2 कुरिन्थियों 2 - नुवो नेम (मेवड़ी नया नियम)

¹ में पेल्याइस ते कर मेल्यो हो के, मूँ थाँने तापड़न दुक देबाने पाछो थाँका नके ने आऊँ।

² काँके यद्याँ मूँ थाँने दकी करूँ तो पछे मने कूण राजी करी? थाँकाणी ने, ज्याँने में दुक दिदो हे।

³ ईंवातेइस में थाँने आ बात पेल्या लिकी ही के, जद्याँ मूँ थाँका नके आऊँ तो वाँ मनकाँऊँ ज्यो मने राजी राके हे, वाँकी वजेऊँ मने दुक ने वेवे, काँके मूँ थाँ हारई पे विस्वास करूँ हूँ के, थाँ मारे राजी रेवाऊँइस राजी रेवो हो।

⁴ काँके में ईं बाताँ दकऊँ भरिया तका हरदा का हाते अन रोता तका थाँका वाते लिकी हे। पण थाँने दुक देबा का वाते ईं बाताँ ने लिकी हे, पण ईं वाते लिकी हे के, ज्यो परेम मूँ थाँकाऊँ करूँ हूँ, थाँ वींने जाण जावो।

पापी मनकाँ ने माप करो

⁵ अन यद्याँ कणी मने दुक दिदो हे, तो वणी बेस मनेइस ने दिदो हे, पण वणी थाँने भी दुक दिदो हे। मूँ थाँका पे कल्ड़ो ने पड़णो छारियो हूँ।

⁶ अस्या मनक ने थाँ विस्वास्याँ को समाज ज्यो दण्ड दिदो हे, वो खुब हे।

⁷ पण थाँ तो वींको उल्टो करो, वीं मनक ने माप कर दो अन वींकी हिम्मत बड़ावो के, वो भी आगे जा सके जणीऊँ वीं दुक मेंईस ने डूब्या रेवे।

⁸ ईं वाते मूँ थाँकाऊँ अरज करूँ हूँ के, थाँ ओ साबत करज्यो के, थाँ वणीऊँ परेम करो हो।

⁹ अन में ओ देकबा का वाते या बात लिकी ही के, थाँ परक में खरा निकळो के ने अन हारी बाताँ में मानबावाळा हो कन ने।

¹⁰ यद्याँ थाँ किंने कस्यी भी बात का वाते भी माप करो हो वींने मूँ भी माप करूँ हूँ अन ज्यो कई भी मूँ माप करूँ हूँ वो मसी का हामे थाँका वाते किदो ग्यो हे,

¹¹ जणीऊँ आपाँ सेतानऊँ हारा कोयने, काँके आपाँ वींकी चाल ने जाणा हाँ।

पोलुस को दकी वेणो

¹² जद्याँ मूँ मसी का हव हमच्यार को परच्यार करबा का वाते त्रोआस आयो हो, तो मारा वाते परबू गेलो खोल दिदो हो।

¹³ पण मारा विस्वासी भई तीतूस ने वटे ने देकन मारो मन घणो दकी व्यो, तो मूँ वटेऊँ हिक लेन मकिदुनिया आड़ी चाल पड़्यो।

मसी में जीत

¹⁴ परमेसर को धन्नेवाद वे ज्यो आपाँने मसी की वजेऊँ जीतावे हे अन खुद का ग्यान की हव बाना ने आपणाँऊँ हारी जगाँ फेलावे हे।

¹⁵ ज्यो नास वेरिया हे अन ज्यो बंचाया जारिया हे, वाँका बचमें आपाँ धुप की हव बाना का जस्यान हाँ, ज्या मसी परमेसर ने चड़ावे हे।

¹⁶ पण वाँका वाते ज्यो मोत का गेला पे नास वेबा का वाते जारिया हे वाँका वाते मोत का जस्यान की बाना हाँ ज्यो मोत का आड़ी ले जावे हे। पण वाँ मनकाँ वाते ज्यो बंचाया जाबा का गेला का आड़ी जारिया हे वाँका वाते जीवन का जस्यान की बाना हाँ ज्यो वाँने जीवन का आड़ी बड़ावे हे। पण अणी बाताँ का जोगा कूण हे?

¹⁷ परमेसर का बचनाँ को वोपार करबावाळा नरई मनक हे वीं आपणो नफो छावे हे पण माँ अस्यान ने हाँ। माँ तो परमेसर का आड़ीऊँ खन्दाया तका मनक का जस्यान मसी ने हाते लेन, हाँचऊँ बोला हाँ।