1 कुरिन्थियों 10 - नुवो नेम (मेवड़ी नया नियम)

मूरत्याँ का विरोद में चेतावणी

¹ हो भायाँ, मूँ ने छाऊँ के, थाँ ईं बात भुल जावो के, आपणाँ बड़ाबा वादळा का रेटे रेन हाराई का हाराई लाल समन्द का बंच में वेन पार व्या हा।

² अन वणा हाराई ने वादळा रेटे जमीं पे अन समन्द में, मूसा ने मानबावाळा का रूप में बतिस्मो दिदो ग्यो।

³ अन वणा हाराई एकीस आत्मिक खाणो खादो हो।

⁴ अन हाराई एकीस आत्मिक पाणी पिदो, काँके वीं वणी आत्मिक छाटऊँ पीता हा, ज्यो वाँका हाते-हाते चालती ही अन वाँ छाट मसी हे।

⁵ पण परमेसर वाँका मूँ नरईऊँ राजी ने व्या, ईं वाते वाँको काकड़ में नास वेग्यो हो।

⁶ ईं बाताँ अस्यान वी के, आपणाँ वाते एक हिक बणगी अन आपाँ अस्यी बुरी बाताँ की मनसा ने करा जस्यी वणा किदी ही।

⁷ अन ने थाँ मूरत्याँ पूजबावाळो बणो, जस्यान वाँका मूँ नरई बणग्या हा। जस्यान लिक्यो हे के, “खा-पीन लुगायाँ अन मनक भेळाई नाचबा लाग्या।”

⁸ अन ने आपीं कुकरम कराँ, जस्यान के वणा मूँ नरई किदो हो, अणीऊँस वाँका मूँ एक दन में तेईस हजार मरग्या हाँ।

⁹ अन ने आपीं मसी की परक कराँ, जस्यान वणा किदी ही अन वीं हाँप के डसबाऊँ मरग्या हा।

¹⁰ अन ने सिकायत कराँ जस्यान वणा मूँ नरई किदी ही अन अणीऊँस वाँको नास दण्ड देबावाळे हरग-दुतऊँ व्यो हो।

¹¹ पण ईं हारी बाताँ, ज्यो वाँका पे अस्यान घटी के वाँका वाते एक हिक वीं अन आपणे चेतावणी का वाते लिकी गी काँके दनियाँ की अन्त टेम नके हे।

¹² ईं वाते ज्यो ओ होचे के, वो विस्वास में सई ऊबो तको हे, तो वींने ध्यान राकणो छावे के, वो रेटे ने पड़ जावे।

¹³ थाँ कदी भी अस्यी परिकसा में ने नाक्या जावो ज्याँ थाँके सेण करबाऊँ बारणे हे। परमेसर तो हाँचा हे। वीं थाँने थाँकी सेण करबा की तागतऊँ हेला परकबा ने देई अन थाँने परिकसा का हाते वणीऊँ बंचबा को गेलो भी बताई ताँके थाँ वींने सेण कर सको।

¹⁴ ईं वाते हो मारा प्यारा भायाँ, मूरती पूँजाऊँ बंचन रो।

¹⁵ मूँ थाँने हमजदार हमजन ओ केरियो हूँ, ज्यो मूँ केरियो हूँ वींकी थाँ खुद परक करो।

¹⁶ वो धन्नेवाद को प्यालो, जिंपे आपीं धन्नेवाद कराँ हाँ, कई आपीं मसी का लुई में भेळा कोयने? वाँ रोटी जिंने आपीं तोड़ा हाँ, कई मसी की देह में आपीं भेळा कोयने?

¹⁷ काँके एकीस रोटी हे अन आपीं ज्यो नरई हाँ, एकीस देह हाँ, काँके आपीं हाराई वणीस रोटी में भागी वेवा हाँ।

¹⁸ वणा इजराएली मनकाँ का बारा में होचो, ज्यो बली किदी तकी चिजाँ खावे हे। कई वीं वणी वेदी में भेळा कोयने हे?

¹⁹ ईं बात ने केवा को मारो मतलब कई हे? कई मूँ ओ केणो छारियो हूँ के, मूरत्याँ पे चड़ायो ग्यो खाणो कई हे कन मूरती कई हे?

²⁰ ने, मारा केवा को मतलब ओ हे के, वीं अधरमी ज्यो बली चड़ावे हे, वीं परमेसर का वाते ने, पण हुगली आत्मा का वाते चड़ावे हे। अन मूँ ने छावूँ के, थाँ हुगली आत्मा के भेळा रेवो।

²¹ थाँ परबू का प्याला मूँ अन हुगली आत्मा का प्यालो मूँ दुयाऊँ ने पीं सको हो। थाँ परबू का भोज अन हुगली आत्मा का भोज, दुयाँ में एक हाते भागी ने वे सको हो।

²² कई आपीं परबू ने गुस्सा देवाड़ा हा? कई जतरा तागतवर परमेसर हे वाँकाऊँ आपीं हेला तागतवर हा?

आपणी आजादी ने परमेसर की मेमा का वाते काम में लो।

²³ आपाँ होरोई करबा का वाते खुला हाँ, पण हारी चिजाँ हव ने हे। आपाँ हारोई करबा का वाते खुला हाँ, पण हारी चिजाँ विस्वास ने गाटो ने करे हे।

²⁴ कने भी आपणाँ हवारत का बारा मेंईस ने होचणो छावे पण दूजाँ लोगाँ की जरूत का बारा में भी होचणो छावे।

²⁵ माँस का बजार में ज्यो कई वके हे, वींने आपणाँ मन का हस्याबूँ खावो पण वींका बारा में कदी सवाल मती करो।

²⁶ काँके सास्तर केवे हे के, “आ धरती अन ईंपे ज्यो कई हे, वो हारोई परबू को हे।”

²⁷ यद्याँ विस्वास ने राकबावाळा थाँने जीम्बा का वाते बलावे अन थाँ वटे जाणा छावो हो तो, थाँके हामे ज्यो भी परोस्योग्यो वींने मनऊँ खा लिज्यो अन वणीऊँ कई सवाल मती करज्यो।

²⁸ पण यद्याँ कुई थाँने ओ केवे के, “यो देवताँ के चड़ायो तको चड़ावो हे” तो जणी थाँने क्यो हे वींके मस अन अतंर-आत्मा का मस वींने मती खाज्यो।

²⁹ मारो मतलब, थाँकी अतंर-आत्माने, पण वीं दूजाँ की, काँके मारी आजादी दूजाँ का बच्यारऊँ काँ परकी जावे।

³⁰ यद्याँ मूँ परमेसर को धन्नेवाद देन खाणा में भाग लेऊँ तो, वींका वाते मने कुई भी कई ने केणो छावे।

³¹ ईं वाते छावे ज्यो खावो, छावो ज्यो पियो, छावो ज्यो करो, बेस हारोई परमेसर की मेमा का वाते करो।

³² थाँ कदी भी ने तो यहूदियाँ अन ने ज्यो यहूदी ने हा अन ने परमेसर की मण्डळ्याँ का वाते ठोकर का मस बणज्यो।

³³ जस्यान मूँ हारी बाताँऊँ हाराई ने राजी राकूँ हूँ, अन आपणो ने पण दूजाँ को नफो देकूँ हूँ के, वीं बंचाया जावे, वस्यानीस थाँ भी करिया करो।