2 थिस्सुलुनिक्यों 3 - नुवो नेम (मेवड़ी नया नियम)

माकाँ वाते भी परातना करिया करो

¹ हो विस्वासी भायाँ, माकाँ वाते भी परातना करता रेज्यो, जणीऊँ परबू को हव हमच्यार जस्यान थाँका बचमें फेलरियो हे, वस्यानीस हाराई लोगाँ में बना रकावटऊँ हेलो फेले अन आदर-मान पावे।

² थाँ परातना करिया करो के, परबू माँने बुरा अन भटक्या तका मनकाँऊँ बंचावे, काँके हर कुई ईं हव हमच्यार पे विस्वास ने करे हे।

³ पण परबू विस्वास जोगा हे। वींइस थाँने तागत देई अन सेतानऊँ बंचान राकी।

⁴ परबू में माँने थाँका वाते पाको विस्वास हे अन थाँका बारा में माँने कई चन्ता ने हे के, जस्यान माँ थाँने करबा वाते क्यो हो थाँ वस्यानीस कररिया हो अन करता रेवो।

⁵ परबू थाँका मन ने परमेसर का परेम ने हमजबा अन मसी की धिरजपणा की सगती का आड़ी बड़ावे।

काम करबा की जिमेदारी

⁶ हो विस्वासी भायाँ, माँ थाँने परबू ईसू मसी में ओ आदेस देवा हा के, हरेक अस्या मनकाऊँ छेटी रेज्यो जीं आळकातक हे अन ज्या हिक माँ वाँने दिदी हे वींके जस्यान ने करे।

⁷ जस्यान माँकी उठक-बेठक हे वस्यानीस थाँकी भी वेणी छावे अन आ कस्यान वेणी छावे ईं बात ने थाँ तो जाणोइस हो, काँके जद्याँ माँ थाँका हाते हा तो कदी भी माँ आळकातक ने हा।

⁸ अन किंकी भी फोगट की रोटी ने खादी। पण रात-दन मेनत अन दुक उठान काम धन्धो करता हा, ताँके थाँका पे कई बोज ने पड़े।

⁹ अस्यान की बात ने के, थाँका पे मारो हक ने हे, पण माँ छावाँ हा के, थाँ माँने देकन हिको अन माँके जस्यान जीवन जीवो।

¹⁰ ईं वाते जद्याँ माँ थाँका नके हा तो भी थाँने याईस बात केता हाँ के, “यद्याँ कुई काम ने करणो छावे, तो वो खा भी ने सकी।”

¹¹ माँ हुण्यो हो के, थाँकामूँ नरई गलत गेले चालरिया हे अन कई काम तो ने करे, पण दूजाँ का काम में टाँग अड़ावे हे।

¹² अस्या मनकाँ ने परबू ईसू मसी में माँ आदेस देवा अन हमजावा हाँ के, छाना-माना खुद कमान खावो।

¹³ पण हो विस्वासी भायाँ, थाँ भला काम करबा वाते हिम्मत मती छोड़ज्यो।

¹⁴ यद्याँ कुई माकाँ ईं कागद में लिकी तकी बाताँ ने ने माने, तो वाँका पे नजर राकज्यो अन वणा हाराईऊँ छेटी रेज्यो जणीऊँ वीं हरमा मर जावे।

¹⁵ वाँने दसमण मती हमज ज्यो, पण वाँने भई हमजन चेताज्यो।

आकरी नमस्कार

¹⁶ परबू थाँका हाराई का हाते रेवे अन परबू ज्यो खुद ईं सान्ती हरेक टेम अन हरेक तरियाऊँ देता रेवे हे थाँने हमेस्यान सान्ती देवे।

¹⁷ मूँ पोलुस, थाँने खुद का हातऊँ जे मसी की लिकरियो हूँ। हाराई कागद के आकरी में याईस मारी हेन्याणी हे अन मारी लिकावट की ओळकाण भी याईस हे।

¹⁸ आपणाँ परबू ईसू मसी की करपा थाँका हाराई पे वेती रेवे।