2 कुरिन्थियों 11 - नुवो नेम (मेवड़ी नया नियम)

पोलुस अन जूटा खन्दाया तका चेला

¹ यद्याँ थाँ मारा बेण्डापणा ने सेण कर लेता तो कतरो भलो वेतो। अन थाँ वींने सेण भी करो हो।

² काँके जस्यान परबू थाँकी चन्ता करे हे वस्यान मूँ भी थाँकी चन्ता करूँ हूँ। मूँ थाँकी बात एकीस मसी का हाते लगा मेली हे जणीऊँ मूँ थाँने पुवितर कूँवारी छोरी का जस्यान मसी ने हूँप दूँ।

³ पण मने दरपणी लागे हे, काँके कदी अस्यान ने वेजा के, जस्यान धरती की पेली लुगई ज्या हवा ही, वींने हाँप आपणी चालऊँ भटका दिदी ही, वस्यानीस ईं थाँका मन भी मसी की भगतीऊँ अन पवितरताऊँ ज्यो आपाँने मसी का वाते राकणी छावे, वणीऊँ भटका ने दिदो जावे।

⁴ काँके थाँका नके कुई आन ईसू का उपदेस माँ थाँने हुणाया हाँ, वींके अलावा यद्याँ कुई दूजाँ ईसू का उपदेस हुणावे हे, अन ज्यो पुवितर आत्मा थाँने मली हे, वींके अलावा यद्याँ थाँ दूजी आत्माने मानो हो। जणी छूटकारा का हमच्यार ने थाँने हुणाया हो, वींके अलावा यद्याँ थाँ दूजाँ हमच्यार ने हुणो हो तो ईंको मतलब ओ हे के, थाँ दूजाँ ईसू, दूजाँ हमच्यार अन दूजी आत्माने लेबा का वाते त्यार हो।

⁵ पण मूँ खुद ने वाँ लोगाऊँ फोरा ने हमजूँ हूँ, ज्याँने थाँ खन्दाया तका मोटा चेला केवो हो।

⁶ वे सके हे के, मारी बोलबा को हुनर थोड़ो कम हे पण ग्यान तो घणो हे। ईं हारी बाताँ का बारा में माँ थाँका हामे साप तरियाऊँ बताता आरिया हाँ।

⁷ में खुद ने फोरो करन थाँने ऊपरे उटाबा का वाते फोगट में परमेसर को हव हमच्यार हुणान कई पाप कर दिदो हे?

⁸ कई थाँ के सके हो के, में दूजी मण्डळ्याऊँ मदत लेन वाँने लूटी ताँके मूँ थाँकी सेवा कर सकूँ?

⁹ जद्याँ मूँ थाँका नके हो तो मने कमी वीं हे तद्याँ भी में थाँका पे कई बोज ने नाक्यो, काँके मारा भायाँ मकिदुनियाऊँ आन मारी वणी कमी ने पुरी किदी हे। में हरेक दाण खुद ने थाँका पे बोज बणाबाऊँ रोक्यो, अन आगे भी रोक्यो रेऊँ।

¹⁰ यद्याँ मसी को हाँच मारा में हे तो अखाया परदेस में कुई भी मने ईं बात में मेपणो करबाऊँ ने रोक सकी।

¹¹ ईंको ओ मतलब ने हे के, मूँ थाँकाऊँ परेम ने करूँ हूँ? परमेसर ईं बात ने जाणे हे के, मूँ थाँकाऊँ परेम करूँ हूँ।

¹² ईं वाते ज्यो कई मूँ करूँ हूँ, वींने करतो रेऊँ जणीऊँ ज्याँने थाँ खन्दाया तका मोटा चेला केवो हो, वाँने आपणी तरियाँ मेपणो करबा को मोको ने मले, जणी बात पे वीं मेपणो करे हे।

¹³ काँके अस्या मनक जूटा खन्दाया तका चेला हे अन धोकाऊँ काम करबावाळा हे, अन मसी का खन्दाया तका चेला को रूप धारण करबावाळा हे।

¹⁴ या अचम्बा की बात ने हे, काँके सेतान खुद भी उजिता का हरग-दुताँ को रूप धारण करे हे।

¹⁵ ईं वाते वीं सेतान का दास भी धरम का काम करबावाळा का जस्यो रूप धारण करे हे या कई मोटी बात ने हे, पण अंत में वाँको नास वाँके काम का जस्यान वेई।

पोलुस को दुक जेलणो

¹⁶ मूँ पाछो कूँ हूँ, कुई मने बेण्डो मती हमज ज्यो अन ने तो मने बेण्डो हमजन मारी मानलो, जणीऊँ मूँ भी थोड़ो घणो मेपणो कर सकूँ।

¹⁷ मूँ ईं मेपणो की वजेऊँ ज्यो कई कूँ हूँ, वो परबू का आग्याऊँ ने कूँ पण अस्यान मानलो के, मारा बेण्डापणा ऊँइस केरियो हूँ।

¹⁸ काँके नरई मनक तो आपणी देह जस्यानीस मेपणो करे हे, तो पछे मूँ भी मेपणो करूँ।

¹⁹ थाँ हूँस्यार हो ईं वाते राजी रेन मारा बेण्डापणा की बाताँ ने सेण करो हो।

²⁰ मने विस्वास ने वेरियो के, कुई थाँने दास बणावे, थाँको बुरो भी करे, यद्याँ कुई थाँने जाळ में फसावे, अन खुद ने थाँकाऊँ मोटो बणावे अन कुई थाँका मुण्डा में जापट मारे तो थाँ वींने सेण करो हो।

²¹ मूँ हरमा मरन केरियो हूँ माँ वाँकाऊँ घणा कमजोर हाँ, ज्यो थाँने अस्यान हिकावे हे, माँ वाँके जस्यान ने हिका सका हाँ। पण यद्याँ कुई कणी बात पे मेपणो करबा हिम्मत करे हे, तो मूँ बेण्डापणाऊँ कूँ हूँ के, मूँ भी हिम्मत करूँ।

²² कई वींइस इबरानी थोड़ी हे? मूँ भी तो हूँ। कई वींइस इजराएल का हे? मूँ भी तो हूँ। कई वींइस अबराम का घराणा का हे? मूँ भी तो हूँ।

²³ कई वींइस मसी का दास हे? मूँ बेण्डा के जस्यान कूँ हूँ, मूँ वणाऊँ भी बड़न मसी को दास हूँ। वाँकाऊँ हेली मेनत करबा में, नरी दाण जेळ में बन्द वेबा में, कोड़ा की मार खाबा में, आकोदाण मोत का मुण्डो में जाबा में,

²⁴ पाँच दाण मूँ यहूदियाँ का हाताऊँ चालीस में एक कम कोड़ाऊँ मार खादी।

²⁵ तीन दाण तो में लटऊँ मार खादी अन एक दाण तो मारा पे भाटा की भी बरका किदी गी ही। तीन दाण तो जणी जाँज में चड़्यो हो, वींई टुटग्या, एक दाण तो मूँ एक रात-दन समन्द का मयने रियो।

²⁶ नरी दाण तो मूँ लम्बी जातरा पे ग्यो, नरी दाण खतरनाक नन्दयाँ, जबरा डाकूँऊँ, खुद का लोगाऊँ, ज्यो यहूदी ने हा वाकाँऊँ खतरा को सामनो किदो, नरी दाण नगरा में, समन्द में, काकड़ में, दिकावटी भायाँऊँ खतरा को सामनो किदो।

²⁷ में घणी मेनत किदी हे अन दुक का हाते जीवन जिदो हे। नरी दाण तो मूँ हूँ भी ने सक्यो। अन नरी दाण तो भुको-तरियो भी रियो हूँ, नरी दाण तो ठन्ड में बना गाबा के धूजतो रियो हूँ।

²⁸ अन ईंका अलावा मारा पे हारी मण्डळ्या की चन्ता को बोज भी रोज पड़्यो तको हो।

²⁹ जद्याँ कुई कमजोर हे तो मूँ खुद ने कमजोर मेसूस करूँ हूँ अन यद्याँ कुई पाप में हे तो मूँ वींका वाते दकी वेवूँ हूँ।

³⁰ यद्याँ मने बड़न चड़न बाताँ करणीइस वेती, तो मूँ मारी वाँ बाताँ ने करतो जीं मारी कमजोरी की हे।

³¹ आपणाँ परबू ईसू मसी का बापू परमेसर की हमेस्यान मेमा वेती रेवे, वीं जाणे के, मूँ जूट ने बोलूँ हूँ।

³² दमिसक नगर में अरितास राजा का आड़ीऊँ ज्यो हाकम हो, वणी मने पकड़बा का वाते दमिसक नगर में पेरो लगा मेल्यो हो।

³³ अन मने टोकरी में बेवाड़न भींत की खड़की का मयनेऊँ बारणे काड़्यो ग्यो हो, अस्यान मूँ वटूँऊँ बंच निकळ्यो हो।