2 तिमुतियूस 3 - नुवो नेम (मेवड़ी नया नियम)

आकरी का दन

¹ ओ ध्यान राको, आकरी का दनाँ में आपणाँ पे घणो अबको टेम आई।

² काँके मनक मतलबी, लोबी, मेपणा करबावाळा, फाकलेट अन बेजत करबावाळा, आपणाँ बई-बापू को क्यो ने करबावाळा, दया ने करबावाळा, अधरमी वेई।

³ वाँका हरदा में ने तो परेम-भाव, ने दया-धरम वेई, वीं दूजाँ की बुरई करबावाळा, लड़ई करबावाळा, कल्डा मन का अन भलईऊँ दसमणी राकबावाळा वेई।

⁴ वीं धोको देबावाळा, बेपरवा, मरोड़ में रेबावाळा, परमेसर की परेमी वेबा का बजाय मोज-मस्तीऊँ परेम करबावाळा वेई।

⁵ वीं धरमीपणा को दिकावो तो करी, पण परमेसर की तागत ने ने मानी। अस्यान हिकबावाळा मनकाँऊँ खुद ने छेटी राक।

⁶ वाँका मूँ थोड़ाक हिकबावाळा मनक लोगाँ का घरे में जान कमजोर लुगायाँ ने आपणाँ बंस में करी, ज्यो आपणाँ बुरा कामाँ में अन पाप की मरजी में फंसी तकी रेई,

⁷ ईं लुगायाँ हमेस्यान वणा हिकबावाळाऊँ हिकणो तो छाई, पण हाँच कई हे, ईंने ने जाण पाई।

⁸ ईं हिकबावाळा यन्नेस अन यमब्रेस का जस्यान हे, जणा मूसा को विरोद किदो हो, वस्यानीस ईं मनक हाँच को विरोद करी, ईं अस्यान का मनक हे जणाकी अकल मरगी हे अन ईं विस्वास में ने बण्या रे सकी।

⁹ पण अबे वीं ओरी हेला ने पनप सकी, काँके जस्यान यन्नेस अन यमब्रेस की वेडी अकल हाराई का हामे अई वस्यानीस अणाकी भी आई।

तिमुतियुस ने पोलुस को आकरी संदेस

^10-11 पण थूँ मारी हिक, वेवार, अन जीवन का वाते मारा मकसद ने माने हे, थूँ मारो विस्वास, मारो धीरज, मारो परेम, मारी सेण करबा की तागत, मारा पे व्या जुलम, अन मारा दुक में मारे हाते रियो हे। अन्ताक्या, इकुनियम अन लुस्त्रा में ज्यो कई व्यो हो अन कई-कई दक-भरिया जुलम ने सेण किदा हाँ, वाँमें भी थूँ मारे हाते हो। पण परबू मने वणा हाराईऊँ बंचायो हो।

¹² ज्यो भी मनक ईसू मसी का गट-जोड़ में खरो जीवन जीवणो छावे हे, तो वींने दुक देकणो पड़े हे।

¹³ अन बुरा अन धोको देबावाळा मनक धोको देता अन खुद धोको खाता तका हेलाऊँ हेला बुरा वेता तका परा जाई।

¹⁴ पण थूँ वणा बाताँ पे ज्यो थें हिकी हे अन ज्याँका बारा में थने पको विस्वास हे। ओ जाणन के, थने वीं बाताँ हिकाबावाळा कूण हाँ, वणामें बण्यो तको रे।

¹⁵ अन बाळकपणाऊँ थूँ तो पुवितर सास्तर ने जाणे हे ज्यो ईसू मसी में विस्वास का आड़ीऊँ थने मुगती पाबा का वाते अकल दे सके हे।

¹⁶ हारोई पुवितर सास्तर परमेसर की आत्मा की तागतऊँ लिक्यो ग्यो हे, ज्यो हाँच की, गलती पे फटकार की, हूदारबा की, अन सई तरियाऊँ जीवन जीववा की हिक देवे हे।

¹⁷ अणीऊँ परमेसर को भगत हाराई भला काम करबा वाते ताकड़े अन त्यार रेवे।