1 यहुन्ना 1 - नुवो नेम (मेवड़ी नया नियम)बचनइस जीवन हे 1 आपाँ वणी जीवन का बचन की बात करा हाँ, ज्यो किंकी भी रचना वेबाऊँ पेल्याई हो, आपाँ ईंने हुण्यो, आपणी आक्याँऊँ देक्यो, ईंपे ध्यान लगायो, अन आपाँ खुद वींके हात अड़ायो। 2 वीं जीवन को ग्यान आपाँने करायो ग्यो। आपाँ वींने देक्यो। आपीं वींका गवा हा अन अबे थाँने भी वींके बारा में बतावा हाँ, ज्यो बापू परमेसर का हाते हे अन आपाँ पे परगट व्यो हो। 3 माँ वींने देक्यो अन हुण्यो हे। अन अबे थाँकामें भी वींके बारा में परच्यार करा हाँ, जणीऊँ थाँ भी मारा हाते भेळा वे जावो। काँके आपाँ परम बापू अन वींकी बेटा ईसू मसी का हाते भेळा हा। 4 माँ थाँने ईं बाताँ ईं वाते लिकूँ हूँ के, आपणो मन राजी रे सके। परमेसर उजितो हे 5 माँ ज्यो हव हमच्यार परबू ईसुऊँ हुण्यो हे वोईस थाँने हूणावाँ हाँ के, परमेसर उजितो हे अन वींमें नामेक भी अंदारो ने हे। 6 यद्याँ आपाँ केवा के, आपाँ वींका हाते भेळा हा अन पछे भी पाप ना अंदारा में चाला, तो आपाँ जूटा हाँ अन हाँच पे ने चाला हाँ। 7 अन यद्याँ आपाँ केवा के, आपाँ वींके हाते उजिता में हा अन वींके जस्यानीस उजिता में चाला हा, तो आपाँ एक विस्वासी का जस्यान एक-दूजाऊँ मलन रेवा हा अन परमेसर का बेटा ईसू मसी को खून आपणाँ हाराई पाप ने धो देवे हे। 8 यद्याँ आपाँ केवा के, आपाँ में कई पाप ने हे, तो आपाँ खुद ने धोको देवा हा अन आपणाँ में हाँच ने हे। 9 पण यद्याँ आपाँ परमेसर का हामे खुद का पाप ने मानाँ, तो वो आपणाँ पाप ने अन आपणाँ हाराई अधरम माप कर देई, काँके वो विस्वास जोगो अन न्याव करबावाळो हे। 10 अन यद्याँ आपाँ केवा के, आपाँ कई पाप ने कररिया, तद्याँ आपाँ परमेसर ने जूटो बताबा हाँ अन ईं वजेऊँ वींको बचन भी आपणाँ में कोयने हे। |
(c) 2010-2017, New Life Computer Institute. All rights reserved