके वो आपाँ ज्यो हमच्यार हूणावाँ हाँ, वींको घणो विरोद करे हे।

¹⁶ पेलकी दाण कोरट में मारा बचाव में मारी मदत कणी ने किदी, पण हाराई का हाराई मने छोड़ दिदो, भलो वे के, परमेसर वणाऊँ ईंको हस्याब ने लेवे।

¹⁷ पण परमेसर मारा हाते ऊबारियो अन मने तागत दिदी, जणीऊँ तो मूँ ज्यो यहूदी ने हा, वणा हाराई में हव हमच्यार हुणा सक्यो अन मूँ मोत का दण्डऊँ बंचायो ग्यो।

¹⁸ अन परबू मने हारी बुरी बाताँऊँ बंचाई अन बंचान हरग में लेजाई। वाँकी मेमा जुग-जुग वेती रेवे! आमीन।

आकरी नमस्कार

¹⁹ प्रिसकिल्‍ला, अक्‍विला अन उनेसिफुरस का घराणा ने मारे राजी-खुसी को नमस्कार केज्ये।

²⁰ इरास्तुस कुरिन्तुस नगर में रेग्यो, अन त्रुफिमुस ने, में मांदकी की वजेऊँ मिलेतुस गाम मेंईस छोड़ दिदो।

²¹ हियाळाऊँ पेल्याँ-पेल्याँ आबा की पुरी-पुरी कोसीस करज्ये। युबुलुस, पदेस, लिनुस, कलोदिया अन हाराई विस्वास्याँ थने राजी-खुसी को नमस्कार क्यो हे।

²² परबू थाँरी आत्मा का हाते रेवे। थाँ हाराई पे परमेसर की करपा बणी तकी रेवे।