1 पतरस 5 - नुवो नेम (मेवड़ी नया नियम)

परमेसर की मडळी ने संदेस

¹ अबे मूँ वाँने जो थाँका मयने परदान मान्याँ जावे हे, वाँकाऊँ परातना करूँ हूँ, मूँ खुद एक दानो परदान हूँ अन जो दुक मसी जेल्यो हो वींको मूँ गवा हूँ अन आबावाळी मेमा को मूँ भागी हूँ।

² मूँ थाँने हमजाऊँ हूँ के, परमेसर की मडळी ज्याँ थाँकी देक-रेक में हे वींकी रुकाळी करो। ओ काम किंकई दबाव में आन मती करो पण परमेसर की मरजीऊँ राजी वेन करो। धन का लाळच की वजेऊँ ओ काम मती करो, पण मन लगान यो काम करो।

³ ज्या विस्वासी मण्डली थाँका हक में हे वींपे जोर मती जमावो, पण लोगाँ ने हिक देबावाळा बणो,

⁴ काँके जद्याँ वो रुकाळ्यो मसी जो हाराई पे परदान हे परगट वेई, तो थाँने मेमा को मुकट दिदो जाई अन ईं मुकट की सोभा कदी कम ने पड़ी।

⁵ हो मोठ्याराँ, अणीस तरियाँ थाँ भी परदानाँ का बंस में रेवो, थाँ हाराई का हाराई सेवा करबा वाते दया का हाते त्यार रेवो, काँके “परमेसर मेपणो करबावाळा का खिलाप में हे, पण जो मनक खुद ने फोरो बणावे हे वींके ऊपरे परमेसर दया करे हे।”

⁶ ईं वाते परमेसर का जोरवार हाताँ का रेटे नरम बणन रेवो, जणीऊँ वो थाँने सई टेम आबा में ऊसा करे।

⁷ थाँ थाँकी हारी चन्ता वींके ऊपरे नाक दो, काँके वींने थाँको ध्यान हे।

⁸ थाँ हूँस्यार रेवो अन जागता रेज्यो, काँके थाँको दसमण सेतान दहाड़ करबावाळो नार की जस्यान ईं भाळ में हे के, वो थाँने फाड़न खावे।

⁹ थाँ विस्वास में पाका वेन सेतान को सामनो करो। थाँ तो यो जाणोइस हो के, थाँका भई-बेन अणी आकी दनियाँ में हे दुक जेलरिया हे।

¹⁰ अबे परमेसर, जीं दया करबावाळा अन दया का दाता हे, वींइस थाँने मसी में जुग-जुग का वाते खुद की मेमा करबा वाते बलाया हे। थाँने थोड़ोक दुक जेलबा केड़े, वो खुदई थाँने गाटा, जोरावर अन पाका बणाई।

¹¹ परमेसर को राज जुग-जुग रेवे। आमीन।

आकरी नमस्कार

¹² मूँ सिलवानुस ने विस्वास जोगो भई जाणूँ हूँ अन वींकी मदतऊँ यो कागद लिकन थाँकी हिम्मत बड़ाणी छारियो हूँ अन आ गवई देरियो हूँ के, परमेसर की हाँची दया याईस हे। थाँ ईंमें पाका बण्या तका रेज्यो।

¹³ बेबीलोन की मण्डली में जीं चुण्या तका मनक हे, वीं थाँका जस्याईस हे वीं अन मरकुस ज्यो मारा बेटा का जस्यान हे, थाँने नमस्कार केवे हे।

¹⁴ परेमऊँ एक दूजाँ ने हात-जोड़न नमस्कार करो। मूँ परातना करूँ हूँ के, थाँने हाराई ने जो मसी का हो, परमेसर का आड़ीऊँ सान्ती मलती रेवे।