2 कुरिन्थियों 8 - नुवो नेम (मेवड़ी नया नियम)

खुला मनऊँ दान देणो

¹ देको, हो विस्वासी भायाँ अबे माँ ओ छावाँ हाँ के, थाँ परमेसर की वीं दया का बारा में जाणो ज्यो मकिदुनिया का विस्वास्याँ की मण्डळ्याँ पे किदी गी ही।

² मारा केवा को ओ मतलब हे के, वणा मण्डळ्याँ का मनकाँ ने परक्या ग्या हा, तद्याँ भी वीं राजी हा अन वीं गरीब वेता तका भी वीं देबा का मामला में खुला मनऊँ दिदो।

³ मूँ वाँका बारा में गवई दे सकूँ हूँ के, वीं जतरो भी वीं दे सकता हा वतरो वणा दिदो। अतरोकीस ने वणा आपणी सगतिऊँ भी बड़न आपणी मरजीऊँ हरदा ने खोलन दिदो।

⁴ वीं मोटा बोज का हाते परमेसर का पुवितर मनकाँ की मदत करबा का मोका का वाते अरज करता रिया।

⁵ अन जस्यान माँ वाँकाऊँ आस राकी ही, वणीऊँ हेलो वणा किदो। वणा पेल्याँ खुद ने परबू ने हूँप दिदा अन पछे परमेसर की मरजीऊँ वणा खुद ने माँने हूँप दिदा।

⁶ ईं वाते माँ तीतूसऊँ अरज किदी के, जस्यान वणी आपणो काम चालूँ कर दिदो हे, वस्यानीस ईं दान भेळो करबा का काम ने थाँका वाते पूरो करे।

⁷ अन थाँ हारी बाताँ धनवान हो, जस्यान के विस्वास में, बोली में, ग्यान में, नरई तरियाऊँ भलई करबा में अन जणी परेम की हिक माँ थाँने दिदी ही, वीं परेम में थाँ पाका हो वस्यानीस थाँ अणी दान देबा का काम में भी बड़ता जावो।

⁸ आ बात में आग्या देन ने की, पण दूजाँ मनकाँ के खुला मनऊँ दान देबा की भावना का बारा में केन थाँका परेम का हाँच की परक करणो छारियो हूँ।

⁹ काँके थाँ आपणाँ परबू ईसू मसी की दया ने तो जाणोइस हो अन थाँ ओ भी जाणो हो के, वीं अमीर वेता तका भी थाँका वाते गरीब बणग्या। जणीऊँ वाँकी गरीबीऊँ थाँ अमीर वे जावो।

¹⁰ या बात थाँका वाते हव हे, अन ईं दान का काम में एक वरऊँ करबा मेंईस ने पण ईं बात ने मानबा में भी थाँ हाराऊँ आगे हो। ईं बात में मारी सला हे के,

¹¹ अबे थाँ अणी काम ने पूरो करो। ज्या मरजी थाँ किदी ही, वींने ज्यो कई थाँका नके हे वींमेंऊँ दान देन पुरी करो।

¹² काँके जस्यान देबा को मन वेवे हे वस्यानीस वींको दान गरेण किदो जावे हे। मारो केणो हे के, जतरोक वे वतरो दे दिज्यो वणीऊँ बड़न मती देज्यो।

¹³ काँके मूँ ओ ने छावूँ हूँ के, थाँ परेसानी में पड़ जावो अन दूजाँ ने थाँकाऊँ नफो वे, पण माँ तो हाराई को भलो छावाँ हाँ।

¹⁴ मारी मरजी हे के, वाँकी अणी घटती में थाँकी बढोतरी वाँकी जरूत पुरी करे, जणीऊँ कणी दन थाँकी घटती में वाँकी बढोतरी थाँकी जरूत पुरी कर सके, अस्यान हाराई बराबर वे जाई।

¹⁵ जस्यान सास्तर में लिक्यो तको भी हे के, “जणी नरोई भेळो किदो वींके नके जरूतऊँ हेलो ने बच्यो, पण जणी थोड़ोकइस भेळा किदो वींके कईस कमी ने पड़ी।”

तीतूस अन वाँका हण्डाळ्याँ

¹⁶ परबू को धन्नेवाद वे, ज्यो तीतूस का हरदा में थाँकी चन्ता करबा का वाते वस्यानीस मरजी दिदी हे, जस्यान की मरजी मारा हरदा में हे।

¹⁷ काँके वणी माँकी हाता-जोड़ीइस ने मानी अन वींके वाते वो मरजी भी राके हे, ईं वाते वो खुद की मरजीऊँ थाँका नके आबा वाते अटूऊँ हिक लेरियो हे।

¹⁸ अन माँ तीतूस का हाते वणी भई ने भी खन्दारिया हा, जिंको हव हमच्यार का परच्यार करबाऊँ हारी मण्डळ्याँ में अन हारी जगाँ में वींको नाम फेलरियो हे।

¹⁹ अन अतरोइस ने पण वो मण्डली का मनकाँ का क्या के, जस्यान मारा हाते जाबा का वाते वींने चुण्यो भी हे। ईं दान का काम वाते वो मारा हाते जावे अन माँ ओ सेवा को काम ईं वाते करिया हाँ जणीऊँ परबू की मेमा अन माँकी हरदा की मरजी हामे आवे।

²⁰ अन माँ ईं बात को ध्यान राका हाँ के, खुला मनऊँ दिदा तका हेला दान का काम ने माँ कररिया हाँ, वींका वाते कुई दोस ने लगा सके।

²¹ काँके ज्यो बाताँ परबू की देकणी मेंईस ने पण मनकाँ की देकणी में भी सई हे, माँ वणा बाताँ की चन्ता कररिया हा।

²² वाँका हाते माँ माकाँ एक ओरी भई ने खन्दारिया हाँ, जिंने माँ घणी बाताँ में अन घणी दाण भलई करबा का वाते त्यार देक्यो हे अन अबे वींने थाँका पे घणो विस्वास हे, जणीऊँ वींने थाँकी मदत करबा की मरजी घणी हेली वेगी हे।

²³ यद्याँ कुई मने तीतूस का बारा में पूछे, तो वो मारा हाते रेबावाळो अन थाँका नफा का वाते मारा हाते काम करबावाळो हे अन जटे तईं मारा भायाँ को सवाल हे तो, वीं मण्डळीऊँ खन्दाया तका अन मसी की मेमा का हे।

²⁴ ईं वाते थाँ वाँने परेम करन बताज्यो, माँ थाँका पे अतरो मेपणो काँ कराँ हाँ। ईं बात ने थाँ साबत करज्यो, जणीऊँ हारी मण्डली वींने देक सके।