2 कुरिन्थियों 6 - नुवो नेम (मेवड़ी नया नियम)

¹ माँ परमेसर का हाते वाँको काम करबा का मस थाँकाऊँ अरज करा हाँ के, परमेसर की दया ज्यो थाँका पे वीं हे वींने बेकार मती वेबा दिज्यो।

² काँके परमेसर केवे हे के, “जद्याँ थाँकी मदत करबा को टेम आयो तो में थाँकी हुण लिदी अन मूँ बंचाबा का दन थाँकी मदत किदी।” देको “सई टेम” याईस हे अन देको “बंचाबा को दन” भी योईस हे।

पोलुस की परेसानी

³ माँ कणी का वाते ठोकर ने बणा, जणीऊँ किंने भी माँकी सेवा में कई कमी ने मले।

⁴ पण माँ तो परमेसर का हव दास का जस्यान खुद ने साबत करा हाँ, धीरज का हाते हारोई सेण करता तका दुक में, अबकी टेम में, परेसानी में,

⁵ मार खाता तका, जेळ में रेता तका, कळेस में रेता तका, मेनत करन, रात-दन जागन, भूका रेन भी,

⁶ खुद ने पुवितर राकन, ग्यान अन धीरजऊँ, अन दया करन अन पुवितर आत्माऊँ, हाँचा परेमऊँ

⁷ अन हाँच का हमच्यारऊँ अन परमेसर की तागतऊँ माँ माकाँ हाताँ में परमेसर का हामे सई ठेराबावाळी ढाल लेन,

⁸ माँ इजत, अपमान में अन मान पाबा में अन बेजत वेबा में आगे राका हाँ। माँने मनक ठग हमजे हे, जद्याँ के माँ हाँचा हाँ।

⁹ माँने फोगट्या हमजे हे जद्याँ के माँ तो मान्याँ तका हाँ अन माँने मरिया तका जाणे हे, जद्याँ के माँ तो जीवता हाँ। माँने दण्ड पाबावाळा का जस्यान जाणे हे, तद्याँ भी माँ मोत ने ने हुप्याँ जावाँ हाँ

¹⁰ अणीऊँ माँ घणा दकी हाँ, पण हमेस्यान राजी रेवा हाँ। माँ गरीब हा, पण माँ तो नरई ने धनवान बणावा हाँ। माकाँ नके कई ने हे, जद्याँ के माकाँ नके हारोई हे।

¹¹ हो कुरिन्थियाँ का लोगाँ माँ थाँकाऊँ खुलन बाताँ करा हा अन माँको मन थाँका वाते खुलो हे।

¹² ज्यो परेम माँ थाँकाऊँ करा हाँ, वो कम ने व्यो हे, पण थाँ माँकाऊँ परेम करणो छोड़ दिदो हे।

¹³ मूँ या बात थाँने मारा छोरा-छोरी जाणन केरियो हूँ के, थाँने भी मारा वाते थाँका मन ने खोलन राकणो छावे।

बना विस्वासवाळा मनकाँ की संगत मती करो

¹⁴ बना विस्वासवाळा मनकाँ का हण्डाळ्याँ मती बणो, काँके धारमिकता को पाप का हाते कई मेळ ने हे। अन्दारा की उजिता का हाते कस्यान संगती वे सके हे?

¹⁵ अस्यानीस मसी को सेतान बलियालऊँ कई लेणो-देणो ने हे। बना विस्वासवाळा मनक को विस्वासी का हाते कई मेळ ने हे।

¹⁶ परबू का मन्दर को मूरत्याऊँ कई वेवार? काँके आपाँ खुदईस जीवता परमेसर का मन्दर हा, जस्यान वणा खुदईस क्यो हो, “मूँ वाँका में वास करिया करूँ, वाँका में चालूँ-फरूँ। मूँ वाँको परमेसर वेऊँ अन वीं मारा मनक वेई।

¹⁷ “ईं वाते परबू केवे हे के, थाँ वणाऊँ न्यारा वेन बारणे निकळो, वणाऊँ खुद ने छेटी करो अन ज्यो खराब हे वींके कदी भी हात मती अड़ाज्यो तद्याँईस मूँ थाँने अपाणाऊँ।

¹⁸ मूँ थाँको बापू वेऊँ, अन थाँ मारा छोरा-छोरी वेवो। आ बात परम सगतीमान परबू केवे हे।”