2 पतरस 1 - नुवो नेम (मेवड़ी नया नियम)

नमस्कार

¹ मूँ समोन जिंको नाम पतरस भी हे, ज्यो परबू ईसू मसी को दास अन थरप्यो तको चेलो हे, मूँ ओ कागद वाँ मनकाँ का नाम लिकरियो हूँ, जीं आपणाँ परमेसर अन छुटकारो देबावाळो ईसू की धारमिकता के वजेऊँ आपणे जस्यानीस विस्वास करे हे।

² थाँ तो परमेसर अन परबू ईसू ने जाण लिदा हे, ईं वाते थाँका पे परमेसर की दया अन अनुगरे वेतो रेवे।

परमेसर आपाँने बलाया अन चुण्या हे

³ जीवन जीवबा का वाते अन परमेसर की सेवा करबा का वाते जो कई भी आपणे छावे हे, वो हारोई परमेसर आपणी तागतऊँ आपाँने दिदो हे। काँके आपाँ वींने जाणा हाँ, जणी आपणी धारमिकता अन मेमा की वजेऊँ आपाँने बलाया हे।

⁴ अणीऊँस वणी आपाँने मोटा अन अनमोल वरदान दिदा हे, ज्याँने देबा का वाते वणा वादो किदो, ताँके वाँकाऊँ आपाँ खुद परमेसर का जस्यान वे जावा अन वणी नासऊँ बंच जावो ज्यो मनकाँ की बुरी मनसा का मस अणी दनियाँ में हे।

⁵ थाँ हाराई हर तरियाऊँ कोसीस करता रेवो, ताँके थाँ थाँका विस्वास बड़ा सको अन विस्वास में हव गुण, हव गुण में हमज ने,

⁶ अन हमज में खुद ने काबू में राकबा में अन खुद ने काबू में राकबा में धीरज ने अन धीरज में परमेसर की भगती ने,

⁷ अन भगती का हाते भईचाराऊँ परेम अन ईं भईचारा में दयालुता का हाते परेम में बड़ो।

⁸ काँके यद्याँ थाँकामें ईं हारी बाताँ रेई अन थाँ अणा बाताँ में बड़ता रेवो, तो परबू ईसू मसी के ओळकाण में ईं थाँने बेकार ने वेबा देई।

⁹ पण जणामें ईं बाताँ ने हे वो आंदो हे अन वींने धुधळो दिके हे, वो ओ भी भुलग्यो हे के, वींका पाप पेल्याँई धोया ग्या हा।

¹⁰ ईं वाते हो भायाँ, थाँ यो दिकाबा का वाते घणा ताकड़े रेवो के, थाँ हाँची में परमेसर का आड़ीऊँ बलाया अन चुण्या ग्या हो, काँके यद्याँ थाँ अणा हारी बाताँने करता रेवो, तो कदी ठोकर ने खावो अन नेई कदी रेटे पड़ो।

¹¹ अन यद्याँ थाँ ईं रीत का जस्यानीस चालो, तो एक दन जरुर आपणाँ परबू अन छुटकारो देबावाळा ईसू मसी की जुग-जुग का राज में जावो अन वटे थाँ आदर पावो।

पतरस की आकरी टेम

¹² ईं वाते यद्याँ थाँ अणा बाताँ ने जाणो हो, अन थाँने जो हाँच को वसन मल्यो हे अन थाँ ओ बचन मानो भी हो, तो भी मूँ थाँने ईं बाताँ आद अवाड़ातो रेऊँ हूँ।

¹³ काँके मूँ खुद का वाते आ बात हव तरियाऊँ जाणूँ हूँ के, जद्याँ तईं मूँ ईं देह में हूँ, ईं बाताँ आद अवाड़न थाँने हमजातो रेऊँ।

¹⁴ काँके मूँ ओ जाणूँ हूँ के, मूँ ईं देह ने वेगोई छोडबावाळो हूँ। जस्यान आपणाँ परबू ईसू मसी मने बतायो हे।

¹⁵ ईं वाते मूँ पुरी कोसीस करूँ हूँ के, मारे मरिया केड़े भी थाँ अणा बाताँ ने हमेस्यान आद राक सको।

मारी आक्याँ मसी की मेमा की गवा हे

¹⁶ माँ थाँने आपणाँ परबू ईसू मसी की तागत का बारा में अन वींके पाच्छा आबा का बारा में जो हमच्यार हुणायो हो, वो कुई हुस्यारीऊँ बणई तकी केणी ने हे, पण में खुदई वींकी मेमा ने मारी आक्याँऊँ देकी हे।

¹⁷ काँके जद्याँ वींने परम बापू परमेसर का आड़ीऊँ आसीस अन मेमा मली ही, वीं टेम में परमेसर का आड़ीऊँ ओ हमच्यार आयो के, “ओ मारो लाड़लो पूत हे, मूँ अणीऊँ घणो राजी हूँ।”

¹⁸ माँ भी वींके हाते वीं पुवितर मंगरा पे हा वीं टेम हरगऊँ ओ हमच्यार आवतो तको हुण्यो हो।

¹⁹ मारा नके परमेसर का आड़ीऊँ बोलबावाळो का जीं बचन हे वणीऊँ आ बात पाकी वेगी हे। थाँ भी ईंपे ध्यान देन हव करो हो, काँके वो तो उजितो हे, जो अंदारा की जगाँ में जद्याँ तईं चमकरियो हे, जतरे उजितो ने जावे अन थाँका हरदा में हवेर पेल्याँ को तारो ने उग जावे।

²⁰ पण थाँने ओ जाण लेणो छावे के, पुवितर सास्तर की कुई भी आगेवाणी परमेसर की आड़ीऊँ बोलबावाळा के खुद का बच्यार पे कोयने हे।

²¹ काँके कुई भी आगेवाणी मनकाँ की मरजीऊँ कदी ने वेवे हे, पण भगत मनकईस पुवितर आत्मा की वजेऊँ परमेसर का आड़ीऊँ बोले हे।