Mateus 6 - Eibangeilhos en Mirandês

La smola

¹ «Mirai bien, que nun fágades la buossa justícia delantre las pessonas para que séiades bistos por eilhas; senó nun tenereis niũa paga de l buosso Pai que stá ne ls cielos.

² Quando dires smola, nun deixes tocar la corneta delantre de ti, cumo fázen ls falsos nas sinagogas i nas rues, para tenéren l galardon de las pessonas. Quedai bien ciertos de l que bos digo: Yá recebírun la sue paga.

³ Mas quando dires smola, que la tue mano squierda nun saba l que fai la tue mano dreita,

⁴ pa que la tue smola quede an segredo i tou Pai, que bei an sítios scundidos, te dará la paga.»

L’ouracion. L’ouracion de l Senhor

⁵ «Quando rezardes, nun séiades cumo ls falsos, que gústan de rezar de pies nas sinagogas i nas squinas de las praças, pa que séian bistos pulas pessonas. Quedai bien ciertos de l que bos digo: Yá recebírun la sue paga.

⁶ Mas tu, quando rezares, entra an tou quarto i, apuis de cerrar la puorta, reza-le a tou Pai, que stá nun sítio scundido; i tou Pai, que bei an sítios scundidos, te dará la paga.

⁷ Quando rezardes, nun quérgades falar muito cumo fázen ls gentius, puis cúidan que por muito faláren seran oubidos.

⁸ Nun bos quérgades acumparar a eilhes, porque l buosso Pai sabe l que bós teneis percison antes de se lo pedirdes.

⁹ Bós rezareis assi: Pai nuosso, que stais ne l cielo, santeficado seia l buosso nome,

¹⁰ benga l buosso reino, faga-se la buossa buntade, tanto ne l cielo cumo na tierra.

¹¹ Dai-mos hoije l pan pa l nuosso sustento

¹² i perdonai-mos las nuossas díbedas, assi cumo nós tamien le perdonamos als nuossos debedores;

¹³ i nun mos déixedes lhebar pula tentacion, mas lhibrai-mos de l Mal.

¹⁴ Se le perdonardes a las pessonas las oufénsias deilhas, tamien l buosso Pai celhestre bos perdonará a bós;

¹⁵ mas se nun le perdonardes a las pessonas, tamien l buosso Pai nun bos perdonará las buossas oufénsias.»

L ayuno

¹⁶ «Quando ayunais, nun bos quérgades poner tristes cumo ls falsos, puis zafigúran l rostro para le amostráren a las pessonas que stan a ayunar. Quedai bien ciertos de l que bos digo: Yá recebírun la sue paga.

¹⁷ Mas tu, quando ayunas, aperfuma la tue cabeça i lhaba la tue cara,

¹⁸ pa que nun le amostres a las pessonas que stás a ayunar, mas a tou Pai que stá an sítio scundido; i tou Pai, que bei an sítios scundidos, te dará la paga.»

L ajuntar tesouros i l bano cuidado

¹⁹ «Nun quérgades amuntonar para bós tesouros na tierra, adonde la ferruge i ls brugos dan cabo deilhes i adonde ls lhadrones ls zantérran i róuban.

²⁰ Amuntonai tesouros ne l cielo, adonde nien la ferruge nien ls brugos dan cuonta deilhes;

²¹ porque adonde stá l tou tesouro, ende stará tamien l tou coraçon.

²² La linterna de l cuorpo ye l uolho. Assi, se l tou uolho fur hounesto, todo l tou cuorpo tenerá lhuç;

²³ mas se l tou uolho fur malo, todo l tou cuorpo stará a las scuras. Se la lhuç que stá an ti fur scuridon, anton bien grande scuridon ha de haber!

²⁴ Naide puode serbir a dous amos: ou le ha de tener rábia a un i gustar de l outro ou ha de afeiçonar-se a un i çpreziar l outro; nun podeis serbir a Dius i al denheiro.

²⁵ Digo-bos, anton: Nun stéiades acupados cula buossa alma subre l que heis de quemer, nien cul buosso cuorpo subre l quei bestir. Nun ye berdade que l’alma bal mais do que l quemido i l cuorpo mais do que l bestido?

²⁶ Mirai ls paixaricos de l cielo, que nun sémbran nien ségan nien ínchen las tulhas, mas l buosso Pai celhestre sustenta-los. Nun ye berdade que bós sodes muito mais do que eilhes?

²⁷ Quien hai antre bós que seia capaç, cul pensamiento, de aquercentar, nien que seia un cobdo, a la sue bida?

²⁸ I cula bestimienta, porque andais cun cobradeiros de cabeça? Mirai cumo crécen ls lírios de l monte: nun trabálhan nien fílan.

²⁹ Digo-bos you que nien Salomon an toda la sue glória nun se bestiu tan bien cumo un deilhes.

³⁰ Se anté a ũa yerba de l monte, que hoije eisiste i manhana ye botada a la fornalha, Dius la biste dessa maneira, aquantas mais a bós, giente de pouca fé?

³¹ Nun ándedes cun cobradeiros de cabeça dezindo: “L quei hemos de quemer?” ou “l quei hemos de buer?” ou “l quei hemos de bestir?”

³² Son ls gentius que pássan l tiempo a saber destas cousas todas; mas l buosso Pai celhestre sabe que teneis percison dessas cousas todas.

³³ Buscai purmeiro l reino de Dius i la sue justícia, i todas essas cousas bos seran aquercentadas.

³⁴ Nun quérgades andar acupados cul die de manhana, porque l die de manhana tamien tenerá ls sous porblemas. Bonda-le a cada die l sou trabalho.»