Mateus 7 - Eibangeilhos en Mirandês

Nun quergas julgar ls outros

¹ «Nun júlguedes, para que nun séiades julgados;

² porque cul juízo cun que julgardes, sereis julgados i pula medida cun que medirdes, bos será medido.

³ Porque bés un cisco ne l uolho de tou armano i nun bés un cantiado ne l tou uolho?

⁴ Ou cumo tenes coraige de le dezir a tou armano: “Deixa-me tirar l cisco de l tou uolho”, tu que tenes un cantiado ne l tou uolho?

⁵ Falso, tira purmeiro l cantiado de l tou uolho i apuis berás para tirar l cisco de l uolho de tou armano.»

Botar perlas als cochinos

⁶ «Nun le quérgades dar l que ye santo als perros, nien le bótedes las buossas perlas als cochinos, nun se deia l causo de las pisáren culs pies i se buolban a bós i déian cabo de bós.»

Pedi i daran-bos

⁷ «Pedi i daran-bos; buscai i achareis; batei i abriran-bos la puorta.

⁸ Porque todo l que pide, recibe, l que busca, acha i al que bate le abriran la puorta.

⁹ Hai algun home antre bós que, se l filho del le pedir pan, le deia ũa piedra?

¹⁰ Ou se le pedir un peixe, le deia ũa queluobra?

¹¹ Assi, se bós, anque séiades malos, sabeis dar cousas buonas als buossos filhos, aquantas mais l buosso Pai, que stá ne ls cielos, bos dará las cousas buonas que le pedirdes.»

La regra d’ouro

¹² «Todo l que quérgades que las outras pessonas bos fágan, tamien bós se lo debeis fazer a eilhas, porque esta ye la Lei i ls Porfetas.»

Ls dous caminos

¹³ «Antrai pula puorta streita, porque ye grande la puorta i ancho l camino que lhieban a la perdiçon i son muitos ls que éntran por alhá.

¹⁴ Ye streita la puorta i apertado l camino que lhieba a la bida i son poucos ls que dan cun eilha.»

Ls falsos porfetas

¹⁵ «Lhibrai-bos de ls falsos porfetas, que bénen a tener cun bós bestidos de canhona, mas andrento son lhobos malos.

¹⁶ Puls fruitos deilhes los coincereis: acauso se dan ubas ne ls spineiros ou figos ne ls abrolhos?

¹⁷ Toda la arble buona dá fruitos buonos, mas l’arble braba dá fruitos malos:

¹⁸ l’arble buona nun puode dar fruitos malos, nien la arble braba dar fruitos buonos.

¹⁹ Toda l’arble que nun dá fruitos buonos, corta-se i bota-se al lhume.

²⁰ Ye puls fruitos deilhes que los coincereis.

²¹ Nien todo l que me diç “Senhor, Senhor”, antrará ne l reino de ls cielos, mas l que fai la buntade de miu pai que stá ne l cielo, esse si antrará ne l reino de ls cielos.

²² Muitos deziran-me naquel die, “Senhor, Senhor, nun fui an tou nome que porfetizemos, an tou nome que botemos ls demonhos para fuora i an tou nome que fazimos muito milagre?”

²³ Ende, you dezirei-le: “Nunca soube quien érades; sali d’an pie de mi, bós que solo sabeis fazer mal.”»

La casa feita anriba de peinha

²⁴ «Quien oube las mies palabras i las pon an prática ye aparecido al home sabido, que fizo la sue casa anriba de peinha:

²⁵ caiu auga, benírun mundiadas, alhebantórun-se airaçadas i atirórun-se acontra aqueilha casa, mas eilha nun se caiu pus tenie ls aliçaces anriba de peinha.

²⁶ Mas l que oube las mies palabras i nun las pon an prática ye aparecido a aquel home sien miolho que fizo la sue casa anriba d’arena:

²⁷ caiu auga, benírun mundiadas, alhebantórun-se airaçadas i atirórun-se acontra aqueilha casa i eilha caiu-se quedando feita nun sbarrulho.»

Ls juntouros de giente quedában admirados

²⁸ Quando Jasus acabou de dezir estas palabras todo mundo quedou mui admirado culas cousas que el ansinaba,

²⁹ puis ansinaba-los cumo quien ten outoridade i nó cumo ls scribas deilhes.