1 कुरिन्थियों 4 - नुवो नेम (मेवड़ी नया नियम)

मसी का खन्दाया तका चेला

¹ माकाँ बारा में कणी मनक ने अस्यान होचणो छावे के, माँ मसी का दास हा। परमेसर के भेद की बाताँ का भण्डारी हा।

² अन पछे जीं ईं भेद की बाताँ का भण्डारी हे, वाँकी भी आ जिमेदारी हे के, वीं विस्वास जोगा रेवे।

³ मने ईंकी थोड़ीक भी चन्ता ने हे के, थाँ मारो न्याव करो कन कुई पंचात करे। मूँ खुद भी आपणो न्याव ने करूँ हूँ।

⁴ काँके मारो मन साप हे, पण अणीऊँ ओ पको ने वेवे हे के, मूँ हाँची में निरदोस हूँ। वीं परबू तो एकीस हे ज्यो मारो न्याव करे हे।

⁵ ईं वाते जद्याँ तईं परबू ने आवे वणीऊँ पेल्याँ किंको भी न्याव मती करो। वीं तो अदंकार में हपी तकी बाताँ ने भी उजिता में दिकाई अन मना की बाताँ भी हामे लाई अन वणी दाण परमेसर का आड़ीऊँ हरेक की बड़ई वेई।

⁶ हो विस्वासी भायाँ में ईं बाताँ ज्यो थाँने हिकई हे वीं आपणाँ खुद अन अपुलोस का ऊपरे लागू किदी हे, ताँके थाँ अणी कावत को अरत जाणन हिक सको के, “थाँ सास्तर में लिकी तकी बाताँ ने उलाँगो कोनी” अन एक मनक को पकस लेन कणी दूजाँ का विरोद करता तका मेपणाऊँ ने भर जावो।

⁷ थाँने दूजाऊँ कणी खास बणाया हे? अन थाँका नके ज्यो कई हे वो कई थाँने परमेसर ने दिदो? तो अस्यान काँ मेपणो करे हे के, थाँ कदी कणीऊँ कई लिदोई कोयने?

⁸ अस्यान लागरिया हो के, थाँ तो धापग्या हो अन थाँ रिप्यावाळा वेग्या हो! कई थाँ माँके बना राज किदो हे? पण भलो वेतो के, थाँ राज करता, तो माँ भी थाँका हाते राज करता।

⁹ काँके मने अस्यान लागरियो हे के, परमेसर माँ खन्दाया तका ने मोत को दण्ड दिदो जा चुक्या मनकाँ का जस्यान हाराईऊँ अंत में राक्या हे, काँके आपाँ आकी दनियाँ अन हरग-दुताँ अन मनकाँ का वाते तमासो बणा हा।

¹⁰ माँ मसी का वाते बेण्डा बणग्या हाँ, पण थाँ मसी में ग्यानवाळा हो, माँ कमजोर हाँ पण थाँ तागतवर हो। माँको मान गटायो जावे हे पण थाँको मान किदो जावे हे।

¹¹ ईं टेम तईं माँ तो भूका तरिया हा। फाटा तका गाबा पेरता हा। माकाँ हाते मार-कूट किदी जावे हे अन माँ बेघर हा।

¹² माकाँ हाताऊँ काम करता तका माँ मेनत-मजदूरी करा हाँ। जद्याँ माँने कुई हराप देवे हे तो माँ वींने आसिरवाद देवाँ हाँ। अन जद्याँ माँने हतावे तो माँ वींने सेण करा हाँ।

¹³ माँ गाळ्याँ हुणन भी नरमाईऊँ जवाब दा हाँ। माँ अणी दनियाँ का कचरोऊँ बड़न ने हाँ। माँ अबाणू भी अणी दनियाँ का मेल हमज्या जावा हाँ।

चेतावणी

¹⁴ मूँ थाँने लाजा मरबा का वाते ईं बाताँ ने लिकरियो हूँ। पण आपणाँ लाड़ला छोरा-छोरी के, जस्यान थाँने चेतावणी देरियो हूँ।

¹⁵ काँके यद्याँ मसी में थाँने हिकाबावाळा दस हजार भी वे, तद्याँ भी थाँका बापू नरई ने हे। काँके हव हमच्यार हुणाबाऊँ अन ईसू मसी में मूँ थाँको बापू बण्यो हूँ।

¹⁶ ईं वाते मूँ थाँकाऊँ अरज करूँ हूँ के, मारा जस्यान चाल चालो।

¹⁷ ईं वाते मूँ तिमुतियुस ने ज्यो परबू का गट-जोड़ में लाड़लो अन मारा विस्वास जोगो बेटो हे, वींने थाँका नके खन्दायो हे, वो थाँने ईसू मसी में मारा वेवार का बारा में बताई, जिंने में हरेक जगाँ अन हरेक मण्डळ्याँ में हिकऊँ हे।

¹⁸ थाँकामूँ कुई मनक तो यो होचन मेपणो करिया हे के, जस्यान अबे मने थाँका नके आणोईस ने हे।

¹⁹ पण परबू छाई तो मूँ थाँका नके फटाकऊँ आऊँ, अन पछे वणा मेपणो करिया हा वणा मनकाँ की बाताँ नेईस ने पण वाँकी तागत ने भी जाण लेऊँ।

²⁰ काँके परमेसर को राज खाली बाताँ में ने, पण परमेसर की तागत में हे।

²¹ थाँ कई छावो हो के, कई मूँ थाँका नके कामड़ी लेन अऊँ कन परेम अन दया की आत्मा का हाते अऊँ।