1 थिस्सुलुनिक्यों 3 - नुवो नेम (मेवड़ी नया नियम)तिमुती ने खन्दाणो 1 ईं वाते थाँने देकबा का वाते माँ ओरी वाट ने नाळ सकता हाँ, तो माँ ओ ते किदो के, एतेंस नगर में एकला रे जावाँ, 2 अन तिमुती ने ज्यो मसी का हव हमच्यार में मारो विस्वासी भई अन परमेसर को दास हे वींने थाँका नके खन्दावाँ जणीऊँ वो थाँने पाका करे अन विस्वास का बारा में हमजावे अन थाँकी हिम्मत बड़ावे। 3 जणीऊँ दुक में थाँ पाच्छा भटक ने जावो। थाँ खुद ईं बात ने जाणो हो के, आपणाँ वाते दुक देकन भी कल्ड़ो रेणो परमेसर की मरजी कोईस एक भाग हे। 4 काँके जद्याँ माँ थाँका नके हाँ, तो पेल्याँई थाँने बतायो हो के, माँने दुक मली अन वस्यानीस व्यो, ओ थाँ भी जाणो हो। 5 ईं वाते जद्याँ माराऊँ ओरी ठमाव ने व्यो तो में थाँका विस्वास का हाल-चाल जाणबा का वाते वींने खन्दायो। परमेसर करे अस्यान ने वेणो छावे के, परकबा वाळी बाताँऊँ थाँ लाळच में आन मारो करियो-करायो काम बेकार तो ने कर दिदो। तिमुती का आड़ीऊँ हमच्यार मलणो 6 तिमुती थाँका नकेऊँ पाछो आन ज्यो मने थाँका विस्वास अन परेम को हमच्यार हुणायो अन ओ भी बतायो के, थाँ हमेस्यान माँने परेम का हाते आद करो हो अन जस्यान मारो मन थाँने देकबा ने करे हे वस्यानीस थाँको मन भी करे हे। 7 ईं वाते हो भायाँ-बेना, थाँका विस्वास का हमच्यारऊँ माकाँ हाराई दुक में अन कळेस में माँने घणी हिम्मत मली हे। 8 अबे माँकी काया होरी रेवे हे, काँके थाँ परबू में बण्या तका रेवो हो। 9 अबे माँ थाँका वाते परमेसर ने धन्नेवाद दे सका हाँ। थाँकी वजेऊँ ज्यो आणन्द परमेसर हामे माँने मल्यो हे वणी वाते माँ वींको घणो धन्नेवाद देवाँ हाँ। 10 माँ रात-दन वणीऊँ मनऊँ अरज कररिया हाँ के, थाँने देका अन थाँका विस्वास की कमी पुरी कराँ। 11 अबे आपणाँ बापू परमेसर अन परबू ईसू माकाँ वाते अस्यान को गेलो खोले के, माँ थाँकाऊँ आन मला। 12 परबू करे, जस्यान माँको परेम थाँका वाते हे वस्यानीस थाँको परेम एक-दूँजा में अन हाराई मनकाँ का हाते रात-दन बड़तो जावे। 13 जणीऊँ वो थाँका हरदा ने अस्यान पाका करी के, जद्याँ आपणाँ परबू ईसू हाराई पुवितर मनकाँ का हाते आई तो थाँ बापू परमेसर का हामे निरदोस अन पुवितर वेवो। |
(c) 2010-2017, New Life Computer Institute. All rights reserved