1 कुरिन्थियों 1 - नुवो नेम (मेवड़ी नया नियम)

नमस्कार

¹ पोलुस का आड़ीऊँ जिंने परमेसर आपणी मरजीऊँ ईसू मसी को खन्दायो तको चेलो बणाबा का वाते थरप्यो, में यो कागद, विस्वास में आपणो भई सोस्तिनेस की मदतऊँ

² कुरिन्तुस में परमेसर की वणा मण्डळ्याँ का नाम लिक्यो, जीं ईसू मसी में पुवितर किदी गी, ज्याँने परमेसर आपणाँ मनक बणाबा का वाते चुण्या हा, जीं हरेक जगाँ आपणाँ अन वाँका परबू ईसू मसी को नाम लेवे हे।

³ आपणाँ बापू परमेसर अन आपणाँ परबू ईसू मसी का आड़ीऊँ थाँ हाराई ने सान्ती अन दया मले।

पोलुस को परमेसर ने धन्नेवाद देणो

⁴ परबू ईसू मसी में ज्याँ दया थाँने मली हे, वींका मस मूँ थाँका वाते परमेसर को हमेस्यान धन्नेवाद करूँ हूँ।

⁵ थाँने ईसू मसी में वेन हारी बाताँ में जस्यान बोलबा में, हाराई ग्यान में पाका किदा ग्या हे।

⁶ मसी का बारा में आपाँ ज्या गवई दिदी हे वाँ थाँकामें पाकी निकळी हे।

⁷ ईं मस थाँ जद्याँ आपणाँ परबू ईसू मसी के परगट वेबा की वाट नाळता रेवो हो, तो थाँका नके वाँके कस्यी भी आत्मिक वरदान की कमी ने हे।

⁸ परबू ईसू मसी थाँने अन्त टेम हुदी पाका राकी के, थाँ आपणाँ परबू ईसू मसी का पाच्छे आबा का दन तईं बना दोस का रे सको।

⁹ परमेसर विस्वास जोगा हे, जणा थाँने खुद का बेटा अन आपणाँ परबू ईसू मसी की संगत में बलाया हे।

मण्डळ्याँ में फुट

¹⁰ हो विस्वासी भायाँ, आपणाँ परबू ईसू मसी का नाम में मारी थाँकाऊँ विनती हे के, थाँ हाराई एकीस बात केवो, थाँकामें कई भी फुट ने वेवे, एकीस मन अन एकीस मत वेन मल्या तका रेवो।

¹¹ काँके खलोए का घराणा का मनक मने थाँ विस्वासी भायाँ का बारा में बतायो हे के, थाँ आपस में एक-दूजाऊँ लड़रिया हो।

¹² मारो केणो ओ हे के, थाँकामूँ कुई तो आपणाँ खुद ने पोलुस को, कुई अपुलोस को, कुई केफा को अन कुई मसी का चेला केवो हो।

¹³ तो पछे कई मसी की पाँती वेगी हे? कई मूँ पोलुस थाँका वाते हूळी पे चड़ायो ग्यो? कन कई थाँने पोलुस का नाम में बतिस्मो मल्यो?

¹⁴ परमेसर को धन्नेवाद करूँ हूँ के, क्रिस्पूस अन गयुस ने छोड़न, में थाँकामूँ किंने भी बतिस्मो ने दिदो।

¹⁵ ताँके कुई भी ओ ने के सके के, थाँ मनकाँ ने मारा चेला वेबा का वाते मारा नाम को बतिस्मो दिदो ग्यो हे।

¹⁶ अन में स्तिपनूस का घराणा ने भी बतिस्मो दिदो अणाने छोड़न, मूँ ने जाणूँ हूँ के, में ओरी किंने बतिस्मो दिदो हे।

¹⁷ काँके मसी मने बतिस्मा देबा का वाते ने पण हव हमच्यार हुणाबा का वाते खन्दायो हे अन यो भी मनकाँ का ग्यानऊँ ने। यद्याँ मूँ अस्यान करूँ तो मसी को हूळी चड़णो बेकार वेई।

मसी परमेसर को ग्यान अन तागत हे

¹⁸ वीं ज्यो भटक रिया हे वाँका वाते मसी को हूळी पे मरबा को संदेस एक मुरकता हे, पण ज्यो बंचाया जारिया हे वाँका वाते परमेसर की तागत हे।

¹⁹ काँके सास्तर में लिक्यो तको हे के, मूँ ग्यानी मनकाँ की अकल को नास कर देऊँ, अन हाराई चातरोक की हमजदारी ने बेकार कर देऊँ।

²⁰ कटे हे ग्यानवान? कटे हे भणाबावाळा? कटे हे अणी दनियाँ का वाद-विवाद करबावाळा? कई परमेसर दनियाँ का ग्यान ने बेकार ने ठेरायो हे?

²¹ परमेसर अस्यान होच-हमजन ते कर राक्यो हो के, अणी दनियाँ का मनक आपणाँ ग्यानऊँ परमेसर ने ने जाण पाई, तो परमेसर ने ओ बड़िया लागो के, ईं तरिया परच्यार का जरिये ज्यो आपाँ कराँ हा, ज्यो परच्यार दनियाँ का मनकाँ की नजराँ में मुरकता हे, ईंपे विस्वास करबावाळा मनकाँ ने बचावे।

²² यहूदी मनक तो चमत्कार की हेन्याणी छावे हे अन युनानी मनक ग्यान की खोज में रेवे हे।

²³ पण आपाँ तो वीं हूळी पे चड़ाया तका मसी का उपदेस देवा हाँ। एक अस्यो उपदेस ज्यो यहूदी का वाते ठोकर को मस हे अन ज्यो यहूदी ने हे वाँका वाते मुरकता हे।

²⁴ पण ज्याँने परमेसर बलाया हे, पछे पलई वीं यहूदी वो कन यहूदी ने वो वाँ हाराई का वाते मसी परमेसर की तागत अन परमेसर को ग्यान हे।

²⁵ काँके परमेसर की मुरकता मनकाँ ग्यानऊँ ग्यानवान हे अन परमेसर की कमजोरी मनकाँ की तागतऊँ घणी बलवान हे।

²⁶ हो विस्वासी भायाँ, अबे थोड़ोक होचो के, जद्याँ परमेसर थाँने बलाया हा तो थाँकामूँ नरई तो ने सांसारिक देकणी में विदवान हा अन नेई तागतवर। थाँकामूँ नरई की तो समाज में कई जगाँ भी ने ही।

²⁷ पण परमेसर वणा मनकाँ ने चुण लिदा ज्याँने दनियाँ की नजराँ में मुरक हमज्या जावे हे, ताँके वीं दनियाँ का ग्यानवाळा ने लाजा मारे अन परमेसर दनियाँ की नजराँ में कमजोर हमज्या जाबावाळा ने चुण लिदा, ताँके वीं दनियाँ का तागतवराँ ने लाजा मारे।

²⁸ परमेसर दनियाँ मूँ वाँनेईस चुण्या ज्याँने दनियाँ की नजराँ में नीचा हमज्या जावे हे अन ज्याँने बेकार हमज्या जावे अन ज्यो कई भी ने हे। परमेसर अणाने चुण्या ताँके दनियाँ ज्याँने खास हमजे हे, वाँने वीं बेकार ठेरा सके,

²⁹ ताँके कुई भी मनक परमेसर का हामे मेपणो ने कर सके।

³⁰ अन परमेसर का आड़ीऊँ थाँ ईसू मसी में हो, मसी ज्यो परमेसर का आड़ीऊँ आपणाँ वाते ग्यान ठेरियो अन वींका वजेऊँ आपाँ परमेसर का हामे सई अन पुवितर मनक बण्या अन आपाँने छुटकारो मल्यो।

³¹ जस्यान के सास्तर में लिक्यो हे, “यद्याँ कुई मेपणो करे हे तो वो परबू ज्यो किदो वींका बारा में मेपणो करे।”