2 कुरिन्थियों 1 - नुवो नेम (मेवड़ी नया नियम)

नमस्कार

¹ यो कागद मूँ पोलुस ज्यो परबू ईसू मसी की मरजीऊँ खन्दायो तको चेलो हूँ अन भई तिमुतियुस कुरिन्तुस नगर की मण्डली ने अन अखाया का हाराई परमेसर का मनकाँ ने लिकरिया हाँ।

² आपणाँ बापू परमेसर अन परबू ईसू मसी का आड़ीऊँ थाँने दया अन सान्ती मले।

पोलुस को परमेसर ने धन्नेवाद देणो

³ आपणाँ परबू ईसू मसी का बापू परमेसर की बड़ई वेवे, वीं दया करबावाळा अन हिम्मत देबावाळा हे।

⁴ अन जद्याँ आपाँ कळेस में वेवा हा तो परमेसरइस आपाँने हिम्मत देवे हे, ताँके आपाँ भी परमेसर की सान्तीऊँ वाँ मनकाँ ने हिम्मत दे सका ज्यो कळेस में पड़्या तका हे।

⁵ काँके जस्यान आपाँ मसी का हाते दुक में हिस्सेदार हाँ, वस्यानीस आपाँ भी मसी की वजेऊँ परमेसर की हिम्मत में हिस्सेदार हाँ।

⁶ अन यद्याँ माँ कळेस भोगा हाँ तो थाँकी हिम्मत अन थाँने बंचाबा का वाते भोगा हाँ अन माँ राजी हा काँके थाँ राजी हो अन थाँको राजी रेणोइस थाँने धीरज का हाते वणा कळेस ने भोगबा का वाते हिम्मत देवे हे ज्यो आपाँ भोगा हा।

⁷ माँ थाँकाऊँ पाकी आस राका हाँ, काँके माँ जाणा हाँ के, जस्यान थाँ माकाँ कळेस में हिस्सेदार हो वस्यानीस माँकी हिम्मत में भी थाँ हिस्सेदार हो।

⁸ हो विस्वासी भायाँ माँ ओ भी छावाँ हाँ के, ज्यो कळेस माँने एसिया में जेलणो पड़्यो हो वींके बारा में थाँ भी जाणो। वटे माँ माँकी सेनसगतीऊँ भी हेलो कळेस भोग्यो हो अन मरबा तईं की नोपत अईगी ही।

⁹ अन माँ माकाँ हरदा में आ बात होचबा लागा के, माँने तो मोत को दण्ड मलग्यो हे, जणीऊँ माँ खुद पे हेलो भरोसो ने करन परमेसर पे भरोसो राका हा, ज्यो मरिया तका ने भी पाच्छा जीवता कर देवे हे।

¹⁰ अन वणाईस माँने भी खतरनाक मोतऊँ बंचाया हा अन आगे भी बंचाता रेई, काँके माँ वींपेईस आस लगा मेली हे, वींइस माँने आगे भी बंचाई।

¹¹ अन यद्याँ थाँ भी थाँकी परातना में माँने आद करन मदत किदी तो जीं मनक माकाँ वाते अरज करे हे के, माकाँ पे परबू की दया वे, अन परमेसर ज्यो माकाँ वाते किदो हे वींका वाते वणा मनकाँ ने भी धन्नेवाद देबा को मोको मल जाई।

पोलुस की ओजणा में बदलाव

¹² माँ आ बात मेपणोऊँ अन साप हरदाऊँ के सका हाँ के, माँ ईं दनियाँ का हाते अन खासतोरऊँ थाँका हाते परमेसर की दया के जस्यान चाल्या हा अन हव तरियाऊँ अन हाँच का हाते चाल्या हा ज्यो परमेसर का आड़ीऊँ मले हे ईं दनियाँ की अकलऊँ ने मले हे।

¹³ माँ थाँने अस्यो कई ने लिकरिया हाँ ज्यो थाँ ने भण सको अन ने हमज सको। मूँ आस करूँ के, थाँ अणी कागद की हारी बाताँ ने अंत पुरी तरियाऊँ हमज लेवो।

¹⁴ जस्यान थोड़ागणा थाँ माँने हमज्या हो, थाँ मारा पे वस्यानीस मेपणो कर सको हो जस्यान के माँ थाँका पे वणी दन मेपणो कराँ जद्याँ आपणाँ ईसू मसी पाच्छा आई।

¹⁵ अन ईं भरोसा की वजेऊँ मूँ थाँका नके पाछो आबा का वाते ते किदो हो, जणीऊँ मूँ थाँने दो दाण आसिरवाद ले सको।

¹⁶ मूँ होचूँ हूँ के, जद्याँ मूँ मकिदुनिया जातो तको थाँकाऊँ मलूँ अन जद्याँ मकिदुनियाऊँ पाछो आऊँ तो थाँका नके अऊँ अन थाँईस मने यहूदियाँ जाबा वाते जरूत की चिजाँ देन हिक देवो।

¹⁷ ईं वाते जद्याँ मूँ ईं बाताँ की मरजी किदी ही वाँ यूँई तो ने किदी अन में ज्यो मरजी किदी हे वाँ ईं दनियाँ का मनकाँ का जस्यान थोड़ी किदी हे। यद्याँ अस्यान करतो तो मूँ हाँ हाँ अन ने ने केतो।

¹⁸ पण परमेसर विस्वास जोगा हे, ईं वाते माँ थाँने ज्यो हमच्यार हुणायो हे, वो हाँचो हे।

¹⁹ काँके थाँका बचमें में अन सिलवानुस, तिमुतियुस परमेसर का बेटा ईसू मसी को ज्यो परच्यार किदो हो, वो हाँ अन ने में कोयने किदो हो पण वो ईसू मसी में हाँ मेंईस हो।

²⁰ काँके परमेसर ज्यो भी वादो किदो हे वो ईसू मसी में हाँ में पूरो किदो हे अन आपाँ भी ईं वजेऊँ केवाँ हाँ के, अस्यानीस वे(आमीन) अन ओ परमेसर की मेमा का वाते वेवे हे।

²¹ अन ज्यो थाँने भी मारा हाते ईसू मसी की वजेऊँ जोड़े हे अन आपाँने चुण्या हे, वीं परमेसरइस हे।

²² वींइस आपाँ पे छाप भी लगई हे अन आपणाँ मयने गारन्टी का रूप में पुवितर आत्मा दिदी हे, वीं आपणो वादो पूरो करी।

²³ गवई का रूप में परमेसरऊँ अरज करतो तका अन मारा जीवन का होगन खान कूँ हूँ के, मूँ पाछो कुरिन्तुस में ईं वाते ने आयो हो काँके मूँ थाँने दकऊँ बंचाणा छातो हो।

²⁴ अन ईंको ओ मतलब ने के, माँ थाँका विस्वास पे काबू पाणो छारिया हाँ। थाँ तो थाँका विस्वास में गाटा हो अन माँ तो थाँकी खुसी में थाँका हाते हाँ।